ދުނިޔޭގެ އެކި ހިސާބުތަކުގައި ފެތުރެމުންދާ އެންކޯވް-19 ނުވަތަ ނޮވެލް ކޮރޯނާވައިރަސް ޖެހިގެން 2112 މީހުން މަރުވެއްޖެއެވެ.

އަލްޖަޒީރާގައި ރިޕޯޓުކޮށްފައިވާ ގޮތުގައި މިހާތަނަށް ދުނިޔޭގެ އެކި ހިސާބުތަކުން 2112 މީހަކު ކޮރޯނާވައިރަސްގެ ސަބަބުން މަރުވެފައިވާއިރު، ބުދަ ދުވަހުގެ ނިޔަލަށް ޗައިނާގެ ހޫބޭ ޕްރޮވިންސްއިން އެކަނި ވެސް 108 މީހަކު ވަނީ މަރުވެފައެވެ.

ކޮރޯނާވައިރަސް ޖެހުނު މީހުންގެ އަދަދު ވަނީ 74534 އަށް އަރާފައެވެ. މީގެ ތެރެއިން އެންމެ ގިނަ ކޭސް ފެނިފައިވަނީ އަދިވެސް ޗައިނާއިންނެވެ.

ކޮރޯނާވައިރަސް ޖެހިގެން ރިޕޯޓްކޮށްފައިވާ ނުވާ ގައުމުތަކުގެ ތެރޭގައި ހިމެނޭ އިރާނުން ކޮރޯނާވައިރަސްގެ 2 ކޭސް މިހާރު ވަނީ ފެނިފައެވެ. ކޮރޯނާވައިރަސް ކޮންޓްރޯލްކުރުމަށް ސިއްހީ މާހިރުން ގިނަ މަސައްކަތްތަކެއް ކުރި ނަމަވެސް މިހާތަނަށް މިބައްޔަށް ފަރުވާއެއް ހޯދިފައެއްނުވެއެވެ.