ރައްޔިތުންގެ ހައްގަކީ ކުޅޭކުޅޭ އެއްޗެއް ނޫން: ފިޔާޒްގެ ނުރުހުން ޓޫރިޒަމް މިނިސްޓްރީއަށް!

ރައްޔިތުންގެ ހައްގަކީ ކުޅޭކުޅޭ އެއްޗެއް ނޫންކަމަށް ވިދާޅުވެ، އިންފޮމޭޝަން ކޮމިޝަނަރު ހުސައިން ފިޔާޒް މޫސާ ޓޫރިޒަމް މިނިސްޓްރީއަށް ފާޑުވިދާޅުވެއްޖެއެވެ.

ފިޔާޒް މިހެން ވިދާޅުވީ، އިންފޮމޭޝަން ކޮމިޝަނަރުގެ އޮފީހަށް ހުށައެޅިފައިވާ މައްސަލައެއްގެ އަޑުއެހުމަށް ޓޫރިޒަމް މިނިސްޓްރީން ހާޒިރުނުވުމާއި ގުޅިގެންނެވެ. މި އަޑުއެހުމަކީ މައުލޫމާތު ހޯދައި ލިބިގަތުމުގެ ގާނޫނުގެ ދަށުން މޯލްޑިވްސް ޓްރޭޑް ޔޫނިއަން އިން ޓޫރިޒަމް މިނިސްޓްރީއާ ދެކޮޅަށް ހުށައަޅާފައިވާ މައްސައެކެވެ.

ފިޔާޒް ކުރެއްވި ޓްވީޓުގައި ވަނި ޓޫރިޒަމް މިނިސްޓްރީ ހާޒިރުނުވުމަކީ ވަރަށް ނާތަހުޒީބު އަމަލެއްގެ ގޮތުގައި ސިފަކުރައްވާފައެވެ. އަދި އެކަން ވަރަށް ހަރުކަށި އިބާރާތުން ކުއްވެރިކުރާ ކަމަށް ވެސް ވިދާޅުވިއެވެ. އޭގެ އިތުރުން، މައުލޫމާތު ހޯދައި ލިބިގަތުމުގެ ގާނޫނުގެ 29 ވަނަ މާއްދާގެ ބޭނުން އޭގެ އެންމެ ފުރިހަމަ ގޮތުގައި ހިފާނެ ކަމަށްވެސް ފިޔާޒްގެ ޓްވީޓުގައި ވެއެވެ.

މޯލްޑިވްސް ޓްރޭޑް ޔޫނިއަންގެ ފަރާތުން ޓޫރިޒަމް މިނިސްޓްރީއަށް ދެކޮޅަށް ހުށައަޅާފައިވާ މައްސަލައަކީ، އެމްއެމްޕީއާރްސީއަށް ދޫކޮށްފައިވާ ފަޅުތަކާއި ރަށްތަކުގެ އެގްރީމަންޓްތައް ހާމަކުރުމަށް އެވުޒާރާއިން އުޒުރުވެރިވުމުން ހުށައަޅާފައިވާ މައްސަލައެކެވެ.

އެމައްސަލައިގެ އަޑުއެހުމުގައި އިންފޮމޭޝަން ކޮމިޝަނަރު ވަނީ، މޯލްޑިވްސް ޓްރޭޑް ޔޫނިއަންއިން އެދުނުގޮތަށް، އެގްރީމަންޓްތަކުގެ މައުލޫމާތު ދިނުމަށް ޓޫރިޒަމް މިނިސްޓްރީއަށް އަންގަވާފައެވެ. ގާނޫނުގައިވާ ގޮތުންނަމަ، 45 ދުވަހުގެ ތެރޭގައި އެމައުލޫމާތު ހާމަނުކޮށްފި ނަމަ، ހައިކޯޓުގައި މައްސަލަ އިސްތިއުނާފުކުރުމުގެ އިޙްތިޔާރު މައްސަލަ ހުށައެޅި ފަރާތަށް ލިބޭނެއެވެ.