ގަތަރާ އެކު އޮންނަ ޑިޕްލޮމެޓިކް ގުޅުމާއި އަދި އެހެނިހެން ވެސް ބައެއް ގުޅުންތައް ކަނޑާލާފައިވާ ގައުމުތަކުގެ ނުރުހުމާ އެކު ގަތަރުން އިރާނާ އެކު އޮންނަ ޑިޕްލޮމެޓިކް ގުޅުން ބުރާސްފަތި ދުވަހު ފުރިހަމައަށް އަލުން ގާއިމުކޮށްފިއެވެ.
މިކަން ހާމަކޮށްފައި ވަނީ ގަތަރުގެ ފޮރިން މިނިސްޓްރީ އިން ނެރުނު ބަޔާނެއްގައެވެ.
ގަތަރުން ޓެރަރިޒަމަށް ހިތްވަރު ދޭ ކަމަށް ބުނެ ގަތަރާ އޮންނަ ޑިޕްލޮމިޓިކް ގުޅުން އަރަބި ހަ ގައުމަކުން ކަނޑާލީ ޖޫން މަހުގެ ތެރޭގައެވެ. އަދި ގަތަރާއި ޑިޕްލޮމެޓިކް ގުޅުން ކަނޑާލި ގައުމުތަކުގެ ތެރޭގައި ހިމެނޭ ސައުދީ، މިސްރު، ޔޫއޭއީ، އަދި ބަހްރައިން އިން ވަނީ ގަތަރާ އެކު އޮންނަ ގުޅުން، އެއްގަމު، ވައި، އަދި ކަނޑު މަގުން ވެސް ކަނޑާލާފައެވެ.
ގަތަރާއެކު އޮންނަ ޑިޕްލޮމެޓިކް ގުޅުން ކަނޑާލި ބައެއް ގައުމުތަައް ކަމަށްވާ ސައުދީ، ޔޫއޭއީ، ބަހްރައިން އަދި މިސްރުން ފަހުން ބުނެފައި ވަނީ ގަތަރަށް އެގައުތަކުން ކޮށްފައިވާ ފިއްތުންތަކަށް، އިރާނާއެކު އޮންނަ ގުޅުން ކަނޑާލައިފި ނަމަ، ލުޔެއް ދޭނެ ކަމަށެވެ.
ބައެއް އަރަބި ގައުމުތަކުން ގަތަރާ އެކު އޮންނަ ގުޅުން ކަނޑާލިޔަސް އިރާނުން ދަނީ އެކި ގޮތްގޮތުން ގަތަރަށް އެހީތެރިކަން ފޯރުކޮށްދެމުންނެވެ. އެގޮތުން އިރާނުން ވަނީ އެގައުމުގެ ވައިގެ ސަރަހައްދު ބޭނުން ކުރަން، ގަތަރުގެ ގައުމީ އެއާލައިން ކަމަށްވާ ގަތަރު އެއާވޭސް އަށް ފުރުސަތު ދީފައެވެ. އަދި ތަފާތު އެހީގެ ތަކެތީގެ ސަޕްލައި ގަތަރަށް ފޮނުވާފައެވެ.
ގަތަރުން އިރާނާއެކު އޮންނަ ޑިޕްލޮމެޓިކް ގުޅުން ގާއިމު ކުރުން ދޭހަވެގެން ދަނީ ސަރަހައްދީ އެކުވެރި ގައުމުތަކުން ކޮންމެ ފަދަ ފިއްތުންތަކެއް ކުރިމަތި ކުރިއަސް ގަަތަރުން ބޯނުލަނބާނެ ކަން ކަމަށް، މަސްރަހު ދިރާސާ ކުރައްވާ ފަރާތްތަކުން ބުނެއެވެ.
