ޓެރަރިޒަމްގެ ބިލުން މިހާރުގެ ގާނޫނުން ނުލިބެނީ ކޮން ކަމެއްތޯ ސާފުވާން ޖެހޭ: އަލީ އާޒިމް

ސަރުކާރުގެ ފަރާތުން ރައްޔިތުންގެ މަޖިލީހަށް ހުށައަޅާފައިވާ ޓެރަރިޒަމް ހުއްޓުވުމުގެ ގާނޫނަށް އިސްލާހު ގެނައުމަށް ހުށައެޅި ބިލުން މިހާރު އޮތް ގާނޫނުން ނުލިބެނީ ކޮން ކަމެއްތޯ ސާފުވާން ޖެހޭ ކަމަށް ރައްޔިތުންގެ މަޖިލިހުގެ މެޖޯރިޓީ ލީޑަރު އަދި އެމްޑީޕީގެ ޕާލަމެންޓްރީ ގްރޫޕްގެ ލީޑަރު އަލީ އާޒިމް ވިދާޅުވެއްޖެއެވެ.

ސަރުކާރުގެ ފަރާތުން ހެންވޭރު ދެކުނު ދާއިރާގެ މެންބަރު ހުސައިން ޝަހީމް ހުށަހެޅުއްވި ބިލުގައި ފުލުހުންނަށް ބޮޑެތި ބާރުތަކެއް ވަނީ ލިބިދީފައެވެ. އެގޮތުން ޓެރަރިޒަމްގެ ކުށްތަކުގެ ތުހުމަތު ކުރެވޭ މީހުން ކޯޓު އަމުރެއް ނެތި ހައްޔަރުކޮށް މީހުން ބަންދުކޮށްފައި ވަނީ ގާނޫނީ ހަމަތަކުގެ މަތިންތޯ ކަނޑައެޅުމަށް އެ މީހަކު ހައްޔަރުކުރާތާ ގިނަވެގެން 48 ގަޑިއިރުގެ ތެރޭގައި ފަނޑިޔާރެއްގެ ކުރިމައްޗަށް ހާޒިރުކުރަން ވާނެ ކަމަށް ބިލުގައި ބުނެފައި ވެއެވެ.

އާޒިމް ރާއްޖެއެމްވީއަށް ވިދާޅުވީ އެމްޑީޕީގެ މަޖިލިސް މެމްބަރުންގެ މެދުގައާއި އެޕާޓީގެ ގައުމީ މަޖިލީހުގެ މެމްބަރުންގެ މެދުގައި ވެސް އެ ބިލާމެދު ޚިޔާލު ތަފާތުވުންތަކެއް އުޅޭ ކަމަށެވެ. އެގޮތުން ގާނޫނުން ލިބިދޭ އަސާސީ ހައްގުތައް ކުޑަ ކުރުމަށް އެއްވެސް މެމްބަރަކު ބޭނުންވެ ނުލައްވާ ކަމަށް ވިދާޅުވިއެވެ. އާޒިމް ވިދާޅުވީ ތުހުމަތުގައި ހައްޔަރު ކުރެވޭ ފަރާތް ހައްޔަރު ކުރުމަށްފަހު 48 ގަޑިއިރު ތެރޭގައި ފަނޑިޔާރެއްގެ ކުރިމައްޗަށް ގެންނަންޖެހެނީ ކީއްވެތޯ އާއި ކޯޓު އަމުރެއް ނެތި ތަންތަން ބަލައި ފާސްކުރެވޭ ގޮތަށް ބިލްގައި އޮތުމާއި އަސާސީ ހައްގުތައް ކުޑަކުރަން ނިންމި ސަބަބު ފުލުހުންނާއި ބަންޑާރަނައިބުގެ އޮފީހުން ސާފުކޮށްދޭން ޖެހޭ ކަމަށެވެ. އެހެންކަމުން ސަރުކާރާއި އެކު މަޝްވަރާ ކުރަން އެދިފައިވާނެ ކަމަށް ވިދާޅުވިއެވެ.

