އަނެއްކާވެސް ޖިންސީ ގޯނާގެ މައްސަލައެއް: މިފަހަރު ހާއްސަ އެހީއަށް ބޭނުންވާ އަންހެނެއް!
4 ފެބުރުއަރީ 2020 | އަންގާރަ 08:12މި މައްސަލައިގައި ހިމެނޭ އަންހެން މީހާގެ އުމުރަކީ 30 އަހަރު
ޖިންސީ ގޯނާ ރައްޒުކޮށްދޭ މަންޒަރެއް | ގޫގުލް
އުމުރުން 30 އަހަރުގެ ޚާއްޞަ އެހީއަށް ބޭނުންވާ އަންހެނަކަށް ޖިންސީ ގޯނާކުރި މައްސަލައެއް ފުލުހުން ބަލަން ފަށައިފިއެވެ.
ފުލުހުން މަޢުލޫމާތު ދީފައިވާ ގޮތުގައި، މި މައްސަލަ އެ މުއައްސަސާއަށް ހުށައަޅާފައިވަނީ ހޯމަ ދުވަހުގެ 19:30 ހާއިރުގައެވެ. އަދި މިހާތަނަށް މި މައްސަލައާ ގުޅިގެން އެއްވެސް މީހަކު ހައްޔަރު ކޮށްފައި ނުވާކަމަށްވެސް ފުލުހުން ވަނީ މަޢުލޫމާތު ދީފައެވެ.
އަނިޔާ ލިބިފައިވާ މީހާގެ މަަޞްލަޙަތު ހިމާޔަތްކުރުމުގެ ގޮތުން ފުލުހުން ވަނީ އެއީ ސީދާ ކޮން ރަށެއްގެ ކާކުކަން ހާމަކުރުމަށް އުޒުރުވެރިވެފައެވެ. މަތިއުތުރު ޑިވިޝަންގައި ހިމެނޭ ރަށްތަކަކީ ހއ. ހދ. އަދި ށ. އަތޮޅެވެ. ފުލުހުން އަންނަނީ މި މައްސަލަ އިތުރަށް ތަހުގީގު ކުރަމުންނެވެ.
ޖިންސީ ގޯނާކުރުމާއި ޖިންސީ ފުރައްސާރައިގެ މައްސަލަތައް އިންތިހާއަށް އަންނަނީ ފެންމަތިވަމުންނެވެ. މީގެ ތެރޭގައި ކުޑަކުދިން ހިމެނޭ މައްސަލަތައް ގިނަކަންވެސް ފާހަގަކޮށްލެވެއެވެ.
ޖެންޑަރ މިނިސްޓްރީން ޢާންމުކުރި އެންމެ ފަހުގެ ތަފާސްހިސާބުތަކަށް ބަލާއިރު، ކުޑަކުދިންނަށް ޖިންސީ ގޯނާކުރުމުގެ 27 މައްސަލައެއް ޑިސެންބަރު މަހުގެ ތެރޭގައި އެ ވުޒާރާއަށް ހުށައަޅައިފައިވެއެވެ. އަދި ކުޑަކުދިން ނޫން ފަރާތްތަކާ ގުޅޭ ތަފާސްހިސާބުތަކަށް ބަލާއިރު، ރޭޕްގެ 2 މައްސަލައަކާއި، ޖިންސީ ގޯނާގެ އެއް މައްސަލައަކާއި ޖިންސީ ފުރައްސާރައިގެ އެއް މައްސަލަ އެއް ވުޒާރާއަށް ހުށައަޅާފައިވެއެވެ.
