އައިލެންޑް އޭވިއޭޝަނުން ބާކީ ނުދައްކައި އޮތީ 1 މިލިއަން ރުފިޔާ، އާ މެނޭޖްމަންޓުން އެއްބާރުލުން ލިބޭ: އިސްލާމިކް މިނިސްޓްރީ
ބާކީ ނުދައްކައި އޮތީ މި ފެބްރުއަރީ މަހު ދައްކަން ޖެހޭ 1 މިލިއަން ރުފިޔާ އެކަނި
އިސްލާމިކް މިނިސްޓްރީއަށް ނައިބު ރައީސް ވަޑައިގަތުން
2018 ވަނަ އަހަރުގެ އޯޑިޓް ރިޕޯޓުގައިވާފަދައިން އައިލެންޑް އޭވިއޭޝަން ސާވިސް ލިމިޓެޑުން އިސްލާމިކް މިނިސްޓްރީއަށް ދައްކަންޖެހޭ 6 މިލިއަން ރުފިޔާ ވެވުނު އެއްބަސްވުމެއްގެ ދަށުން ބަރާބަރަށް ދައްކަމުންއަންނަކަމަށާއި, ބާކީ ނުދައްކައި އޮތީ 1 މިލިއަން ރުފިޔާކަމަށް އިސްލާމިކް މިނިސްޓްރީން ބުނެފިއެވެ.
އިސްލާމިކް މިނިސްޓްރީން ބުނެފައިވަނީ، 2018 ވަނަ އަހަރުގެ އޯޑިޓް ރިޕޯޓުގައިވާފަދައިން އައިލެންޑް އޭވިއޭޝަން ސާވިސް ލިމިޓެޑުން އިސްލާމިކް މިނިސްޓްރީއަށް ދައްކަންޖެހޭ 6 މިލިއަން ރުފިޔާ އައިލެންޑް އޭވިއޭޝަން ސާވިސަސްގެ އާ މެނޭޖްމަންޓުން މިނިސްޓްރީއާއި އެކު ވާހަކަދައްކައިގެން އެއްބަސްވެވިފައިވާގޮތައް ދައްކަމުންދާކަމަށެވެ. މިހާރު ނުދެއްކި ވަނީ މި ފެބްރުއަރީ މަހު ދައްކަންޖެހޭ 1 މިލިއަން ރުފިޔާ އެކަނިކަމަށް އިސްލާމިކް މިނިސްޓްރީން ވަނީ ބުނެފައެވެ.
އޮޑިޓަރ ޖެނެރަލް އާދިއްތަ ދުވަހު އާންމުކުރެއްވި، މިނިސްޓްރީ އޮފް އިސްލާމިކް އެފެއާރޒްގެ 2018 ވަނަ އަހަރުގެ މާލީ އޮޑިޓް ރިޕޯޓުގައިވާގޮތުން، ދާރުލް އީމާން އިމާރާތުގެ 6 ފަންގިފިލާ ފަސް އަހަރު ދުވަހަށް އައިލެންޑް އޭވިއޭޝަން ސަރވިސަސް ލިމިޓެޑަށް ކުއްޔަށް ދިނުމަށް 16 ނޮވެމްބަރ 2016 ވަނަ ދުވަހު އެ މިނިސްޓްރީއާއި އެކު ސޮއި ކޮށްފައިވާ އެއްބަސްވުމުގައި ކުލީގެ ގޮތުގައި ޖުމުލަ 8,000,000 (އަށް މިލިއަން) ރުފިޔާ ދައްކަން ޖެހެއެވެ،
2016 ވަނަ އަހަރު އެއްބަސްވުމުގައި ސޮއިކޮށްފައިވާއިރު، އެއްބަސްވުމުގައި ސޮއި ކުރާ ދުވަހުން ފެށިގެން ތިން ދުވަސްތެރޭ މިނިސްޓްރީގެ މިސްކިތު ފަންޑަށް 6,000,000 (ހަ މިލިއަން ރުފިޔާ) ޖަމާ ކުރަންވާނެކަމަށާއި، ބާކީ 2,000,000 (ދެ މިލިއަން ރުފިޔާ) އެއްބަސްވުމުގައި ސޮއިކުރާ ތާރީޚުން ފެށިގެން އެއް މަސް ދުވަސް ތެރޭގައި އެ ފަންޑަށް ޖަމާކުރަންވާނެކަމަށް ބަޔާންކޮށްފައިވެއެވެ. އައިލެންޑް އޭވިއޭޝަނުން މިގޮތަށް ކަންތައް ކޮށްފައި ނުވާއިރު، ނިމިދިޔަ ރައީސް ޔާމީންގެ ދައުރުގައި އިސްލާމިކް މިނިސްޓަރ ޑރ ޒިޔާދު ބާގިރުގެ ބެލުމުގެ ދަށުގައި މިނިސްޓްރީ ހުރި އިރު، އައިލެންޑް އޭވިއޭޝަނުން ވެވުނު އެއްބަސްވުމާއި އެއްގޮތަށް 31 ޑިސެމްބަރު 2018 ވީއިރުވެސް ފައިސާ ދައްކާފައިނުވެއެވެ.
2019 ވަނަ އަހަރުގެ އޮގަސްޓް މަހުގެ ތެރޭގައި އައިލެންޑް އޭވިއޭޝަނުން މިނިސްޓްރީއަށް ލިބެންޖެހޭ ފައިސާ ހޯދުމަށް ދެ ފަރާތުން މަޝްވަރާކޮށް ސެޕްޓެމްބަރ 2019 އިން ފެށިގެން ހަ މަސްދުވަހަށް ބަހާލައިގެން ކޮންމެ މަހަކު 1,000,000 (އެއް މިލިއަން ރުފިޔާ) މިނިސްޓްރީއަށް ދެއްކުމަށެވެ އެއްބަސްވެފައިވާއިރު އިސްލާމިކް މިނިސްޓްރީން ހާމަކުރި މައުލޫމާތާއި އެކީ އައު މެނޭޖްމަންޓާއި މިނިސްޓްރީއާއި ވެވުނު އެއްބަސްވުމުގެ ދަށުން، ބާކީ ނުދައްކައި އޮތީ މި ހިނގާ ފެބްރުއަރީ މަހުގެ އެއް މިލިއަން ރުފިޔާއެވެ.
