ސައުތު އޭޝިއަން ޖޫނިއަރ ކެޑޭޓް މުބާރާތަށް އާ ކޯޗެއް ގެންނަނީ

މި އަހަރުގެ ޖޫން މަހު 15 އިން 20 ބަންގްލަދޭޝްގައި ބޭއްވުމަށް ހަމަޖެހިފައިވާ ސައުތު އޭޝިއަން ޖޫނިއަރ އެންޑް ކެޑޭޓް ޓޭބަލް ޓެނިސް ޗެމްޕިއަންޝިޕަށް އާ ކޯޗެއް ގެންނާނެ ކަމަށް ޓޭބަލް ޓެނިސް އެސޯސިއޭޝަންގެ ޖެނެރަލް ސެކެޓްރީ އިސްމާއިލް ޝުޖާއު ވިދާޅުވެއްޖެ އެވެ.

ރާއްޖެ ޓީވީގެ ކުޅިވަރު ފައިލް ޕޮރޮގްރާމްގައި ވާހަކަދައްކަމުން ޝުޖާ ވިދާޅުވީ ޓޭބަލް ޓެނިސް އެސޯސިއޭޝަނުން މިއަހަރަށް އެންމެ އިސްކަންދޭ މުބާރާތަކީ ސައުތު އޭޝިއަން ޖޫނިއަރ އެންޑް ކެޑޭޓް ޗެމްޕިއަންޝިޕް ކަމަށާއި، މި މުބާރާތައް ތައްޔާރުވުމުގެ ގޮތުން އަންނަ މަހު އާ ކޯޗެއް ގެނައުމަށް ހަމަޖެހިފައިވާ ކަމަށަވެ. އަދި މި މުބާރާތައް ތައްޔާރުވުމުގެ ގޮތުން ރާއްޖޭގެ އެންމެ އުންމީދީ ޓީޓީ ކުޅުންތެރިޔާ ފާތިމަތު ދީމާ މުބާރާތާއި ހަމައަށް ތައިލޭންޑްގައި ކޭމްޕް ކުރުމަށް ނިންމައިފައިވާ ކަމަށެވެ. މީގެ އިތުރުން ޝުޖާ ވިދާޅުވީ ރަފާއަށް ދިގުމުއްދަތަކަށް ޓްރެއިނިންގ އަށް ނުދެވުނީ އަމިއްލަ ސަބަބަކާއި ހުރެގެން ކަމަށެވެ.

ޝުޖާ އިތުރަށް ވިދާޅުވީ ރާއްޖޭގައި ޒުވާން ޓީޓީ ކުޅުންތެރިން އުފެދޭނެ ކަމުގެ ފެހި ސިގްނަލް ލިބެމުންދާ ކަމަށާއި އެކަން މިފެށޭ އިންޓަރ ސްކޫލް ޓީޓީ މުބާރާތުން ފެންނާނެ ކަމަށެވެ.

ޓީޓީއަށް އާ ކޯޗަކު ގެންނަން ނިންމީ ގިނަ ވަގުތު ކުޅުންތެރިންނަށް ފަރިތަކުރުންތައް ގެންދިޔުމަށް ކަމަށާއި ކޯޗުގެ ޒިންމާއަކަށްވާނީ ބަންގާޅުގައި އޮންނަ މުބާރާތަށް ޓީމު އެކުލަވައިލުން ކަމަށެވެ. އަދި މި މުބާރާތަށް ރާއްޖޭގެ ޓީމު ނުކުންނާނީ ރިހި މެޑަލް އަށް ޓާރގެޓް ކޮށްގެން ކަމަށް ސުޖާ ވިދާޅުވިއެވެ.

ރަފާ އާއި ދީމާ ވަނީ ނިމިދިޔަ އަހަރު އޮތް އިންޑިއަން އޯޝަން އައިލޭންޑް ގޭމްސްއިން ރަން މެޑަލް އަދި ރިހި މެޑަލް ހާސިލްކޮށްފައެވެ. މީގެ އިތުރުން ދީމާ ވަނީ ސައުތު އޭޝިއަން ހޯޕްސް މުބާރާތުން ރިހި މެޑަލް ހޯދައިފައެވެ. މީގެ އިތުރުން ދީމާ ވަނީ ނިމިދިޔަ ގައުމީ މުބާރާތުގެ ރަން މެޑަލް ހޯދައިފައެވެ.