12 ދުވަސް ފަހުން ޝަބާނާ ހޮސްޕިޓަލުން ދޫކޮށްލައިފި
އެޑްމިޓްކޮށްފައިވަނީ ޖެނުއަރީ މަހުގެ 18 ވަނަ ދުވަހު
ޝަބާނާ އަޒްމީ
ބޮލީވުޑްގެ ވެޓަރަން އެކްޓްރެސް ޝަބާނާ އަޒްމީ، 12 ދުވަސް ފަހުން ހޮސްޕިޓަލުން ދޫކޮށްލައިފިއެވެ.
ޝަބާނާ އަޒްމީއާއި އޭނޭގެ ފިރިމީހާ އަދި މަޝްހޫރު ޅެންވެރިއެއް ކަމުގައިވާ މަޝްހޫރު ޖާވިދް އަޚްތަރާއި ދެމީހުން ދަތުރުކުރަމުން ދިޔަ ކާރު އެކްސިޑެންޓުވީ މި ހިނގާ މަހުގެ 18 ވަނަ ދުވަހުއެވެ.
އެ އެކްސިޑެންޓް ހިނގާފައިވަނީ މުމްބާއީ އާއި ޕޫނާ ގުޅޭ ހައިވޭގައި ދަތުރުކުރަމުން ދިޔައިރު، ދުއްވާފައި ދިޔަ ޕިކަޕެއްގައި ޖެހިގެންނެވެ. އެ ޙާދިސާގައި ޝަބާނާގެ ބޮލަށާއި މައިބަދަ އަށް ގެއްލުންވިއެވެ. މިޙާދިސާގައި ޖާވިދަށް މާބޮޑު އަނިޔާއެއް ނުވެ ސަލާމަތްވިއެވެ.
ހޮނިހިރު ދުވަހު ޝަބަނާ ހޮސްޕިޓަލުން ދޫކޮށްލިކަން ޓްވިޓާ މެދުވެރިކޮށް އޭނާ ވަނީ ހާމަކޮށްފައެވެ. ޝަބާނާ ވަނީ އޭނާ އަށް ހެޔޮދުއާކޮށް ދިން އެންމެންނަށް ޝުކުރ އަދާކޮށްފައެވެ. އަދި ހޮސްޕިޓަލުގެ ޑޮކްޓަރުންނާއި ނަރުހުންގެ އޯގާތެރިކަމަށްވެސް ޝަބާނާ ވަނީ ޝުކުރު އަދާކޮށްފައެވެ.
ޝަބާނާ އެކްސިޑެންޓުވެ ލިބުނު ގެއްލުމަށް ފަރުވާ ހޯދަމުންދާއިރު، އިންޑިއާގެ ބޮޑު ވަޒީރު ނަރެންދްރަ މޯދީއާއި ވަޒީރުންނާއި ސިޔާސީ ލީޑަރުން ވަނޫ އޭނާއަށް އަވަސް ޝިފާއަށް އެދި ޓްވިޓަރ އަދި ފޯނުގެ ޒަރީއާއިން މެސެޖް ފޮނުވާފައެވެ.
