މަނީ ލޯންޑަރިންގ އާއި ޓެރެރިޒަމަށް ފައިސާ ޚަރަދުކުރުމުގެ ނުރައްކާ އެންމެ ބޮޑު ގައުމުތަކުގެ ކުރީގައި އުޅެނީ އިރާނާއި އަފްޣާނިސްތާނާއި ގިނީ-ބިސާއު ކަމަށް ސްވިޒަލޭންޑްގެ ގްރޫޕަކުން ހެދި ދިރާސާއާއެއްގައި ބުނެފިއެވެ.

ޕަބްލިކް އަދި ޕްރައިވެޓް ސެކްޓަރގައި ކޮރަޕްޝަނާ ދެކޮޅަށް މަސައްކަތްކުރާ ބޭސްލް އިންސްޓިޓިއުޓް އޮފް ގަވަރނަންސް އިން މި މައުލޫމާތު ހާމަކޮށްފައިވަނީ ހުކުރު ދުވަހު އެ ގްރޫޕުން އާންމުކުރި އެންޓި މަނީ ލޯންޑަރިންގ އިންޑެކްސްގައެވެ. އެ ރިޕޯޓްގައި 146 ގައުމު ރޭންކް ކޮށްފައިވަނީ މަނީ ލޯންޑަރިންގ ކުރާކަމުގެ ބިރު އޮތް މިންވަރުގެ މައްޗަށް ބަލައިގެންނެވެ.

މި ރިޕޯޓަށް މައުލޫމާތު ނަގަނީ އާއްމުކޮށްފައި ހުން މައުލޫމާތުތަކުންނެވެ.

އިތުބާރުހުރި ފުރިހަމަ ތަފާސް ހިސާބު ލިބެން ނެތްނަމަ އޭއެމްއެލް އިންޑެކްސްގައި އެ ގައުމެއްގައި މަނީ ލޯންޑަރިންގ ހިންގާ މިންވަރެއް ނުވަތަ ވަގު ފައިސާ ގެންގުޅޭ މިންވަރެއް މިން ނުކުރެއެވެ. ނަމަވެސް ޓެރެރިޒަމަށް ފައިސާ ޚަރަދު ކުރުމާއި މަނީ ލޯންޑަރިންގެ ބިރު އޮތް މިންވަރު ވަޒަންކުރެއެވެ.

އެންމެ ފަހުގެ މި އިންޑެކްސްގައި އެންމެ ހާލަތު ގޯސްކޮށް އުޅެނީ ސަބްސަހާރަން އެފްރިކާއެވެ. މަނީ ލޯންޑަރިންގ ރިސްކް އެންމެ ބޮޑު 10 ގައުމުގެ ތެރޭގައި އެ ސަރަހައްދުގެ 5 ގައުމު ހިމެނެއެވެ.

ގަލްފް ސަރަހައްދަށް ބަލާއިރު ޔުނައިޓެޑް އަރަބް އެމިރޭޓްސް އޮތީ 72 ވަނައިގައެވެ.ބަހްރެއިން 81 ވަނައިގައި އޮތްއިރު ކުވެއިތު އޮތީ 90 ވަނައިގައެވެ. އަދި ސައުދީ އަރަބިއްޔާ އޮތީ 93ވަނައިގައެވެ.

އެ ސަރަހައްދަށްބަލާއިރު އެންމެ އެންމެ ރަނގަޅު ގައުމެއްގެ ގޮތުގައި ފާހަގަ ވަނީ ގަތަރެވެ.އެ ގައުމު އޮތީ 107 ވަނައިގައެވެ.

ކޮންމެ އަހަރަކު އާއްމުކުރަމުންދާ މި އިންޑެކްސްގެ ހަވަނަ އަހަރަށް އައިއިރު މި އިންޑެކްސްގައި އެންމެ ބޮޑު ކުރިއެރުމެއް ހޯދާފައިވަނީ ސޫދާނާއި ޓައިވާނެވެ.

މި ލިސްޓުގައި އެންމެ ރަނގަޅު ގައުމެއްގެ ގޮތުގައި ފިންލޭންޑް ހިމެނިފައިވާއިރު އޭގެ ފަހަތުން އުޅެނީ ލިތުއޭނިއާ،އެސްޓޯނިއާ އަދި ބަލްގޭރިއާއެވެ.