ދުވަހުކުވެސް ވައްކަމެއް ނުކުރަން، އެހެން ކިޔަސް ބަޔަކު ގަބޫލެއް ނުކުރާނެ: ޔައުގޫބް
21 ފެބުރުއަރީ 2020 | ހުކުރު 07:28ރައްޔިތުންގެ މަޖިލީހުގައި މީހެއްގެ ދަށުވާ ޒާތުގެ އެއްވެސް ކަމެއް ނުކުރާނަން
ހެންވޭރު ދެކުނު ދާއިރާގެ މެންބަރު ހުސައިން ޝަހީމް (އަނދުން ހުސައިން) އަދި ދާންދޫ ދާއިރާގެ މެމްބަރު ޔައުގޫބް އަބްދުﷲ
"އަނގައެއް" އޮތިއްޔާ ކޮންމެ މީހަކަށްވެސް ތެޅުވިދާނެކަމަށާއި، ދުވަހަކުވެސް ވައްކަމެއް ނުކުރާނެކަމަށް ރައްޔިތުންގެ މަޖިލީހުގެ ދާންދޫ ދާއިރާގެ މެމްބަރު ޔައުގޫބް އަބްދުﷲ ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގުރާމްގައި މާލޭ ރައްޔިތުން ދިރިއުޅެނީ ޕަލަސްތީން ރައްޔިތުން އުޅޭފަދަ ހާލަތެއްގައި ކަމަށް ބުނެ އަތޮޅު ތެރޭ ރައްޔިތުން އިޒްރާއީލް މީހުންނާއި އެއްހަމައެއްގައި ސިފަ ކުރައްވާ ދެއްކެވި ވާހަކައަކާއި ގުޅިގެން އެދުވަސްވަރު ހެންވޭރު ދެކުނު ދާއިރާގެ މެންބަރު ހުސައިން ޝަހީމް (އަނދުން ހުސައިން) ބޮޑެތި ފާޑުކިޔުންތަކެއް ވަނީ އަމާޒުވެފައެވެ. އެ ވާހަކައަށް ރިއާޔަތްކޮށް މެމްބަރު ޔައުގޫބް ވަނީ އިސްރާއިލްގެ ނުބައި ނުލަފާ މީހުންނާއި އެއް ހަމަޔަކުން މި ރާއްޖޭގެ "ރާއްޖެ ތެރޭ މީހުން" މިނެކުރުމުން އެކަމާއި ލަދުވެތިވެ އަދި ކަންބޮޑުވެވަޑައިގަންނަވާކަމަށް ވިދާޅުވެފައެވެ.
މިކަމާއި ގުޅިގެން ދެއްކެވި ވާހަކަ ދިފާއު ކުރެއްވުމަށް ދެއްކެވި ވާހަކައެއްގައި ދާންދޫ ދާއިރާގެ މެންބަރު ޔައުގޫބު އަބްދުﷲ އަށް މެމްބަރު ޝަހީމް ވަނީ ކޮރަޕްޝަންގެ ތުހުމަތުު ކުރައްވައިފައެވެ. އެގޮތުން އަނދުން ހުސެއިން ކުރެއްވި ޓްވީޓުގައި ވިދާޅުވީ، ޔައުގޫބް ވަނީ މީގެ ކުރިން ސީޕްލޭން ޓާމިނަލް ވަކި ބަޔަކަށް ދޭން އުޅޭ ކަމަށް ވިދާޅުވެ ކަންބޮޑުވުން ފާޅުކުރައްވާފައި ކަމަށެވެ. ނަމަވެސް، ޔައުގޫބް މިހާރު ވަނީ "ކޮޅު ގޮހޮރަށް ކައިގެން" ކޮންމެ ކަމެއް ވެސް އޯކޭވެ، ބައެއްގެ ދަށު ވެފައިވާ ކަމަށާއި އެއީ ފެންވަރުކަމަށް ވިދާޅުވެފައެވެ.
