ކުރިއަށް އޮތް ލޯކަލް ކައުންސިލް އިންތިޚާބުގައި އިދިކޮޅު މައި ޕާޓީ ޕީޕީއެމްގެ ޓިކެޓުގައި މާލެ ސިޓީގެ މޭޔަރު ކަމަށް ކުރީގެ ހައުސިން މިނިސްޓަރު ޑރ. މުހައްމަދު މުއިއްޒު އަދި އައްޑޫ ސިޓީގެ މޭޔަރު ކަމަށް ވޮލީ ބޯޅަ އެސޯސިއޭޝަންގެ ކުރީގެ ރައީސް މުހައްމަދު ލަތީފް ވާދަކުރައްވަން ނިންމަވައި ފޯމް ހުށަހަޅުއްވައިފިއެވެ.
ބައެއް މީޑިއާތަކަށް މިކަން ޕީޕީއެމުން ކަށަވަރުކޮށްދީފައިވާއިރު، މިދެ ބޭފުޅުން ވެސް ވަނީ ފޯމު އިލެކްޝަންސް ކޮމިޝަނަށް ފޯމް ހުށަހަޅުއްވާފައެވެ.
މާލެ ސިޓީގެ މޭޔަރުކަމަށް ވާދަކުރުމަށް އެޕާޓީގެ ޓިކެޓް ޑރ. މުއިއްޒަށް ދިނީ އެންމެ ގާބިލް އަދި ތައުލީމީ ކެނޑިޑޭޓަށް ވާތީ ކަމަށް އެޕާޓީން ބުނެއެވެ.
މާލޭގެ މޭޔަރުކަމަށް ޑރ.މުއިއްޒު ކުރިމަތިލައްވާފައިވާއިރު، އޭނާއަކީ ކުރީގެ ރައީސް އަބްދުﷲ ޔާމީންގެ ވެރިކަމުގައި ހައުސިން މިނިސްޓަރުކަމުގެ މަގާމު ފުރުއްވި ބޭފުޅާއެވެ.
މުއިއްޒުގެ މިނިސްޓަރުކަމުގައި މާލޭގެ ގިނަ ޕާކުތަކާއި، މާލޭގެ މަގުތައް އަލުން ޒަމާނީ ފެންވަރަށް ތަރައްގީކުރުމުގެ މަޝްރޫއުތައް ކުރިއަށް ގެންދިޔައެވެ. އަދި ބޯހިޔާވަހިކަމުގެ މަޝްރޫއުތައް ކުރިއަށް ގެންގޮސް ފްލެޓްގެ ލިޔުންތައް ހަވާލުކުރިއެވެ. ނަމަވެސް މިކަންކަން ކޮށްފައިވަނީ ކޮރަޕްޝަނަށް މަގުފަހިވާ ގޮތަށް ކަމަށާއި، ފްލެޓްތައް ދޫކޮށްފައިވަނީ ހައްގުވެރިންނަށް ނޫން ކަމަށް ބުނެ ގިނަ ބަޔަކު ވަނީ މުއިއްޒަށް ވަރަށް ބޮޑަށް ފާޑުކިޔާފައެވެ.
މީގެ އިތުރުން އައްޑޫ ސިޓީގެ މޭޔަރުކަމަށް ވާދަކުރައްވާ ލަތީފްއާ ބެހޭގޮތުން ޕީޕީއެމުން ބުނީ، އޭނާއަށް ޓިކެޓް ދިނީ ރައީސް ޔާމީންއާއެކު މަސައްކަތް ކުރައްވާ ގިނަ ދުވަހު ޕާޓީއަށް ޚިދުމަތް ކުރައްވާފައިވާ ބޭފުޅަކަށްވާތީ ކަމަށެވެ. އަދި ލަތީފްގެ ގާބިލްކަމާ މެދު ޝައްކުނުކުރާ ކަމަށް އެޕާޓީން ވަނީ ބުނެފައެވެ.
މާލެ ސީޓީގެ މޭޔަރުކަމަށް ޕީޕީއެމްގެ ފަރާތުން ޑރ. މުއިއްޒު ނުކުންނަވާއިރު، ސަރުކާރު ހިންގާ މައި ޕާޓީގެ އެމްޑީޕީގެ ފަރާތުން ނުކުންނަނީ އެޕާޓީގެ ކުރީގެ އެސްޖީ އަނަސް އަބްދުއްސައްތާރެވެ.
މިހާތަނަށް މާލެ ސިޓީގެ މޭޔަރުކަމަށް ވާދަކުރައްވާނެކަން އިއުލާންކުރައްވާފައިވާ އަނެއް ފަރާތަކީ، އަލްހާން ފަހުމީއެވެ. އޭނާ ވާދަކުރައްވަނީ މިނިވަން ކެނޑިޑޭޓެއްގެ ހައިސިއްޔަތުންނެވެ.
އައްޑޫ ސިޓީއަށް ބަލާއިރު މޭޔަރު ކަމަށް އެމްޑީޕީގެ ޓިކެޓުގައި ވާދަކުރައްވާނީ ކުރީގެ ހިތަދޫ ދެކުނު ދާއިރާގެ މަޖިލިސް މެންބަރު އަލީ ނިޒާރެވެ.
އޭޕްރީލް މަހުގެ 04 ވަނަ ދުވަހު ބާއްވާ ލޯކަލް ކައުންސިލް އިންތިޚާބަށް ގިނަ ސިޔާސީ ޕާޓީތަކުން މިހާރު އަންނަނީ ކެމްޕޭން ކުރަމުންނެވެ.
