މިނިވަން ޗެމްޕިއަންޝިޕްގައި ނ. ކެނދިކުޅުދޫ އާއި ނ. ނޮޅިވަރަމް ކުޅުނު މެޗު ކާމިޔާބުކޮށް އުންމީދާއެކު މުބާރާތް ފަށައިފި އެވެ.

ހުކުރު ދުވަހު ކުޅުނު މެޗު ކެނދިކުޅުދޫ އިން ކާމިޔާބުކުރީ ނ. މަނަދޫއާ ވާދަކޮށް 1-2 ގެ ނަތީޖާއަކުންނެވެ.

މި މެޗު ފެށިގެން ފުރަތަމަ ލަނޑު ޖަހާ ލީޑު ނެގީ މަނަދޫ އިންނެވެ. މި ލަނޑު 13 ވަނަ މިނެޓުގައި ކާމިޔާބުކުރީ ހަސަން ޒައީމް އެވެ. އެހެން ނަމަވެސް ކެނދިކުޅުދޫއިން ވަނީ އެޓީމުގެ ކުޅުން ރަނގަޅުކޮށް 24 ވަނަ މިނެޓުގައި އަބްދުﷲ ސުއާދުގެ ލަނޑުން މެޗުގެ ނަތީޖާ ހަމަހަމަކޮށްފައެވެ.  

ފުރަތަމަ ހާފް ނިމުނީ 1-1 ގެ ނަތީޖާއިން ދެޓީމު އެއްވަރުވެގެންނެވެ. އެހެންނަމަވެސް ދެވަނަ ހާފް ފެށިގެން މާގިނައިރުތަކެއްނުވަނީސް ކެނދިކުޅުދޫއިން ވަނީ މެޗުގެ ލީޑު އަނބުރާ ހޯދާފައެވެ. މި ލަނޑު 46 ވަނަ މިނެޓުގައި އެޓީމަށް ކާމިޔާބުކޮށްދިނީ އަލީ ސަމާލް އެވެ.

މި ލަނޑަށް ފަހު ވެސް ކެނދިކުޅުދޫ އިން ދިޔައީ މެޗުގައި މޮޅު ކުޅުމެއް ދައްކަމުންނެވެ. އެހެން ނަމަވެސް މެޗުގެ ކުޅުން ނިމުނީ 1-2 ގެ ނަތީޖާއިން ކެނދިކުޅުދޫކޮޅަށް ބުރަވެގެންނެވެ. މި މެޗުގެ މޮޅު ކުޅުންތެރިޔަކަށް ހޮވިފައިވަނީ ކެނދިކުޅުދޫގެ އަލީ ސަމާލް އެވެ.

ހުކުރު ދުވަހު ކުޅުނު މެޗުން ނޮޅިވަރަމް މޮޅުވީ ހދ. ފިނޭއާ ވާދަކޮށް 3-5 ގެ ނަތީޖާއަކުންނެވެ.

މެޗުގައި ފުރަތަމަ ލަނޑު ޖަހާ ލީޑު ނެގީ ފިނޭއިންނެވެ. މި ލަނޑު ހަ ވަނަ މިނެޓުގައި އަލީ މިސްބާހް މުހައްމަދު ކާމިޔާބުކުރިއިރު، އޭގެ ދެ މިނެޓު ފަހުން ނޮޅިވަރަމްގެ އަލީ ރަޝީދު ވަނީ ލަނޑެއް ކާމިޔާބުކޮށް އެޓީމަށް ނަތީޖާ ހަމަހަމަކޮށްދީފައެވެ.

މި ލަނޑަށްފަހު ނޮޅިވަރަމް އިން އެޓީމުގެ ކުޅުން ރަނގަޅުކޮށް 23 ވަނަ މިނެޓުގައި ރިޝްވާން އިބްރާހިމްގެ ލަނޑުން ފުރަތަމަ ފަހަރަށް މެޗުގެ ލީޑު ހޯދި އެވެ. އެޓީމުން ލީޑު ފުޅާކުރީ 30 ވަނަ މިނެޓުގައި ހިޝާމް އަބްދުލް ރައްޒާގްގެ ލަނޑުންނެވެ.

އެހެންނަމަވެސް ފިނޭ އިން ވަނީ ފުރަތަމަ ހާފްގެ އިތުރުވަގުތުގައި ނަތީޖާގެ ފަރަގު ކުޑަކޮށްފަ އެވެ. މި ލަނޑު އެޓީމަށް ލިބުނު ޕެނަލްޓީއަކުން ކާމިޔާބުކޮށްދިނީ މުހައްމަދު އާރިފް އެވެ. މި ލަނޑުތަކާއެކު ފުރަތަމަ ހާފް ނިމުނީ 2-3 ގެ ނަތީޖާއިން ފިނޭގެ މައްޗަށް ނޮޅިވަރަމް ކުރީގައި އޮވެގެންނެވެ.

ދެވަނަ ހާފް ފެށިގެން ފިނޭއިން ވަނީ މާގިނައިރުތަކެއް ނުވަނީސް ނަތީޖާ ހަމަހަމަކޮށްފައެވެ. މި ލަނޑު 59 ވަނަ މިނެޓުގައި އެޓީމަށް ލިބުނު ޕެނަލްޓީއަކުން ކާމިޔާބުކޮށްދިނީ މެޗުގެ ފުރަތަމަ ލަނޑު ކާމިޔާބުކުރި މިސްބާހް އެވެ.

އެހެންނަމަވެސް ނޮޅިވަރަމް އިން ވަނީ އެޓީމުގެ ކުޅުން ރަނގަޅުކޮށް 73 ވަނަ މިނެޓުގައި ރިޝްވާން ކާމިޔާބުކުރި ލަނޑުން އަދި 83 ވަނަ މިނެޓުގައި އަހުމަދު އަފްރާހް ކާމިޔާބުކުރި ލަނޑުން މެޗުގެ ލީޑު އަނބުރާ ހޯދާފައެވެ.

މި މެޗުގެ މޮޅު ކުޅުންތެރިޔަކަށް ހޮވުނީ ނޮޅިވަރަމްގެ އިބްރާހިމް ރިޝަވާން އެވެ. އޭނާ ވަނީ މި މެޗުގައި ދެ ލަނޑު ކާމިޔާބުކޮށްފައެވެ.