އަފްޣާނިސްތާނު މައްސަލައިގައި ޕާކިސްތާނާ އެމެރިކާއާ ދެމެދު އިތުބާރު ނުކުރެވުމުގެ މައްސަލަ އެބަ އޮތް: ޕާކިސްތާން

އަފްޣާނިސްތާނު ހަނގުރާމައިގެ މައްސަލައިގައި ޕާކިސްތާނާއި އެމެރިކާއާ ދެމެދު އިތުބާރު ނުކުރެވުމުގެ މައްސަލަ އެބަ އޮތް ކަމަށް ޕާކިސްތާނުގެ ޚާރިޖީ ވަޒީރު ޚަވަޖާ އާސިފް ބީބީސީގައި ވިދާޅުވެއްޖެއެވެ.

މިނިސްޓަރ އާސިފް މިހެން ވިދާޅުވީ އެމެރިކާގެ ސެކްރެޓަރީ އޮފް ސްޓޭޓް ރެކްސް ޓިލަރސަންއާ ބައްދަލުކުރެއްވުމަށްފަހުއެވެ.

ޓިލަރސަން އަކީ ތާލިބާނުންނަށް "އަމާން ސުވަރުގެ" އެއް ފަދަ ތަނަކަށް ޕާކިސްތާނު ހަދާފައިވާކަމަށް ރައީސް ޓްރަމްޕް ވިދާޅުވި ފަހުން ޕާކިސްތާނަށް ވަޑައިގަންނަވާ އެމެރިކާގެ އެންމެ އިސް ޑިޕްލޮމޭޓެވެ.

ޓިލަރސަން ވަނީ ޕާކިސްތާނުގެ ސަރަހައްދީ އިމުން ޓެރެރިސްޓް ޖަމާއަތްތައް ފޮހެލުމަށް އިތުރު މަސައްކަތްތައް ކުރުމަށް ރައީސް ޓްރަމްޕް ގޮވާލައްވާ ގޮވާލެއްވުން ތަކުރާރުކު ކުރައްވާފައެވެ. ނަމަވެސް މިނިސްޓަރ އާސިފްވަނީ ޕާކިސްތާނުގައި ޓެރެރިސްޓުންނަށް"އަމާން ސުވަރުގެ" ތަކެއް ނުވާނެކަމަށް ތަކުރާރުކޮށް ވިދާޅުވެފައެވެ.

"އެމީހުން މިގައުމަކުން އިތުރު ސަރަހައްދެއް ބޭނުމެއް ނުވާނެ.އަފްޣާނިސްތާނުގެ 40 އަކަށް ޕަސެންޓްގެ ސީދާ ކޮންޓްރޯލް އެ އޮތީ ތާލިބާނުންއަތުގަ"

އެމެރިކާގެ އަސްކަރިއްޔާގެ މަސްދަރުތަކުން ބުނާ ގޮތުގައި ތާލިބާނުންގެ އަތުގައި އޮތީ އަފްޣާނިސްތާނުގެ ސަރަހައްދީ އިމުގެ 10 ޕަސެންޓެވެ. އަދި 30 ޕަސެންޓް ސަރަހައްދެއް ހޯދުމަށް އެމީހުން ދަނީ މަސައްކަތްކުރަމުންނެވެ.

އެމެރިކާއާއި އަފްޣާނިސްތާނުގެ އޮފިޝަލުން ގަބޫލު ކުރައްވާ ގޮތުގައި އަފްޣާނިސްތާނުގެ އެކި ކަންކޮޅުތަކުގައި ހަމަލާ ދިނުމަށް ރޭވުމަށްޓަކައި ހަނގުރާމަވެރިންނަށް ޕާކިސްތާން-އަފްޣާނިސްތާނުގެ ސަރަހައްދީ ރޮނގު ވެފައިވަނީ އަމާންތަނަކަށެވެ.

ބައެއް ފަރާތްތަކުން ތުހުމަތު ކޮށްފައިވާ ގޮތުގައި ޕާކިސްތާން އިންޓެލިޖެންސް ސަރވިސްގެ ބައެއް ފަރާތްތަކުންވެސް އަފްޣާނިސްތާގެ ހަނގުރާމަވެރިންނާ ގުޅުން އޮވެއެވެ. މިނިސްޓަރ އާސިފް ވަނީ މި ހަނގުރާމަ ނިމުމަކަށް ގެނައުމަށް އެމެރިކާއާއި ބައިނަލްއަގްވާމީ މުޖުތަމައުގެ ގާބިލްކަން ނެތިފައިވާކަމަށް ވިދާޅުވެފައެވެ.

ތާލިބާނުންނާ ދެކޮޅަށް އެގައުމުން އެކަށީގެންވާ މަސައްކަތެއް ނުކުރާނަމަ އެމެރިކާއިން އެގައުމަށް އިގްތިސާދީ ދަތި ކުރުމުގެ ފިޔަވަޅު އެޅުމުގެ ފުރުސަތު އޮތް ކަމަށް ބުނާ ބުނުން އޭނާ ވަނީ ދޮގުކުރައްވާފައެވެ.

ޕާކިސްތާނަށް އެމެރިކާގެ ފަރާތުން އިގްތިސާދީ ގޮތުން ލިބެނީ "ތިއްކެއް" ވަރުގެ އެހީތެރިކަމެއްކަމަށް އޭނާވަނީ ވިދާޅުވެފައެވެ.

"އަޅުގަނޑުމެންނަށް އެމީހުން ފަރާތުން އަސްކަރީ ހާޑްވެއަރ އެއް ނުލިބޭ.އަޅުގަނޑުމެން މިތިބީ ކުރިން އެމީހުންގެ ފަރާތުން އެކަން ކޮށްދިއިރު ތިބި ހެނެއް ނޫން"