ހުޅުމާލޭގައި ތެޔޮ ބައުޒަރަކާއި ސައިކަލެއް ޖެހި އެކްސިޑެންޓްވެއްޖެ
15 ފެބުރުއަރީ 2020 | ހޮނިހިރު 08:02މި އެކްސިޑެންޓް ހިނގާފައިވަނީ ހޮނިހިރު ދުވަހުގެ ހެނދުނު 10:20 ހާއިރު
ސައިކަލަކާއި ތެޔޮ ބައުޒަރެއް އެކްސިޑެންޓް ވެފައި
ހައިވޭއިން ހުޅުމާލެ އަށް ފައިބާ ކޮޅުގައި, ސައިކަލަކާއި ތެޔޮ ބައުޒަރެއް ޖެހި އެކްސިޑެންޓް ވެއްޖެއެވެ.
ފުލުހުން ބުނީ މި އެކްސިޑެންޓް ހިނގާފައިވަނީ ހޮނިހިރު ދުވަހުގެ ހެނދުނު 10:20 ހާއިރު ކަމަށާއި އެކްސިޑެންޓުގައި، ސައިކަލް ދުއްވަން އިން އަންހެން މީހާއަށް އެކިވަރުގެ އަނިޔާވެ، އޭނާ ހުޅުމާލެ ހޮސްޕިޓަލަށް ގެންގޮސްފައިވާ ކަމަށެވެ. ނަމަވެސް އޭނާގެ ޙާލު ސީރިއަސް ނޫންކަމަށް ފުލުހުން މަޢުލޫމާތު ދެއެވެ.
ފުލުހުން ބުނީ މި އެކްސިޑެންޓުގައި ސައިކަލް ދުއްވަން އިނީ 26 އަހަރުގެ ދިވެހި އަންހެނެއް ކަމަށާއި ތެޔޮ ބައުޒަރު ދުއްވަން އިނީ 26 އަހަރުގެ ބަންގްލަދޭޝް ފިރިހެނެއް ކަމަށެވެ.
އަދި މި ދެ މީހުންގެ އަތުގައިވެސް ލައިސަންސް އޮތް ކަމަށް ފުލުހުން މަޢުލޫމާތު ދެއެވެ.
މި އެކްސިޑެންޓް ހިނގަން މެދުވެރިވީ ހުޅުމާލެއަށް ވަންނަ ޞަރަޙައްދުގައި، ތެޔޮ ބައުޒަރު އަނބުރާލަން އުޅެނިކޮށް ފަހަތުން އައި ސައިކަލް ކޮންޓްރޯލްނުވެ، ބައުޒަރުގައި ޖެހިގެން ކަމަށް ފުލުހުން ބުނެއެވެ.
މިމައްސަލަ ފުލުހުން ދަނީ އިތުރަށް ތަހުޤީޤު ކުރަމުންނެވެ.