ބިލްގައި ބުނާ ޓެރަރިޒަމްގެ ކުށެއްގެ ތުހުމަތުކުރެވޭ މީހާގެ އަތުގައި، ކުށެއް ކުރުމަށް ބޭނުންކުރެވޭނެ އެއްޗެއް ނުވަތަ އެފަދަ ކުށެއްގެ ހެއްކެއްގެ ގޮތުގައި ބޭނުންކުރެވޭނެ އެއްޗެއް އޮތްކަމަށް އެކަށީގެންވާ ސަބަބުގެ މައްޗަށް ބިނާކޮށް ތުހުމަތުކުރެވޭ ނަމަ، ކޯޓު އަމުރަކާ ނުލައި އެފަދަ މީހެއް ބަލައި ފާސް ކުރުމުގެ ބާރު ފުލުހުންނަށް ލިބިގެންވެއެވެ.

ބަލައި ފާސްކުރާ މީހެއްގެ މައްޗަށް ތުހުމަތުކުރެވޭ ކުށާ ގުޅޭ އެއްޗެއް އޭނާގެ ހަށިގަނޑުގައި ފޮރުވާފައިވާ ކަމަށް ގަބޫލު ކުރުމުގައި އެކަށީގެންވާ ސަބަބެއް އޮތްނަމަ، ކޯޓު އަމުރަކާ ނުލައި އޭނާގެ ޖިންސީ ގުނަވަން ހާމަވާ ގޮތަށް ބަލައި ފާސްކުރުމުގެ އިޚްތިޔާރު ފުލުހުންނަށް ލިބިގެންވާ ކަމަށް ވެސް ބިލްގައި ބުނެފައިވެއެވެ.

ބިލްގައި ވަނީ ގާނޫނު އަސާސީން ކަށަވަރުކޮށްދީފައިވާ ހަނު ހުރުމުގެ ހައްގު އުނިކުރަން ހިމަނާފައެވެ.

އެގޮތުން މައްސަަލައިގައި ޝަރީޢަތަކަށް ހުށަހެޅިފައިވާ ހެކީގެ ބުރަދަނަށް ބަލާއިރު، ކުށެއް ކުރިކަމަށް އެކަށީގެންވާ މިންވަރަކަށް ޤަބޫލުކުރެވޭނަމަ، އޭނާ ހަނު ހުންނަ ހުރުމަކީ، އެކަމަށް އިތުރު ބާރު ލިބިދޭ ކަމެއް ކަމުގައި ބެލެވިދާނެ ކަމަށް ބިލްގައިވެއެވެ.

ސަރުކާރުގެ ފަރާތުން ޓެރަރިޒަމް ހުއްޓުވުމުގެ ގާނޫނަށް އިސްލާހު ގެންނަންް ހުށައެޅުމާއެކު ދައުރުން ބޭރުން ބުރާސްފަތި ދުވަހު ވަނީ ރައްޔިތުންގެ މަޖިލީހުގެ ޖަލްސާއެއް ބާއްވާފައެވެ. ބިލްގެ ފުރަތަމަ ކިޔުން ވަނީ އެޖަލްސާގައި އިއްވައިފަ އެވެ. އެބިލް ބަލައިގަތުމާމެދު ގޮތެއް ކަނޑައެޅުމަށްފަހު ބިލް ކުރިއަށްގެންދަން ބޭނުންވާނަމަ ކޮމިޓީއަށް ފޮނުވާނެއެވެ. އާޒިމް ވިދާޅުވީ ކޮމިޓީ މަރުހަލާގައި ބިލަށް ގެންނަން ބޭނުންވާ އިސްލާހު ކޮމިޓީގެ މެމްބަރުން ހުށައަޅުއްވާނެ ކަމަށެވެ.