ކޮވިޑް-19 އާ ގުޅިގެން ސަރުކާރުން ހުށައެޅި ބިލުން ޝަރުއީ އިޖުރާއަތުތަކަށް ލުއިތަކެއް!
1 ޖޫން 2020 | ހޯމަ 13:37ކޯޓުތަކުގެ ޝަރީއަތްތައް ހިންގުމުގެ ބައެއް އުސޫލުތަކަށް ބަދަލު ގެނައުމަށް ހުށައަޅާފައިވޭ
ޕީޖީ އޮފީހުން ކޯޓުތަކާ ގުޅިގެން ވީޑިއޯ ކޮންފަރެންސްކޮށް އަޑުއެހުންތައް ކުރިއަށް ގެންދަނީ- އަޑުއެހުންތައް ބޭއްވޭނެ އުސޫލުތައް ކަނޑައެޅުމަށް ބިލުގައި ވަނީ ހުށައަޅާފައި
ކޮވިޑް-19 އާ ގުޅިގެން އެޓަރނީ ޖެނެރަލް އޮފީހުން ރައްޔިތުންގެ މަޖިލީހަށް ހުށައަޅާފައިވާ ބިލުގައި ޝަރުއީ އިޖުރާއަތުތަކަށް ބޮޑެތި ލުއިތަކެއެ ހުށައަޅުއްވައިފި އެވެ.
ކޮވިޑް-19 އާގުޅޭ ޚާއްޞަ ބިލެއް ހުކުރު ދުވަހު އެޓަރނީ ޖެނެރަލް އޮފީހުން ރައްޔިތުންގެ މަޖިލީހަށް ހުށައަޅާފައި ވާއިރު، ބިލުގެ 8 ވަނަ ބާބުގައި ވަނީ ދައުލަތުގެ ހިންގުމާ ގުޅޭ ޚާއްސަ އުސޫލުތަކެއް ބަޔާންކޮށްފަ އެވެ. އެގޮތުން ދައުލަތުގެ ކަމާބެހޭ ފަރާތެއްގެ ހާޒިރުގައި ކުރުމަށް ޤާނޫނުން ލާޒިމުކުރާ ކަންކަން ޤާނޫނުގައި ބުނެފައިވާ މުއްދަތުގައި އޯޑިއޯ ނުވަތަ ވީޑިއޯ ލިންކް މެދުވެރިކޮށް ކުރިއަށް ގެންދެވޭ ގޮތަށް ބިލުގައި ހުށައަޅުއްވާފައިވެ އެވެ. އަދި އެކަންކަން ހަމަޖައްސާނީ ކަމާބެހޭ ދައުލަތުގެ އިދާރާއިން ޢާންމުކޮށް ޝާއިއުކުރާ އިޖުރާއަތުގައި ބަޔާންކޮށްފައިވާ ގޮތަށް ކަމަށް ބުނެފައި ވެއެވެ.
"ޢާންމު ޞިއްޙަތުގެ ކުއްލި ނުރައްކަލުގެ ބިލު 2020" ގެ ނަމުގައި އެކުލަވާލި މި ބިލުގައި ވަނީ ކޯޓުތަކުގެ ޝަރީއަތްތައް ހިންގުމުގެ ބައެއް އުސޫލުތަކަށް ވެސް ބަދަލު ގެނައުމަށް ހުށައަޅާފައެވެ. އެގޮތުން ޝަރީޢަތްތައް ޢާންމުކޮށް ހުޅުވާނުލައި ކުރިއަށް ގެންދެވޭނެ ޙާލަތްތައް މިހާރުވެސް ކަމާބެހޭ ޤާނޫނުތަކުގައި ބަޔާންކޮށްފައި ވާކަން ފާހަގަކޮށް ބިލުގައި ބުނެފައި ވަނީ، އޭގެ ތެރޭގައި ޢާންމު ސިއްޙަތުގެ ކުއްލި ނުރައްކަލުގެ ޙާލަތު ހިމެނިފައި ނުވާ ކަމަށެވެ. އެއާއެކު އެފަދަ ޙާލަތްތަކުގައި ޝަރީޢަތްތައް ޢާންމުކޮށް ހުޅުވާނުލައި ކުރިއަށް ގެންދެވޭނެ ކަމަށް ކަނޑައެޅުމަށް ބިލުގައި ހުށައަޅާފައި ވެއެވެ.
އޭގެ އިތުރުން، އޯޑިއޯ/ވީޑިއޯ ލިންކް މެދުވެރިކޮށް ޝަރީޢަތްތައް ހިންގުމަށް މަގުފަހި ކުރުމަށް ޤަވާއިދުތައް ހެދުމާއި، މައްސަލަތަކުގެ ޚަސްމުން ޝަރީޢަތްތަކަށް ހާޒިރު ކުރުމުގައި މިހާރު ޢަމަލު ކުރެވޭ އުޞޫލުތަކަށް ބަދަލު ގެނައުމުގެ ބާރު ކޯޓުތަކަށް ދިނުމަށްވެސް ވަނީ ހުށައަޅާފަ އެވެ. އަދި ކޯޓުތަކުގެ ހިންގުމުގެ ޝަރުއީ އިޖުރާޢަތުތަކަށް ލުއިތަކެއް ދިނުމުގެ ގޮތުން ނިންމުންތައް ނިންމުމާއި، އިލެކްޓްރޯނިކް ވަޞީލަތްތައް ބޭނުންކޮށްގެން މައްސަލަ ހުށައެޅުމާއި، ލިއެކިއުންތައް ޙަވާލު ކުރެވޭނެ ގޮތަށް ޤާނޫނުގެ ދަށުން ބަދަލުތައް ގެނައުމަށް ވަނީ ހުށައަޅާފައެވެ.
މި ބިލުގައި ވަނީ ކޯޓުތައް ހިންގާ އުޞޫލު ޓްރައިބިއުނަލް ތަކަށްވެސް ހިނގާ ގޮތަށް ހަމަޖެއްސުމަށްވެސް ހުށައަޅާފަ އެވެ.
ސަރުކާރުގެ ފަރާތުން މި ބިލު ރައްޔިތުންގެ މަޖިލީހަށް ހުށަހެޅުމުގެ އެއް ބޭނުމަކީ ދައުލަތް ހިންގުމުގެ ނިޒާމު މެދުކެނޑުމެއް ނެތި ކުރިއަށް ގެންދިޔުމަށް މަގުފަހިކުރުމަށް ކަމާބެހޭ ޤާނޫނުތަކުގައި ބަޔާންކުރާ އިޖުރާޢަތުތަކަށް ކޮންމެހެން ގެންނަންޖެހޭ ބަދަލުތައް ގެނައުން ކަމަށް އޭޖީ އޮފީހުން ބުނެ އެވެ.
