ޕައޮލޯ މަލްޑިނީގެ ދަރިފުޅު މިލާނަށް ފުރަތަމަ މެޗު ކުޅެދީފި

އޭސީ މިލާނުގެ ލެޖެންޑް ޕައޮލޯ މަލްޑިނީގެ ދަރިފުޅު އުމުރުން 18 އަހަރުގެ ޑެނިއަލް މަލްޑިނީ، އެ ޓީމުގެ ޖާޒީގައި ފުރަތަމަ ފަހަރަށް މެޗެއް ކުޅެފި އެވެ.

އޭނާގެ ބައްޕަ ޕައޮލޯ މަލްޑިނީ އާއި ކާފަ ސެޒާ މަލްޑިނީ އަކީ ދެ ޑިފެންޑަރުނަށް ވީ ނަމަވެސް، ޑެނިއަލް މަލްޑިނީ ކުޅެމުން އަންނަނީ އެޓޭކިން މިޑްފީލްޑަރަކަށެވެ.

ސެޒާ މަލްޑިނީ ވަނީ ކުޅުންތެރިއެއްގެ ގޮތުގައި މިލާނާއެކު 4 ފަހަރު އިޓާލިއަން ލީގު ހޯދާފައެވެ. އަދި ފަހުން ކޯޗެއްގެ ގޮތުގައިވެސް އޭނާ ވަނީ މިލާނާއެކު ދެ ފަހަރު ލީގު ހޯދާފައެވެ. އަދި ޕައޮލޯ މަލްޑިނީ ވަނީ މިލާނަށް ކުޅެދިން 647 މެޗުގައި އިޓާލިއަން ލީގު ހަތް ފަހަރު އަދި ޔުއެފާ ޗެމްޕިއަންސް ލީގު ފަސް ފަހަރު ހޯދާފައެވެ.

ޑެނިއަލް މަލްޑިނީ މިލާނުގެ ޖާޒީގައި ކުޅުނު ފުރަތަމަ މެޗަކީ އާދީއްތަ ދުވަހުގެރޭ އިޓާލިއަން ލީގުގައި ވެރޯނާއާ 1-1 އިން މިލާން އެއްވަރުވި މެޗެވެ. މި މެޗުުގައި އޭނާ ކުޅެން އަރާފައިވަނީ އިތުރު ވަގުތުގަ އެވެ. މިލާނުގެ ޔޫތު ޓީމުން ތަމްރީންވެ ސީނިއާ ޓީމާ މި ސީޒަނުގައި ގުޅުނު ޑެނިއަލް ވަނީ ޕްރީ ސީޒަން މެޗުތަކުގައި ސީނިއާ ޓީމަށް ކުޅެފަ އެވެ. އެކަމަކު ރޭގެ މެޗަކީ ސީނިއާ ޓީމަށް އޭނާ ކުޅެދިން ރަސްމީ ފުރަތަމަ މެޗެވެ.

ޑެނިއަލް މަލްޑިނީ މިލާނުގެ ޖާޒީގައި ރޭ ފުރަތަމަ މެޗު ކުޅުނުއިރު، އޭނާގެ ބޭބެ ކްރިސްޓިއަން މަލްޑިނީ ވެސް މިލާނުގެ ޔޫތު ޓީމަށް ކުޅުނެވެ. އެކަމަކު މިހާރު އޭނާ ކުޅެނީ އިޓަލީގެ ތިންވަނަ ޑިވިޝަނުގައެވެ.