ބެޑްމިންޓަންގެ އިންތިޚާބު މިމަހު 24 ގައި، ރައީސް ކަމަށް މޫސަ އެކަނި

ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް) ގެ އިންތިޚާބުގައި އެ އެސޯސިއޭޝަނުގެ ރައީސްގެ މަގާމަށް މިހާރުވެސް އެ މަގާމު ފުރުއްވަމުން އަންނަ މޫސާ ނާޝިދު ކުރިމަތިލައްވައިފި އެވެ.

ބީއޭއެމްގެ އިންތިޚާބު ބޭއްވުމަށް ހަމަޖެހިފައިވަނީ މި މަހުގެ 24 ވަނަ ދުވަހު އެވެ. އެ އެސޯސިއޭޝަނުގެ ހިންގާ ކޮމިޓީގެ ކުރިއަށް އޮތް ހަތަރު އަހަރުގެ ދައުރަށް ކުރިމަތިލުމަށް ހުޅުވާލުމުން، ކުރިމަތިލާފައިވަނީ ކޮންމެ މަގާމަކަށް ވެސް އެންމެ ކެންޑިޑޭޓެކެވެ.

އެގޮތުން ރައީސްގެ މަގާމަށް ކުރިމަތިލެއްވީ އެ މަގާމު މިހާރުވެސް ފުރުއްވަމުން އަންނަ މޫސާ ނާޝިދެވެ.

ބީއޭއެމްގެ ރައީސްގެ މަގާމަށް ތިންވަނަ ދައުރަކަށް މޫސަ ކުރިމަތިލެއްވިއިރު، އެ އެސޯސިއޭޝަނުގެ ރައީސްކަމުގެ މަގާމަށް ދެވަނަ ދައުރަކަށް އޭނާ އިންތިޚާބުވެފައިވަނީ 2016 އަހަރުގެ މެއި މަހުއެވެ.

މޫސަ އަކީ ދުނިޔޭގެ ބެޑްމިންޓަންގެ މައި އިދާރާ، ބެޑްމިންޓަން ވޯލްޑް ފެޑެރޭޝަން (ބީޑަބްލިއުއެފް) ގެ ކައުންސިލް މެންބަރެއްގެ އިތުރަށް އޭޝިއާގެ ބެޑްމިންޓަންގެ މައި އިދާރާ (ބީއޭސީ) ގެ ސެކްރެޓަރީ ޖެނެރަލްގެ މަގާމުވެސް ފުރުއްވަމުން އަންނަ ބޭފުޅެކެވެ.

ބީއޭއެމްގެ އިންތިޚާބުގައި އެ އެސޯސިއޭޝަނުގެ ނައިބު ރައީސްގެ މަގާމަށް ކުރިމަތިލެއްވީ އެ މަގާމުގައި މިހާރުވެސް ހުރި އަހުމަދު ޝާކިރު މޫސާ އެވެ. އަދި ޚަޒާންދާރުގެ މަގާމަށް މުހައްމަދު ރިޝާން އަދި ހިންގާ ކޮމިޓީގެ ފުރިހަމަ މެންބަރުން ތަމްސީލުކުރާ މެންބަރަކަށް ކުރިމަތިލެއްވީ ހުސެއިން އާތިފެވެ.

މީގެ އިތުރަށް ހިންގާ ކޮމިޓީގެ އެސޯސިއޭޓް މެންބަރުން ތަމްސީލުކުރާ މެންބަރަކަށް އަހުމަދު ސިރާޖު ކުރިމަތިލެއްވިއިރު، ޢާންމު ފަރުދުން ތަމްސީލުކުރާ މެންބަރު ކަމަށް ކުރިމަތިލެއްވީ ސިޔާދު ހަބީބެވެ. އަދި އަންހެނުން ތަމްސީލުކުރާ މެންބަރުގެ މަގާމަށް ކުރިމަތިލެއްވީ މުރުޝިދާ އަބްދުލް މައްނާނެވެ.

ހިންގާ ކޮމިޓީގެ ކޮންމެ މަގާމަކަށްވެސް އެއް މެންބަރަކު ކުރިމަތިލެއްވުމުން، އިންތިޚާބުގައި ނަގާނީ ފެންނަ ނުފެންނަ ވޯޓެކެވެ.