އޮޅުވެލި ރިސޯޓުގެ ވޯޓާވިލާއަކުން ވެއްޓި ޓޫރިސްޓަކު މަރުވެއްޖެ

އޮޅުވެލި ރިސޯޓްގައި ޗުއްޓީ ހޭދަކުރަމުން ދިޔަ ޓޫރިސްޓަކު އެ ރިސޯޓުގެ ވޯޓާވިލާއަކުން ވެއްޓި ކުއްލި ގޮތަކަށް މަރުވެއްޖެއެވެ.

ބުރާސަފަތި ދުވަހު "ރާއްޖެއެމްވީ"އަށް މައުލޫމާތު ދެއްވަމުން ފުލުހުންގެ މީޑިއާ އޮފިޝަލް ވިދާޅުވީ އޮޅުވެލި ރިސޯޓްގައި ވޯޓާ ވިލާއެއްގައި ހުރި ޓޫރިސްޓަކު ކުއްލި ގޮތަކަށް ވެއްޓި، މަރުވި ކަމުގެ މައުލޫމާތު ފުލުހުންނަށް ލިބިފައިވަނީ އަންގާރަ ދުވަހުގެ ރޭ 20:30 އެހާކަން ހާއިރު ކަމަށެވެ. އަދި އޭނާ ވަގުތުން ކ. ގުރައިދޫ ހޮސްޕިޓަލަށް ގެންދެވުނު ކަމަށް ވެސް ފުލުހުން ބުނެއެވެ.

ފުލުހުން ބުނީ މަރުވީ ޖަރުމަނު ވިލާތުގެ 55 އަހަރުގެ ފިރިހެނެއް ކަމަށެވެ.

އެނގިފައިވާ ގޮތުގައި އޭނާ މަރުވެފައިވަނީ ހާރޓް އެޓޭކެއް ޖެހިގެންނެވެ. އަދި ގުރައިދޫ ސިއްހީ މަރުކަޒަށް ގެންދިޔައިރު ވެސް އޭނާ މަރުވެފައިވާ ކަމަށް މައުލޫމާތު ލިބެ އެވެ. އަދި އޭނާއަށް ހާރޓް އެޓޭކެއް ޖެހިގެން ވެއްޓުނީ މޫދަށް ކަމަށާއި އެވަގުތު އޭނާގެ އަންހެނުން އޭނާ ސަލާމަތް ކުރުމަށް މޫދަށް ފުއްމާލި ކަމަށް ވެސް މައުލޫމާތު ލިބެ އެވެ.

މިވަގުތު އޭނާގެ ހަށިގަނޑު އޮތީ ގަލޮޅު ސަހަރާގެ މޯޗަރީގައި ބާއްވާފަ އެވެ.

އޮޅުވެލި ބީޗްރިސޯޓް އެންޑް ސްޕާއަކީ ސަރުކާރު ކޯލިޝަން އެމްޑީއޭގެ ލީޑަރ އަހުމަދު ސިޔާމު މުހައްމަދު (ސަން ސިޔާމް)ގެ ރިސޯޓެކެވެ.