ކ. މާލެ
|
20 ފެބްރުއަރީ 2020 | ބުރާސްފަތި 08:31
ޖެންޑަރ މިނިސްޓަރ އައިޝަތު މުހައްމަދު ދީދީ
ޖެންޑަރ މިނިސްޓަރ އައިޝަތު މުހައްމަދު ދީދީ
ރައީސް އޮފީސް
ޖެންޑަރ މިނިސްޓަރ
ކުށުގެ ތުހުމަތުކުރެވޭ ކުދިންނާއި ކުށުގެ ޝިކާރައަކަށްވެފައިވާ ކުދިންގެ ފޮޓޯޖެހުމަކީ ޤާނޫނީ ކުށެއް
 
މިނިސްޓަރ ވަނީ މިޤާނޫނަށް ހުރިހާ އެންމެންވެސް އަހުލުވެރިވުމަށް ވިދާޅުވެފައި
 
ކުށުގެ ވެށީގައިވާ ކުޑަކުދިންގެ މައުލޫމާތު ހާމަކޮށް ފޮޓޯޖެހުމަކީ ކުށެއް

ކުށުގެ ތުހުމަތުކުރެވޭ ކުޑަކުދިންނާއި ކުށުގެ ޝިކާރައަކަށްވެފައިވާ ކުދިންގެ ފޮޓޯ އެއްވެސް މީޑިޔާއެއްގައި އަދި އެނޫންވެސް ގޮތަކަށް ޕަބްލިޝްކުރުމަކީ މިއަދުން ފެށިގެން ޤާނޫނީ ކުށެއްކަމަށް ޖެންޑަރ މިނިސްޓަރ އައިޝަތު މުހައްމަދު ދީދީ (އައިޝާ) ވިދާޅުވެއްޖެ އެވެ.

20 ނޮވެންބަރު 2019ވީ ބުދަ ދުވަހު ރައީސުލްޖުމްހޫރިއްޔާ ތަޞްދީޤުކުރެއްވި ޤާނޫނު ނަންބަރު ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނަށް ޢަމަލުކުރަން ފަށާނީ 20 ފެބުރުވަރީ 2020ވާ ބުރާސްފަތި ދުވަހުގައި ކަމަށް އެގާނޫނުގައި ވަނީ ބުނެފައެވެ. އެއާއެކު މިއަދުން ފެށިގެން މިވަނީ މިޤާނޫނަށް އަމަލުކުރަން ފަށާފަ އެވެ.

އެހެންކަމުން ޖެންޑަރ މިނިސްޓަރ ކުރެއްވި ޓްވީޓެއްގައި ވަނީ ބުރާސްފަތި ދުވަހުން ފެށިގެން މިޤާނޫނަށް އަމަލުކުރަން ފަށާފައިވާކަމަށް ވިދާޅުވެ ކުށުގެ ވެށީގައިވާ ކުޑަކުދިންގެ މައުލޫމާތު ހާމަކޮށް ފޮޓޯޖެހުމަކީ މިޤާނޫނުގެ ދަށުން ކުށެއްކަން ހަނދާން ކޮށްދެއްވާފަ އެވެ.

މީގެއިތުރުން މިނިސްޓަރ ވަނީ މިޤާނޫނަށް ހުރިހާ އެންމެންވެސް އަހުލުވެރިވުމަށް ވިދާޅުވެފަ އެވެ.

ކުޑަކުދިންގެ ހައްޤުތައް ރައްކާތެރިކުރުމުގެ ޤާނޫނުގެ 33 ވަނަ މާއްދާގެ ހ ގައި ބުނެފައިވަނީ ކުޑަކުދިންގެ ކަރާމާތަށް އުނިކަން އަންނަ ގޮތަކަށް، ކުޑަކުދިންގެ ޒާތީމަޢުލޫމާތު އެއްވެސް ފަރާތަކުން ޢާންމުކޮށްގެން ނުވާނެކަމަށެވެ. އަދި އެމާއްދާގެ ށ ގައި ބުނެފައިވަނީ ކުށުގެ ތުހުމަތުގައިވާ ކުދިންނާއި، ކުށުގެ ޝިކާރައަކަށް ވެފައިވާ ކުދިންނާއި، އެނޫންވެސް ސަބަބަކަށްޓަކައި އަޅާލުމާއި ރައްކާތެރިކަން ބޭނުންވާ ކުދިންގެނަމާއި، އެޑްރެހާއި، ތަޢުލީމު ޙާޞިލުކުރާ ތަނުގެ މަޢުލޫމާތު ފަދަ ޒާތީމަޢުލޫމާތެއް ނުވަތަ ސީދާގޮތުން ނުވަތަ ނުސީދާގޮތުން ނަމަވެސް ކުއްޖާއަކީކާކުކަން ދެނެގަނެވޭނެ ފަދަ އެއްވެސް މަޢުލޫމާތެއް ނުވަތަ އެކުދިންގެތަސްވީރެއް، އެއްވެސް މީޑިއާގެ ނުވަތަ އެނޫންވެސް ވަސީލަތެއްގައިޝާއިޢުކޮށްގެން ނުވާނެއެވެ.

މިމާއްދާގެ ނ ގައި ބުނެފައިވަނީ މި މާއްދާގެ (ށ) އެހެން އޮތްނަމަވެސް، ކުއްޖާގެ މަޞްލަޙަތަށްޓަކައި،ހުއްދަކުރެވިގެންވާ ޙާލަތްތަކެއްގައި އަދި ލިޔުމުން ރެކޯޑުކުރެވޭސަބަބުތަކަށްޓަކައި، ޝަރުޢީ ކޯޓަކުން ނުވަތަ ޗިލްޑްރެންސް އޮމްބަޑްސްޕަރސަން ހުއްދަކުރާ މިންވަރެއް ޢާންމު ކުރެވިދާނެކަމަށެވެ.

މީގެއިތުރުން ޤާނޫނުލް އުޤޫބާތުގެ 622 ވަނަ މާއްދާ ބުނާގޮތުން، ހަޑިހުތުރު އެއްޗެހި ހިމެނޭ ފޮޓޯއާއި ލިޔުމާއި، މަންޒަރާއި ރެކޯޑާއި އަދި އެނޫންވެސް އެފަދަ ތަކެތި އުފެއްދުމާއި ބެހުމާއި އާއްމުކުރުމަކީ ކުށެކެވެ. އަދި އެފަދަ ތަކެތި ރައްދުވާ ފަރާތަކީ ކުޑަކުއްޖެއް ނަމަ ކުށުގެ ދަރަޖަ 1 ދަރަޖަ އިތުރުވެ، އަދަބު ބޮޑުވާނެއެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: އަމަން ހަލީމް
0%
100%
0%
0%
0%
0%
ކޮމެންޓް