ފާއިތުވި މަހު ރާއްޖޭގައި ބޭއްވުނު އޭވީސީ ސެންޓްރަލް ޒޯން ސީނިއާ މެންސް ވޮލީބޯޅަ މުބާރާތް ކުރިއަށް ގެންދިއުމުގައި އެއްވެސް ހައިސިއްޔަތަކުން ނުފޫޒު ފޯރުވާފައި ނުވާނެ ކަމަށް ވީއޭއެމްގެ ނައިބު ރައީސްގެ މަގާމުން ވަކިކުރި އިއްޒަތު ވަހީދު ވިދާޅުވެއްޖެ އެވެ.
ވީއޭއެމްގެ ނައިބު ރައީސް ކަމުގެ މަގާމުން އިއްޒަތު ވަހީދު ވަކިކުރިކަން އިއުލާން ކުރުމަށް ހޯމަ ދުވަހު ޒުވާނުންގެ މަރުކަޒުގެ ސެމިނާ ރޫމުގައި ބޭއްވި ނޫސްވެރިންގެ ބައްދަލުވުމެއްގައި އެއިދާރާގެ ޓެކްނިކަލް ޑިރެކްޓަރު އަދި ގައުމީ ވޮލީބޯޅަ ޓީމުގެ ކޯޗް މުހަންމަދު ޝަރަފް ވަނީ ސެންޓްރަލް ޒޯން ސީނިއާ މެންސް ވޮލީބޯޅަ މުބާރާތް ކުރިއަށް ގެންދިއުމުގައި އިއްޒަތު ވަހީދުގެ ފަރާތުން ގިނަ ގޮންޖެހުންކެއް ކުރިމަތިވި ކަމަށް ތުހުމަތުކޮށް ވާހަކަ ދައްކަވާފަ އެވެ.
ޝަރަފް ވިދާޅުވެފައި ވަނީ އެ މުބާރާތް ރާއްޖޭގައި ބޭއްވިޔަ ނުދިނުމަށް އިއްޒަތު އާއި ވީއޭއެމްގެ ކުރީގެ ރައީސް މުހަންމަދު ރިޔާޒް ގުޅިގެން ގިނަ މަސައްކަތްތަކެށް ކޮށްފައިވާ ކަމަށެވެ. އެގޮތުން އެ މުބާރާތް ރާއްޖޭގައި ބޭއްވޭނެ ކަމާމެދު ސުވާލު އުފެދޭ ވަރަށް ގޮންޖެހުންތަށް ކުރިމަތިވި ކަމަށް ޝަރަފް ވިދާޅުވި އެވެ.
މިކަމާ ގުޅިގެން ރާއްޖެއެމްވީ އަށް މައުލޫމާތު ދެއްވަމުން އިއްޒަތު ވިދާޅުވީ އެބުނާފަދަ އަމަލެއް ހިންގުމުގައި އޭނާގެ ދައުރެއް ނޯންނާނެ ކަމަށެވެ.
އިއްޒަތު ވިދާޅުވީ އޭވީސީއާ ގުޅިގެން މަސައްކަތްކުރީ ވޮލީ މުބާރާތް ހުއްޓުވަން ނޫން ކަމަށާއި މަސައްކަތް ކުރީ ވީއޭއެމްގެ ތެރޭގައި މިވަގުތު ހުރި މައްސަލަތައް ހައްލުކުރަން ކަމަށެވެ. އެގޮތުން އޭވީސީ އަދި މޯލްޑިވްސް އޮލިމްޕިކް ކޮމިޓީ (އެމްއޯސީ)ގައި މައްސަލަތަކަށް ހައްލު ހޯދައި ދިނުމަށް އެދިފައިވާނެ ކަމަށް އިއްޒަތު ވިދާޅުވި އެވެ.
އިއްޒަތު ވިދާޅުވީ މިއަދު އޭނާގެ އަގު ވެއްޓޭ ގޮތަށް ވީއޭއެމުން ދައްކަމުންދާ ވާހަކަތަކަކީ އެއްވެސް ވަރަކަށް ސާބިތު ނުހިފޭ ވާހަކަތަކެއް ކަމަށާއި އަދި އެކަން ކުއްވެރިކުރާ ކަމަށެވެ.
ހޯމަ ދުވަހު ބޭއްވި ވީއޭއެމްގެ ބައްދަލުވުމުގައި ޝަރަފް ވިދާޅުވީ ސެންޓްރަލް ޒޯން މުބާރާތް ރާއްޖޭގައި ބޭއްވިޔަ ނުދިނުމަށްޓަކާ އިއްޒަތު ވަހީދު އާއި މުހަންމަދު ރިޔާޒް ގުޅިގެން އޭވީސީއަށް ދޮގު ވާހަކަތަކެށް ހިއްސާކޮއްފައި ވުމުން އެ އެސޯސިއޭޝަނުން ރިޔާޒަށް ދެމުން އައި ސަޕޯޓް އަނބުރާ ގެނައުމަށްފަހު އެ ގޮނޑި މިހާރުގެ ރައީސް ލަތީފަށް ދެއްވުމަށް އޭވީސީގައި އެދިފައިވާ ކަމަށެވެ.
