ދިރިއުޅުމަށްޓަކައި ތަންތަން ކުއްޔަށްދިނުމަށް ވެވޭ އެއްބަސްވުން ރަޖިސްޓްރީކުރުން ލާޒިމުކުރަނީ
12 ފެބުރުއަރީ 2020 | ބުދަ 16:08އެއްވެސް ތަނެއްގައި 6 މަސް ދުވަހަށް ވުރެ ދިގު މުއްދަތަކަށް ދިރިއުޅުމަށްޓަކައި ކުއްޔަށްދެވޭނީ ލިޔުމުންވެވޭ އެއްބަސްވުމެއްގައި ސޮއިކުރުމަށްފަހު
ކުއްޔަށްދޭ ތަންތަނާއި ގުޅޭގޮތުން ވެވޭ އެއްބަސްވުމުގެ މައްސަލަތައް ގިނަ
ދިރިއުޅުމަށްޓަކައި ތަންތަން ކުއްޔަށްދޭ ފަރާތާއި, ކުއްޔަށް ހިފާ ފަރާތާއި ދެމެދު ވެވޭ އެއްބަސްވުން ރަޖިސްޓްރީކުރުން ލާޒިމުވާގޮތަށް ދިވެހިރާއްޖޭގައި ދިރިއުޅުމަށްޓަކައި ގޯތިގެދޮރު ކުއްޔަށްދިނުމާއި ބެހޭ އެންމެހާ ކަންކަން ހިމެނޭގޮތަށް ދިރިއުޅުމަށްޓަކައި ގޯތިގެދޮރު ކުއްޔަށްދިނުމާ ބެހޭ ބިލެއް ރައްޔިތުންގެ މަޖިލީހަށް ހުށަހަޅާ އެބިލުގެ ބަހުޘް ފަށައިފިއެވެ.
ބުދަ ދުވަހުގެ ޖަލްސާއަށް މިބިލު ސަރުކާރުގެ ފަރާތުން ހުށަހެޅުއްވީ މުލަކު ދާއިރާގެ މެންބަރ އިބްރާހީމް ނަސީރެވެ. މިބިލު ހުށަހަޅުއްވަމުން ނަސީރު ވިދާޅުވީ މިބިލު ޤާނޫނަކަށްވުމުން ރާއްޖޭގެ އެއްވެސް ތަނެއްގައި 6 މަސް ދުވަހަށް ވުރެ ދިގު މުއްދަތަކަށް ދިރިއުޅުމަށްޓަކައި ކުއްޔަށްދެވޭނީ މިބިލުގައި ބަޔާންކޮށްފައިވާ ގޮތުގެ މަތިން ކަމަށް ކުއްޔަށްދޭ ފަރާތާއި ކުއްޔަށް ހިފާފަރާތާއި ދެމެދު ލިޔުމުންވެވޭ އެއްބަސްވުމެއްގައި ސޮއިކުރުމަށްފަހު ކަމަށެވެ.
ބިލު ހުށަހަޅުއްވަމުން އިބްރާހީމް ނަސީރު ވިދާޅުވީ މިބިލު ހުށަހެޅުއްވުމުގެ ބޭނުމަކީ ދިވެހިރާއްޖޭގައި ދިރިއުޅުމަށްޓަކައި ގޯތިގެދޮރުކުއްޔަށް ދިނުމާ ގުޅިގެން ކުއްޔަށް ހިފާ ފަރާތް ކުއްޔަށްދޭ ފަރާތުގެ ޙައްޤުތައް ބަޔާންކުރުމާއި، ކުރީގެ މުޢާމަލާތަކާގުޅިގެން އުފެދޭ ދެބަސްވުންތަކާއި، ޝަކުވާތައް އަވަސް ގޮތެއްގައި ބަލާ ފިޔަވަޅު އެޅޭނެ ނިޒާމެއް ޤާއިމުކުރުން ކަމަށެވެ. މީގެއިތުރުން ދިރިއުޅުމަށްޓަކައި ކުއްޔަށްދޭ ތަންތަނުގައި ހުންނަންޖެހޭނެ އަސާސީ މިންގަނޑުތައް ބަޔާންކުރުމަކީވެސް މިބިލު ހުށަހެޅުމުގެ ބޭނުމެއްކަމަށް ނަސީރު ވިދާޅުވި އެވެ.
