ކޮމިޓީގައި ޓީއެމްއޭ އާއި އެމްއޭސީއެލް އިންވެސް ވަނީ ދޮގުހަދާފައި: ޔަޢުގޫބް

މޯލްޑިވްސް އެއަރޕޯޓްސް ކޮމްޕެނީ (އެމްއޭސީއެލް) އިން ތަރައްޤީކުރާ ސީޕްލޭން ޓާމިނަލް، ޓްރާންސް މޯލްޑިވިއަން އެއަރވޭސް (ޓީއެމްއޭ) އަށް ދިގު މުއްދަތަކަށް ދިނުމަށް ނިންމި މައްސަލަ ބަލަމުންދިޔަ ރައްޔިތުންގެ މަޖިލީހުގެ މާލިއްޔަތު ކޮމިޓީގައި އެމްއޭސީއެލްއާއި، ޓީއެމްއޭއިންވެސް ދޮގު މަޢުލޫމާތު ދީފައިވާކަމަށް އެ ކޮމިޓީގައި ހިމެނިވަޑައިގަންނަވާ ދާންދޫ ދާއިރާގެ މެންބަރ ޔައުޤޫބް ޢަބްދުﷲ ވިދާޅުވެއްޖެ އެވެ.

ރާއްޖެޓީވީގެ "ފަލަސުރުޚީ" ޕްރޮގުރާމްުއި މިމައްސަލަ މާލިއްޔަތު ކޮމިޓީއަށް ހުށަހެޅުއްވި ޔައުޤޫބް ވިދާޅުވީ މިމައްސަލަ ބަލަމުންދިޔައިރު ކުރިން ނޭނގޭ އެތައް މަޢުލޫމާތުތަކެއް އެނގެމުން އައިކަމަށެވެ. އެގޮތުން ކުރީ ސަރުކާރުން ޓީއެމްއޭއާއެކު ކޮށްފައިވާ އެތައް މުޢާމަލާތްތަކެއް އެނގިގެންދިޔަކަމަށް ޔައުޤޫބް ވިދާޅުވި އެވެ. އެގޮތުން 2017 ވަނަ އަހަރުން ފެށިގެން ގިނަ މުޢާމަލާތްތަކެއް ކުރަމުން އާއިރު ކޮމިޓީގައި އެމްއޭސީއެލްގެ ބޯޑުގެ ބޭފުޅުން މަސައްކަތްކުރެއްވީ ވަކި މިޞްރާބަކަށް މިމައްސަލަ ގެންދިޔުމަށްކަމަށް ޔައުޤޫބް ވިދާޅުވި އެވެ.

އެގޮތުން ޔައުޤޫބް ވިދާޅުވީ އެމްއޭސީއެލް އިން މަސައްކަތްކޮށްފައިވަނީ ސިޓީތަކުގައި ސޮއިކޮށްފައިވާ ކުންފުނީގެ ޖެނެރަލް މެނޭޖަަރ ކޮމަރޝަލް ހުސައިން ފަޒީލް އާ ދިމާލަށް މިމައްސަލަ ގެންދިޔުމަށްކަމަށް ޔައުޤޫބް ވިދާޅުވި އެވެ. ނަމަވެސް ހުސައިން ފަޒީލް ކޮމިޓީއަށް ހާޒިރުކުރުމުން އިތުރު މަޢުލޫމާތުތައް ސާފުވެގެންދިޔަ ކަމަށް ޔައުޤޫބް ވިދާޅުވި އެވެ.

މީގެއިތުރުން ޔައުޤޫބް ވިދާޅުވީ އެމްއޭސީއެލްގެ ބޯޑުން ކޮމިޓީގައި އިތުރު ފުޅު ހައްދަވާފައިވާތީ އޭގައި ގޯސްހަދާފައި އޮތީ ކޮންބައެއްކަން ދެނެގަނެ އެ މައްސަލަ ބަލަންޖެހޭ ފަރަތްތަކުން މައްސަލަ ބެލުމަށް ކުރެވެން ހުރި ހުރިހާ ކަމެއް ކުރާނެކަމަށެވެ.

މީގެއިތުރުން މައްސަލަ ކޮމިޓީން ބަލަމުންދިޔައިރު ޓީއެމްއޭއާ ވެސް ބައްދަލުކުރި ކަމަށް ޔައުޤޫބް ވިދާޅުވި އެވެ. ޓީއެމްއޭއިން އިތުރަށް ހޯދަންޖެހޭ މަޢުލޫމާތެއްގެ ގޮތުގައި އޮޑިޓަރ ޖެނެރަލް އޮޑިޓް ކުރަމުންދިޔައިރު ރިޒޯޓްތަކަށް ލައުންޖް ތައް ދީފައިހުރި އަގުތައް ހޯދަމުންދިޔައިރު ދަތިވެގެން އެކަމަށް ޓީއެމްއޭއިން ހުރަސް އެޅި ފަދަ މަޢުލޫމާތެއް ލިބިފައިވާތީ އެކަމާމެދު ސުވާލުކުރެއްވި ކަމަށް ޔައުޤޫބް ވިދާޅުވި އެވެ. އޭގެ ޖަވާބަކަށް ޓީއެމްއޭއިން ބުނެފައިވަނީ އެކަމަށް ހުރަސް އަޅާފައިނުވާ ކަމަށެވެ. ނަމަވެސް އޮޑިޓަރ ޖެނެރަލް ހާޒިރުކޮށް ކުރިޔަށް ގެންދިޔަ ސެޝަންގައި ލިބިގެންދިޔައީ އެހެން މަޢުލޫމާތުތަކެއް ކަމަށް ޔައުޤޫބް ވިދާޅުވި އެވެ.

އައު ސީޕްލޭން ޓަރމިނަލް ޓީއެމްއޭއަށް ދެ އަހަރު ދުވަހުގެ މުއްދަތަށް ދިނުމަށް ސަރުކާރުން ވަނީ ނިންމާފަ އެވެ.