ފުނަދޫގައި ތުއްތު ކުއްޖަކު ގެނބިގެން މަރުވެއްޖެ
މިހާދިސާ ހިނގާފައިވަނީ ހުކުރު ދުވަހު ހަވީރު
ށ. ފުނަދޫ
ށ. ފުނަދޫގައި 1 އަހަރާއި 9 މަހުގެ ފިރިހެން ކުއްޖަކު ގެނބިގެން މަރުވެއްޖެއެވެ.
ރާއްޖެ އެމްވީއަށް މަޢުލޫމާތު ދެއްވަމުން ފުނަދޫ ކައުންސިލް މެންބަރު އަލީ ޚާލިދު ވިދާޅުވީ އެ ޙާދިސާ ހިނގީ ހުކުރު ދުވަހުގެ ހަވީރު 3:30 ހާއިރު ކަމަށެވެ.
މި ކުއްޖާ ދިރުއުޅެމުންދާ ގެއަކީ އަތިރިމަތީގައި ހުންނަ ގެއެއް ކަމަށާއި އެޙާދިސާ ހިނގާފައި ވަނީ މަންމަ ވުޟޫކުރަން ފާޚާނާއަށް ވަތް ވަގުތު ކަމަށް ޚާލިދު ވިދާޅުވިއެވެ.
ކުއްޖާ ފެންނަން ނެތުމުން ގޭގައި ތިބި އެހެން ކުދިން އެކުއްޖާގެ މަންމަ އަށް ގޮވިކަމަށާއި، ހޯދަމުން ދަނިކޮށް ކުއްޖާ ގެނބިފައި އޮތް ކަމަށް އެ ރަށު ކައުންސިލުން މަޢުލޫމާތު ދެއެވެ. އަދި މަގުމަތިން ދުއްވާފައި ދިޔަ ސައިކަލެއްގައި ހުއްޓުވާ އޭގައި، އެކުއްޖާ ވަގުތުން ހޮސްޕިޓަލަށް ގެންދިޔަކަމަށެވެ. އަދި ކުއްޖާ ބެލި ޑޮކްޓަރު އެކުއްޖާ މަރުވެފައިވާކަން ކަށަވަރުކޮށްދެއްވިކަމަށް ކައުންސިލުން މަޢުލޫމާތު ދެއެވެ.
