ދިރިއުޅުމަށްޓަކައި ގޯތިގެދޮރު ކުއްޔަށްދިނުމާބެހޭ ބިލުން ދެފަރާތައްވެސް ހައްގުތަކެއް ކަށަވަރުވޭ: ނާޒިލް
ކުލީގެ މައްސަލަތައް އެންމެ ބޮޑީ މާލޭގައި
ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ މެމްބަރު އިބްރާހީމް ނާޒިލް
ދިރިއުޅުމަށްޓަކައި ގޯތިގެދޮރު ކުއްޔަށްދިނުމާބެހޭ ބިލުން ކުއްޔަށް ދޭ ފަރާތާއި ކުއްޔަށް ހިފާ ފަރާތުގެ ހައްގުތަކެއް ކަށަވަރުކޮށްދޭ ކަމަށް ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް ވިދާޅުވެއްޖެ އެވެ.
ސަރުކާރުގެ ފަރާތުން، މުލަކު ދާއިރާގެ މެންބަރު އިބްރާހީމް ނަޞީރު ހުށަހަޅުއްވާފައިވާ، ދިރިއުޅުމަށްޓަކައި ގޯތިގެދޮރު ކުއްޔަށްދިނުމާބެހޭ ބިލަށް ބަހުޘް ކުރައްވަމުން، ޢިމާރާތް ކުރުމުގެ ދާއިރާގައިވެސް މަސައްކަތް ކުރައްވާ ނާޒިލް ވިދާޅުވީ، މިބިލުން ކުށްޔަށް ދޭ ތަންތަނުގައި ހުންނަޖެހޭ އަސާސީ މިންގަނޑުތައް ވަރަށް ފުރިހަމައަށް ބަޔާން ކޮށްދީފައިވާ ކަމަށެވެ.
މީގެއިތުރުން ނާޒިލް ވިދާޅުވީ، ސިޓީއެއްނަމަ، ސިޓީ ކައުންސިލް، ރަށެއް ނަމަ ރަށު ކައުންސިލް ދަފުތަރެއް އެކުލެވި، އެދަފްތަރު ކުރެވިގެން ނޫން ގޮތަކަށް ކުށްޔަށް ނުދެވޭނެ ކަމަށް އެބިލުގައި ބުނެފައިވާ ކަމަށެވެ.
ނާޒިލް ވިދާޅުވީ، ދިރިއުޅޭ ތަންތަނުގެ ކުލީގެ މައްސަލައަކީ ޒަމާންތަކެއް ވަންދެން ދިވެހި ރައްޔިތުން ހައްލެއް ބޭނުންވެގެން އުޅުނު ކަމެއް ކަމަށެވެ. އެގޮތުން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ސަރުކާރުން ގާނޫނެއްގެ ސިފަ ގެނެސްދިނުމަށް މިބިލު މަޖިލީހަށް ހުށަހަޅުއްވާފައިވާތީ އުފާ ކުރައްވާ ކަމަށެވެ.
ނާޒިލް ވިދާޅުވީ ސަރުކާރުގެ ފަރާތުން ހުށަހަޅާފައިވާ މިބިލުގެ ސަބަބުން ކުށްޔަށް ހިފާ ފަރާތާއި ކުށްޔަށް ދޭ ފަރާތައް ބޭނުންވާނެ ކިތަންމެކަމެއް މިބިލު ގާނޫނަކަށް ވެގެން އަންނައިރު ޔަގީން ކޮށްދޭނެ ކަމަށެވެ.
ނާޒިމް ވިދާޅުވީ މި ބިލު ކޮމެޓީން ދިރާސާ ކުރަމުންދާއިރު، އިތުރަށް ރަނގަޅުކުރަންޖެހޭ ކަންކަން ވަރަށް ރަނގަޅަށް ބަަލައި، ދިރާސާކުރަން ޖެހޭ ކަމަށެވެ.
ދިރިއުޅުމަށް ކުށްޔަށް ދޭ ތަންތަކުގެ މައްސަލަތަކާއި ކުލީގެ މައްސަލަތަކައް ހައްލެއް ގެނައުމަކީ އާންމު ރައްޔިތުން ވަރަށް ބޮޑަށް ބޭނުންވެ، އެވާހަކަތައް އަބަދުވެސް ދައްކަމުންދާ އަދި ހައްލުނުވެ އޮތް މައްސަލަ އެކެެވެ. ޚާއްޞަކޮށް މާލޭގައި ދިރިއުޅޭ ރައްޔިތުންގެ ކަންބޮޑުވުން އިންތިހާއަށް އޮތްއިރު، މާލޭގައި ދިރިއުޅޭ 60 އިންސައްތަ މީހުން ދިރިއުޅެނީ ކުށްޔަށް ކަމަށް ވެއެވެ.
