ފާޑު ކިޔަސް އުސޫލް ދުލެއް ނުކުރާނަން: ރައީސް ޔާމީން
ޖީއެމްއާރު އަތުން އެއާރޕޯޓް އަތުލުމުގައި އެންމެ ބޮޑު މަސައްކަތެއް ކުރީ ޕީޕީއެމް އިން ކަމަށް ރައީސް ޔާމީން ވިދާޅުވި
ރައީސް ޔާމީން
ސިޔާސީ އިސް ފަރާތްތަކަށް ލިބިގެންދާ އަދަބާބެހޭ ގޮތުން ފާޑު ކިޔުމަކީ، އެމަނިކުފާނު ގެންގުޅުއްވާ އުސޫލް ދޫކޮށްލައްވާނެ ކަމެއް ނޫން ކަމަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް ވިދާޅުވެއްޖެ އެވެ.
އައްޑޫ ސިޓީން ޕީޕީއެމްގެ މެމްބަރު ކަމުގެ 700 އެއްހާ ފޯމާ ހަވާލުވެވަޑައިގަތުމަށް ބުދަ ދުވަހު ސްޓެލްކޯގައި ބޭއްވި ހާއްސަ ރަސްމިއްޔާތެއްގައި ވާހަކަ ދައްކަވަމުން ރައީސް ޔާމީން ވިދާޅުވީ ގާނޫނީ ހަމަތަކުގެ ތެރެއިން ސިޔާސީ އިސްފަރާތްތަކަށް އަދަބު ލިބިގެންދާ ދިއުމަށް ފާޑު ކިޔުމަކީ އެމަނިކުފާނު ގެންގުޅުއްވާ އުސޫލް ދޫކޮށްލައްވާނެ ކަމެއް ނޫން ކަމަށެވެ. ހަމައެގޮތަށް ރާއްޖޭގައި ބަޔަކު ބޭނުންވާ ޑިމޮކްރެސީ ނެތިގެން ރާއްޖޭ އެތެރެއިންނާއި ބޭރުން ފިއްތާ ފިއްތުމަކީ އެކަނިކުފާނުގެ ގެންގުޅުއްވާ އުސޫލް ދޫކޮށްލަންޖެހޭ ކަމެއް ނޫން ކަމަށް ވެސް ރައީސް ޔާމީން ވިދާޅުވި އެވެ. އަދި ޕީޕީއެމްގައި ވެސް އަސާސީ ގަވާއިދާއި ހިންގާ ގަވާއިދެއް އޮންނަ ކަމަށާއި އެ ގަވާއިދުތަކުގެ ތެރެއިން ކުރަންއޮތް ކަންކަމަކީ ރައްޔިތުންނަށް ތަރައްގީ ހޯދައިދިނުން ކަމަށާއި އެކަންކަމަށް އެއްވެސް ފަރާތަކުން ހުރަސް ނޭޅުއްވުމަށް ރައީސް ޔާމީން ގޮވާލެއްވި އެވެ.
މީގެ އިތުރުން ރައީސް ޔާމީން ވިދާޅުވީ އަޅުވެތި ކަމަކީ ހަމައެކަނި ސިޔާސީ އަޅުވެތި ކަމެއް ނޫން ކަމަށާއި ދިވެހިރާއްޖޭގެ މައި އެއާޕޯޓް ބޭރުގެ ފަރާތަކަށް ދޫކޮށްލުމަކީ ވެސް އަޅުވެތި ކަމެއް ކަމަށެވެ. އަދި ޖީއެމްއާރު އަތުން ވެލާނާ އިންޓަރނޭޝަނަލް އެއާޕޯޓް އަތުލުމުގައި މާގިނަ ސިޔާސީ ލީޑަރުންނަށް މެޑަލް ނުޖެއްސެވޭނެ ކަމަށް ވެސް އެމަނިކުފާނު ވިދާޅުވި އެވެ.
އެއާޕޯޓް އަތުލުމުގައި ސިޔާސީ ގިނަ ބޭފުޅުން ތިއްބެވީ އެކަމަށް ރުހިގެން ނޫން ކަމަށާއި އެކަމުގައި އެންމެ ބޮޑު މަސައްކަތެއް ކޮށްފައިވަނީ ޕީޕީއެމްއިން ކަމަށްވެސް ރައީސް ޔާމީން ވިދާޅުވި އެވެ.