އެ ތުހުމަތުތަކަށް ރައްދުދެއްވައި ރާއްޖެޓީވީގެ ފަލަސުރުހީ ޕްރޮގުރާމްގައި ވާހަކަ ދައްކަވަމުން މެމްބަރު ޔައުގޫބް ވިދާޅުވީ މީހަކަށް ކޮންމެ ފަދަ ވާހަކަ ދެއްކިދާނެކަމަށާއި ސީޕްލޭން ޓާރމިނަލް މައްސަލަ އެންމެ ފުރަތަމަ މަޖިލީހުގެ ސަމާލުކަމަށް ގެނައީވެސް އެބޭފުޅާކަމަށެވެ. އަދި އޭގެ ފަހުންވެސް ޓީއެމްއޭއަށް އެއްކޮށް ސީޕްލޭން ޓަރމިނަލް ދިނުމާއި ދެކޮޅަށް ވަކާލާތުކުރެއްވި އެކަކީ ތިމަންނާކަމަށް ޔައުގޫބް ވިދާޅުވިއެވެ.
މެމްބަރު ވިދާޅުވީ ރިޝްވަތުގައި ހިފިނަމަ، ޓީއެމްއާއި އެއްކޮޅަށް މައްސަލަ ނިންމެވުމަށް މަސައްކަތް ކުރާނެ ނޫންތޯ އޭ ވިދާޅުވެ ސުވާލު އުފައްދަވާފައެވެ. އިތުރަށް ޔައުގޫބް ވިދާޅުވީ، ދެކޮޅުނުޖެހޭ ވާހަކަ ދެއްކެވިއަސް ރައްޔިތުން އެކަމެއް ގަބޫލު ނުކުރާނެކަމަށެވެ.
ޔައުގޫބް ވިދާޅުވީ، އިންތިހާބަށް ކުރިމަތިލެއްވި އިރު ބަހުސްގައިވެސް ރައްޔިތުންނަށް ވަރަށް ސާފުކޮށް އެބޭފުޅާ އެފަދަ ކަމެއްގައި ނުޖެހޭނެކަން ވިދާޅުވެފައިވާނެކަމަށެވެ. އަދި މާލީ ބަޔާން ހާމަކުރިއިރު ފަސް މިލިއަން ރުފިޔާގެ އެޕާޓްމަންޓެއް ނަންމަތީގައި އޮތް ކަމަށެވެ. އަދި އެއީ އޭނާގެ ރައްޓިއްސަކު ދިން ހަދިޔާއެއް ކަމަށް ޔައުގޫބް ވިދާޅުވިއެވެ.
ނަމަވެސް، މެމްބަރުކަމަށް އިންތިހާބުވެވަޑައިގަތްތާ ހަފުތާއެއްގެ ތެރޭގައި އެޕާޓްމަންޓު ހަދިޔާ ކުރެއްވި ފަރާތަށް ޔައުގޫބް ވަނީ އަނބުރާ ރައްދުކޮށްފައެވެ. މިހެން އަމަލުކުރެއްވީ، އެޕާޓްމަންޓް ދީފައިވާ ފަރާތުގެ ނުފޫޒެއް އަތުވެދާނެ ހާލަތެއްގައި އެހެން ވިޔަނުދިނުމަށް ޔައުގޫބް ވިދާޅުވިއެވެ.
ރައްޔިތުންގެ މަޖިލީހުގައި ހުންނެވިހާ ދުވަހަކު، މީހެއްގެ ދަށުވާ ޒާތުގެ އެއްވެސް ކަމެއް ނުކުރާނެކަމަށާއި ރިޝްވަތު ދޭން އުޅެފިނަމަ އެ ފަރާތެއްގެ މައުލޫމާތު ކެރިގެން ހާމަކުރާނެކަމަށް މެމްބަރު ޔައުގޫބް ވަނީ ވިދާޅުވެފައެވެ.
