އައު ސީޕްލޭން ޓަރމިނަލް ޓީއެމްއޭއަށް ދިނުމަށް ނިންމާފައިވާ ކަމުގެ ވާހަކަތައް ތިލަވީ ހިސާބުން މިސަރުކާރަށާއި، އެމްއޭސީއެލްއަށް ބޮޑެތި ފާޑުކިޔުންތަކެއް އަމާޒުވެގެން ދިޔައެވެ. ދިވެހި ދައުލަތުގެ ސަތޭކަ އިންސައްތަ ހިއްސާ އޮންނަ ކުންފުންޏަކުން 55 މިލިއަން ޑޮލަރު ހަރަދުކޮށްގެން ހެދި އިމާރާތެއްގެ މާލީ މަންފާ، ދިވެހި ދައުލަތް ނޫން ބަޔަކަށް ލިބޭ ގޮތަށް ހަމަ ޖެހިގެން ދިއުމަކީ ދިވެހިންނަށް ހަޖަމްވާނެ ކަމެއް ނޫނެވެ.

ކަން ހިނގައިދިޔަ ގޮތަށް ބަލާއިރު، މިއީ މި ޓަރމިލަން އަޅަން ފެށި ހިސާބުން އުފަންވެފައި އޮތް މައްސަލައެކެވެ. އަދި އެތައް ވާހަކަތަކެއް ދެކެވި އެތައް މަޝްވަރާތަކެއް ކުރެވިފައިވާއިރު، މުޅިންވެސް ފެންނާން އޮތީ ޓީއެމްއޭއަށް ބުރަވެގެން ނިންމުންތަކެއް ނިންމާފައިވާ މަންޒަރެވެ. އެމްއޭސީއެލްގެ ބޯޑުގައި އޭރު ތިއްބެވި ފަރާތްތަކުންވެސް، އަދި މިހާރު ތިއްބެވި ފަރާތްތަކުގެ ވިސްނުން ހުރީ އެމަގަށެވެ.

މިމައްސަލައިގައި ކުރެވިފައި ހުރި މުއާމަލާތްތަކަށް ބަލާއިރު، 2017 ވަނަ އަހަރުން ފެށިގެން މިކަމުގައި ޓީއެމްއޭއާއި އެމްއޭސީއެލްއާ ދެމެދު އެކި ފަހަރުމަތިން މުއާމަލާތް ކުރެވިފައިވެއެވެ. މުޅިން އެއްކޮށް ދޭން ކަަމަށް އެއްވެސް އިރެއްގައި އެއްބަސްވެވިފައި ނުވީ ނަމަވެސް، ފާހަގަވާ އެއް ކަމަކީ ޓީއެމްއޭއަށް ވަރަށް ބޮޑަށް ދޫތަކެއް ދޭން މަސައްކަތް ކޮށްފައިވާތަނެވެ.

އެމްއޭސީއެލްގެ ހައިބަތު ހުރި ކުންފުންޏަކުން އައު ޓަރމިނަލަށް ބޭނުންވާ މުވައްޒަފުން ބިނާކުރަން މަސައްކަތްކޮށްފައި ނުވުމަކީ މީގެ ސާފު ހެއްކެކެވެ. އެކަން އޭސީސީގެ ރިޕޯޓުގައި ވަނީ ފާހަގަކޮށްފައެވެ. އަނެއް ކަމަކަށް އެވަރުގެ ބޮޑު އިންވެސްޓްމަންޓެއް ކުރިއިރު، ދުރާލާ ކަންކަން ރާވަން މަސައްކަތް ކޮށްފައި ނެތުމަކީވެސް މިކަމުގެ ހެއްކެކެވެ.

އެމްއޭސީއެލްގެ މަސްލަހަތަކީ ދިވެހި ދައުލަތުގެ މަސްލަހަތެވެ. ޔައުނީ އެންމެހާ ދިވެހި ރައްޔިތުންގެ މަސްލަހަތެވެ. މައްސަލައިގެ އެންމެ ފުނަށް ފީނާލާއިރު، އެއްވެސް އިރެއްގައި އެމްއޭސީއެލްގެ މަސްލަހަތު އިސްކޮށްފައިވާ މަންޒަރެއް ނުފެނެއެވެ. އެހެންކަމުން މިކަމުގައި އަމަލުކޮށްފައިވަނީ މުޅިން ގޯސްކޮށެވެ.

ހަގީގަތަކީ، މި މައްސަލައިގައި ދިވެހި ރައްޔިތުންގެ މަސްލަހަތު އިސްކޮށް، ކިރިޔާވެސް ތަސައްލީއެއް ލިބޭވަރުގެ ނިންމުމަކާ ހަމައަށް ދިއުމަށް ކޮށުނު މަގަކީ އެތައް ބަޔެއްގެ ބުރަ މަސައްކަތެވެ. ހާއްސަކޮށް ފުރަތަމަ ދުވަހުން ފެށިގެން މިކަމާ ދެކޮޅަށް ވަކާލާތުކުރި މެމްބަރުންނާއި، ނޫސްވެރިންނާއި، އަމިއްލަ ފަރުދުންނެވެ. އެހެން އެކަން ނުވީނަމަ، މިތަން ދިވެހިންގެ އަތުން ދޫވެގެން ދިޔައިހެވެ.

ދިވެހި ރައްޔިތެއްގެ ހައިސިއްޔަތުން އެންމެ ފުރަތަމަ ދުވަހުން ފެށިގެން އެކަމަށް ވަކާލާތުކުރި އެންމެނަށް ޝުކުރު އަދާކުރަމެވެ. މިއަދު ސަރުކާރުން ނިންމާ ނިންމުމެއްގެ ފަހަތުގައި ވަނީ އެބުރަ މަސައްކަތް ކުރި ފަރާތްތަކެވެ. ދިވެހިންގެ ޓަރމިނަލް ދިވެހިންގެ އަތުން ދޫނުވެ ދިއުމުގެ ފަހަތުގައި ވަނީ އެ ފަރާތްތަކުން ސަރުކާރަށް ކުރިމަތިކުރި ޕްރެޝަރު ކަމާއިމެދު ޝައްކެއްވެސް ނެތެވެ.