މި ސީޒަނުގައި އަލަށް ރެއާލް މެޑްރިޑާއި ގުޅުނު ބެލްޖިއަމްގެ ފޯވަރޑް އެޑެން ހެޒާޑްގެ އަނިޔާ ހީކުރި ވަރަށް ވުރެ ސީރިއަސް ކަމަށާއި އަނިޔާގެ ސަބަބުން ހަޒާޑަށް މި ސީޒަނުގައި ދެން ނުކުޅެވިދާނެ ކަމުގެ ބިރު އެބައޮތް ކަމަށް ރެއާލް މެޑްރިޑްގެ ކޯޗު ޒިނެދިން ޒިދާން ބުނެފި އެވެ.

ހަޒާޑަށް އަނިޔާވީ ސްޕެނިޝް ލީގުގައި މިދިޔަ ހޮނިހިރު ދުވަހުގެ ރޭ ލެވަންޓޭ އަތުން 1-0 ގެ ނަތީޖާއަކުން ރެއާލް ބަލިވި މެޗުގައެވެ. ކުރިން ބެލެވުނު ގޮތުންނަމަ އަނިޔާގެ ސަބަބުން ހަޒާޑަށް ގެއްލޭނީ 2 ހަފުތާއެވެ. ނަމަވެސް ޒިދާން ބުނީ އަނިޔާގެ ސަބަބުން ހަޒާޑް އޮޕަރޭޝަނެއް ކުރަން ޖެހިދާނެ ކަމަށާއި، އޭނާ އަށް އިނގޭކަމަކީ އަނިޔާގެ ސަބަބުން ހަޒާޑަށް މުހިންމު މެޗުތަކެއް ގެއްލޭނެ ކަމަށެވެ. އަދި މި ސީޒަނުގައި ކުރިޔަށް ހުރި މެޗުތަކުގައި ހަޒާޑަށް ނުކުޅެވިދާނެ ކަމަށެވެ.

އަނިޔާގެ ސަބަބުން ހަޒާޑް ކުޅުމާއި ދުރަށް ދާން ޖެހުނުއިރު އޭނާ ތިން މަސް ދުވަހު ކުޅުމާއި ދުރަށް ދިޔުމަށްފަހު އެނބުރި ކުޅުމުގެ ތެރެއަށް އައިތާ އަދި ހަފުތާއެއް ވެސް ނުވެއެވެ. ރެއާލުން ބުނީ ހަޒާޑްގެ އަނިޔާއާއި ގުޅިގެން އޭނާގެ ރިކަވަރީ މަސައްކަތް މިހާރު ފަށާފައިވާކަމަށެވެ.

ޗެލްސީގައި ތަފާތު މޮޅު ކުޅުމެއް ދައްކަމުން އައި ހަޒާޑަށް މި ސީޒަނުގައި އޭނާގެ އެންމެ މޮޅު ކުޅުން ނުދެއްކެނީ އަނިޔާގެ ސަބަބުންނެވެ. ރެއާލްގެ ކޯޗު ޒިނެދިން ޒިދާންގެ ގޭމް ޕްލޭންގައި މުހިންމު ދައުރެއް އަދާކުރާ ހަޒާޑް މި ސީޒަނުގައި ރެއާލްއަށް ކުޅެފައިވަނީ އެންމެ 15 މެޗެވެ. ހަޒާޑް ކަކުލު ހުޅަށް މިފަހަރު ލިބުނު އަނިޔާއަކީ އޭނާ ޗެލްސީގައި ހޭދަކުރި ދުވަސްވަރު ވެސް ފަރުވާ ހޯދަން ޖެހުނު އަނިޔާއެކެވެ.

ރެއާލުން ޗެމްޕިއަންސް ލީގުގެ ގަދަ 16 ގައި ބުދަ ދުވަހުގެރޭ ކުޅެނީ ސިޓީ އާއި ދެކޮޅަށެވެ. މި މެޗަށް ރެއާލް ނުކުންނައިރު އެޓީމު އޮތީ މެޗަށް ވަރަށް ރަނގަޅަށް ތައްޔާރުވެފައި ކަމަށާއި މެޗަށް ރެއާލުން ނުކުންނާނީ މެޗުން މޮޅުވެ ކުއާޓަރއަށް ދަތުރުކުރުމުގެ ޢަޒުމުގައި ކަމަށް ޒިދާން ބުންޏެވެ.

މި ސީޒަނުގެ ކޮޕަ ޑެލް ރޭ އިން ކަޓާފައިވާ ރެއާލުން މިހާރު މަސައްކަތް ކުރަމުން އަންނަނީ ސްޕެނިޝް ލީގުގެ ތަށްޓަށާއި ޗެމްޕިއަންސް ލީގު ތަށްޓަށެވެ. ދެން ރެއާލުން އެންމެ އަވަހަށް ކުޅެން ޖެހޭނީ ޕެޕް ގާޑިއޯލާގެ މެންޗެސްޓަރ ސިޓީއާއި ދެކޮޅަށެވެ.