ކޮވިޑް-19: ޔޫއޭއީއާ އިރާނާ ދެމެދު ދަތުރުކުރާ ފްލައިޓްތައް ވަގުތީ ގޮތުން މެދު ކަނޑާލައިފި

މިދިޔަ އަހަރުގެ ފަހުކޮޅު ޗައިނާއިން ފެތުރެން ފެށި ކޮވިޑް-19 ވައިރަސް އިރާނުން ފެނުމާއި ގުޅިގެން އެކުވެރި އަރަބި އިމާރާތް (ޔޫއޭއީ) އިން އިރާނަށް ދަތުރުކުރާ ފްލައިޓްތައް ވަގުތީ ގޮތުން މެދު ކަނޑާލައިފިއެވެ.

އިރާނަށް ކުރާ ދަތުރުތައް ހުއްޓާލިކަން، ޔޫއޭއީގެ ދައުލަތުގެ ނޫސް އެޖެންސީއެއް ކަމަށްވާ އެމިރޭޓް ނިއުސް އެޖެންސީ (ޑަބްލިއުއޭއެމް) މެދުވެރިކޮށް ޖެނެރަލް ސިވިލް އޭވިއޭޝަން އޮތޯރިޓީ އިއުލާންކުރީ، ދުނިޔޭގެ އެންމެ ބާރުބޮޑު އެއް އެއަރޕޯޓް ކަމަށްވާ ދުބާއީ އިންޓަނޭޝަނަލް އެއަރޕޯޓުގެ ދަތުރުތަކަށް ބަދަލުތަކެއް ގެނެސްފައިވާކަން އިޢުލާން ކުރިތާ މާގިނަ އިރުތަކެއް ނުވަނީސްއެވެ.

އެ އޮތޯރިޓީން ބުނީ، ޔޫއޭއީއާ އިރާނާ ދެމެދު ދަތުރުކުރާ ސީދާ ފްލައިޓްތައް ހަފުތާއެއް ވަންދެން ހުއްޓާލާފައިވާ ކަމަށެވެ. އަދި އެ މުއްދަތު އިތުރު ކުރުން އެކަށީގެންވާ ކަމަށް ސިވިލް އޭވިއޭޝަނުން ބުންޏެވެ.

ޔޫއޭއީގެ އެ ނިންމުމަކީ ކޮވިޑް-19 ފެތުރުން ހުއްޓުވުމުގެ ގޮތުން އެޅި ފިޔަވަޅެއް ކަމަށް އެ ޤައުމުން ބުންޏެވެެ. ޔޫއޭއީން އިރާނަށްކުރާ ދަތުރުތަށް ވަގުތީ ގޮތުން މަޑުޖައްސާލަން އެ ގައުމުން ނިންމާފައިވަނީ، ޔޫއޭއީގެ ދުބާއީ އަދި ޝާރްޖާއިން އެ ގައުމަށް ދަތުރުކުރާ ފްލައިޓްތައް ހުއްޓާލާނެކަން އިއުލާން ކޮށްފައިވަނިކޮށެވެ.

ދުނިޔޭގެ އެކި ކަންކޮޅުތަކުގައި ފެތުރެމުންދާ ކޮވިޑް-19 ވައިރަސް ޖެހިގެން މިހާތަނަށް 2،698 މީހަކު ވަނީ މަރުވެފައެވެ.