ސިއްހީ ކުއްލި ނުރައްކަލުގެ ބިލުން އެއްހަމައެއްގައި ސިއްހީ ހިދުމަތްތައް ކަށަވަރުކޮށް ނުދޭ: ޓްރާންސްޕޭރެންސީ

އާއްމު ސިއްހަތުގެ ކުއްލި ނުރައްކަލުގެ ބިލު 2020ން ހުރިހާ ފަރާތްތަކަށް ފަސޭހަކަމާއިއެކު އެއްހަމައެއްގައި ސިއްހީ ހިދުމަތްތައް ކަށަވަރުކޮށް ނުދެވޭނެ ކަމަށް ބުނެ ޓްރާންސްޕޭރެންސީ މޯލްޑިވްސް އިން ކަންބޮޑުވުން ފާޅުކޮށްފިއެވެ.

މިކަމާއި ގުޅޭގޮތުން ޓްރާންސްޕޭރެންސީން ނެރިފައިވާ ބަޔާނެއްގައި ބުނެފައިވަނީ އެ ޖަމިއްޔާއިން ގަބޫލުކުރާގޮތުގައި، އެކަށީގެންވާ އަދި އަތްފޯރާ ފަށުގައި ސިއްހީ ހިދުމަތްތަކަށް ވާސިލުވުމުގެ ހައްގުން، އެއްވެސް އިރެއްގައި ހާއްސަކޮށް މިފަދަ ސިއްހީ ބަލިމަޑުކަމެއްގެ ދުވަސްވަރު، އެކަކުވެސް މަހުރޫމުކޮށްގެން ނުވާނެ ކަމަށެވެ.

އެގޮތުން މިހާރު މަޖިލީހުގެ ތަޅުމުގައި ބަހުސްކުރެވެމުންދާ އާއްމު ސިއްހަތުގެ ކުއްލި ނުރައްކަލުގެ ބިލު 2020 ގެ 12 ވަނަ މާއްދާ މިހާރު އޮތްގޮތުން، ދިވެހިންނާ ކައިވެނިކޮށްގެން ރާއްޖޭގައި އުޅޭ ބިދޭސީންނަށް ލިބިދެވޭ ސިއްހީ ވަސީލަތްތައް ލިބޭނެ ގޮތާއި ހަރަދު ހަމަޖެހޭނެ ގޮތް ބަޔާންވެފައި ނުވާތީ ޓްރާންސްޕޭރެންސީން ވަނީ ކަންބޮޑުވުން ފާޅުކޮށްފައެވެ.

އާއްމު ސިއްހަތުގެ ކުއްލި ނުރައްކަލުގެ ބިލު 2020 ގެ 12 ވަނަ މާއްދާގެ (ނ) މިހާރު އޮތްގޮތުން ލިޔެކިޔުންނެތް ބިދޭސީ މަސައްކަތްތެރިންގެ ތެރެއިން ގިނަބަޔަކު ވަނީ، ސިއްހީ ކުއްލި ނުރައްކަލުގެ ހާލަތްތަކުގައި އެކަށޭނެ ސިއްހީ ހިދުމަތް ލިބޭނެގޮތުން މަހުރޫމު ކުރެވިފައިކަމުން ޓްރާންސްޕޭރެންސީން ބަޔާނުގައި ވެއެވެ. އަދި އެންމެނަށްވެސް އިނގޭ އެއް ހަގީގަތަކީ ދައުލަތުގެ ބެލުމުގެ ދަށުގައި ތިބީ ލިޔެކިޔުން ނެތް ބިދޭސީ މަސައްކަތްތެރިންގެ ތެރެއިން ނިސްބަތުން ވަރަށް މަދު ބައެއް ކަމަށެވެ. ލިޔެކިޔުން ނެތް އެންމެހާ ބިދޭސީ މަސައްކަތްތެރިންނަށް ވެސް ސިއްހީ ފަރުވާ ލިބޭނެގޮތަށް މިބިލް ބަދަލުކުރުމަށް ޓްރާންސްޕޭރެންސީން ވަނީ ހުށަހަޅާފައެވެ.

މީގެއިތުރުން، އާއްމު ސިއްހަތުގެ ކުއްލި ނުރައްކަލުގެ ބިލު 2020 ގެ 12 ވަނަ މާއްދާގެ (ނ) އަށް ބައެއް އިތުރުކުރުމަށްވެސް ޓްރާންސްޕޭރެންސީން ވަނީ ހުށަހަޅާފައިވެއެވެ. އެއީ ކުންފުނިތަކުގައާއި، ވަކި ވަކި މީހުންގެ ހަވާލުގައި ރެޖިސްޓަރ ވެފައިވާ އެންމެހާ ބިދޭސީ މަސައްކަތްތެރިންނަށް އެކަށީގެންވާ ސިއްހީ ހިދުމަތްތައް ލިބޭނެގޮތް ކަށަވަރުވެފައިވޭތޯ، ސަރުކާރުން އިސްނަގައިގެން ބަލާ އެކަން ރަނގަޅަށް ވިލަރެސްކުރުމެވެ. އަދި ރާއްޖޭގައި އުޅޭ އެންމެނަށް އެކަށީގެންވާ ސިއްހީ ހިދުމަތް ފޯރުކޮށްދެވޭކަން ކަށަވަރުކުރުމަކީ ދައުލަތުގެ ޒިންމާއެއް ކަމަށް ބުނެފައިވެއެވެ.