ބިލު ހުށަހަޅުއްވަމުން ނަސީރު ވިދާޅުވީ މިއީ މިހާރު ރާއްޖޭގައި އެންމެ ކަންބޮޑުވާ އެއް މައްސަލަކަމަށްވާ ގޯތިގެދޮރު ކުއްޔަށް ހިފާ ފަރާތާއި ކުއްޔަށްދޭ ފަރާތުގެ މަޞްލަޙަތު ޙިމާޔަތްކޮށްދޭނެ އެންމު މުހިންމު އެއް ކަންތައްކަމަށެވެ.
ކުއްޔަށްދޭ ތަންތަނުގައި ހުންނަންޖެހޭ އަސާސީ ކަންތައްތަކެއްވެސް މިބިލުގައި ބަޔާންކޮށްފައިވެ އެވެ. ބިލު ހުށަހަޅުއްވަމުން ނަސީރު ވިދާޅުވީ ފެނާއި ނަރުދަމާ އަދި ކަރަންޓުގެ ޚިދުމަތް ލިބުމުގެ ވަޞީލަތްތައް ދައުލަތުގެ ކަމާގުޅުން ހުރި އިދާރާތަކުން ކަނޑައަޅާފައިވާ މިންގަނޑަށް ކުއްޔަށް ދޭ ތަންތަނުގައި ޤާއިމުކޮށްފައި ހުންނަންޖެހޭނެ ކަަމަށެވެ. ކުއްޔަށްދޭ ތަނަކީ ޢިމާރާތެއް ނުވަތަ ޢިމާރާތެއްގެ ބައެއް ނަމަ އެތަނަކަށް އެހެން ޢިމާރާތެއްގެ ބައެއް ބޭނުން ކުރުމެއްނެތި އަދި އުނދަގޫ ކަމެއްނެތި ވަކިންވަދެވެ އުޅެވޭނެފަދަ އިންތިޒާމެއް ހަމަޖެހިފައި އޮންނަންވާނެ ކަަމަށެވެ.
މީގެއިތުރުން ކުއްޔަށްދޭ ތަނަކީ އިމާރާތެއް ނަމަ ޢިމާރާތްކުރުމުގެ ޤާނޫނުގައި ކަނޑައަޅާފައިވާ މިންގަނޑުތަކައް ފެތޭ އިމާރާތެއް ނުވަތަ އިމާރާތެއްގެ ބައެއް ކަމަށް ވާންޖެހޭ ކަމަށް ނަސީރު ވިދާޅުވިއެވެ. ކުއްޔަށްދޭ ތަނުގެ އަކަފޫޓްގެ ނިޞްބަތުން ގިންތިކުރެވި އެތަނެއްގެ ކުޑަބޮޑުމިން ބަލާ އެތަނެއްގައި އެންމެ ގިނައިން ދިރިއުޅެވޭ މީހުންގެ ޢަދަދެއް ކަނޑައެޅުމަށް ބިލުގައި ބަޔާންކޮށްފައިވާ ކަމަށް ނަސީރު ވިދާޅުވިއެވެ.
އަދި ކުއްޔަށްދޭ ތަނުގައި ކައިބޮއި ނިދާ ހެދުމުގެ އިންތިޒާމު ހަމަޖެހިފައި ހުންނަންވާނެކަަމަށް ބިލުގައި ބަޔާން ވެގެންވާކަމަށް ނަސީރު ވިދާޅުވިއެވެ.
މިބިލުގައި ޖުމުލަ 8 ބާބު އޮންނައިރު 75 މާއްދާ އެކުލެވެއެވެ.
