ކޯލިޝަން އޮތުމުން ދަތިވޭ، ނަމަވެސް ރޫޅާލުމުގެ ވިސްނުމެއް ނެތް: އެމްޑީޕީ
ސީއެސްސީ އޮތީ ފެއިލްވެފައި: އާޒިމް
އެމްޑީޕީގެ ރައީސް މުހައްމަދު ނަޝީދު އަދީ ޖޭޕީގެ ލީޑަރު ގާސިމް އިބްރާޙިމް
ކޯލިޝަނެއްގައި މަސައްކަތް ކުރަމުން ޖެހުމުން ދަތިތަކާއި ދިމާވާ ކަމަށާއި، އެކަމަކު ކޯލިޝަން ރޫޅާލުމުގެ ވިސްނުމެއް ނުގެންގުޅޭ ކަމަށް އެމްޑީން ބުނެފިއެވެ.
އެމްޑީޕީގެ ޕާލިމެންޓްރީ ގްރޫޕުުގެ ލީޑަރު އަލީ އާޒިމް ހޮނިހިރު ދުވަހު ރާއްޖެ.އެމްވީ އަށް ދިން ހާއްސަ އިންޓަވިއުއެއްގައި ވިދާޅުވީ، އެންމެ އެކަށީގެންވާ ބާރުމިނުގައި، ހިނގަންވާ ގޮތަށް ސަރުކާރު ހިނގައިނުގަނެގެން އުޅެނީ، ސިވިލް ސަރވިސް ކޮމިޝަނުން މަސައްކަތް ކުރަންޖެހޭ ރޫހުގައި އެކަން ނުކުރެވުމާއި އެކު ސަރުކާރު ކޯލިޝަންގެ ތެރެއިން އެމްޑީޕީގެ '' ޕޮޕިއުލަރިޓީ'' ހުއްޓުވުމަށް މަސައްކަތް ކުރުމުގެ އިތުރުން ބައެއް ވުޒާރާތަކުން ކުރަންވާ މަސައްކަތް ނުކުރާތީ ކަމަށެވެ. އާޒިމް ވިދާޅުވީ ގޮތުގައި ސިވިލް ސަރވިސް ކޮމިޝަން އޮތީ ފެއިލްވެފައެވެ.
ކޯލިޝަންގެ ވާހަކައިގެ އިތުރު ތަފްސީލު ބަޔާންކުރައްވަމުން ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެމްބަރުކަންވެސް ކުރައްވާ އާޒިމް ވިދާޅުވީ، ކޯލިޝަނެއްގެ ގޮތުގައި ތިބެގެން މަސައްކަތް ކުރެވިދާނެ ކަމަށް ގަބޫލުފުޅު ނުކުރައްވާ ކަމަށެވެ. އޭނާ ވިދާޅުވީ، ލޯކަލް ކައުންސިލް އިންތިހާބާ ދިމާކޮށް ބައެއް ބޭފުޅުން ވާހަކަ ދައްކަނީ ކައުންސިލް އިންތިހާބުގައި އެމްޑީޕީއަށް ބޮޑު ތާއިދެއް ލިބިދާނެތީ އެ ތާއިދު ހުއްޓުވުމަށް ކަމަށެވެ.
ސަރުކާރު ކޯލިޝަންގައި ހިމެނިވަޑައިގަންނަވާ ޖުމްހޫރީ ޕާޓީގެ ލީޑަރު ގާސިމް އެމްޑީޕީ އަށް ކިޔަމުންދާ ފާޑުކިޔުންތަކަށް ރައްދު ދެއްވަމުން އާޒިމް ވިދާޅުވީ، ކޯލިޝަން ހަދަނީ އެއް ބައެއް ނޫން ކަމަށެވެ. އެއީ އެކުގައި އެންމެން މަސައްކަތް ކުރުމުގެ ނިޔަތުގައި ހެދި ކޯލިޝަނެއް ކަމަށެވެ.
ކޯލިޝަން ރޫޅާލަން އެމްޑީޕީން މަސައްކަތް ކުރަމުންދޭތޯ ސުވާލުކުރުމުން އާޒިމް ވިދާޅުވީ، ކޯލިޝަން ރޫޅާލާކަށް މަސައްކަތް ނުކުރާ ކަމަށެވެ. ނަމަވެސް ކޯލިޝަން ތެރެއިން ހަދާ ގޯސްތަކުގެ ވާހަކަ އަބަދުވެސް ދައްކާނެ ކަމަަށް ވިދާޅުވިއެވެ.
ކޯލިޝަން ރޫޅާލުމުގެ ވިސްނުމެއް ނުގެންގުޅުއްވާ ކަމަށް އާޒިމް ވިދާޅުވެފައިވާއިރު، ކޯލިޝަންގެ ސަބަބުން ބައެއް މަޝްރޫޫއުތަކަށް ހުރަސް އެޅޭ ކަމަށް އެމްޑީޕީގެ ރައީސް މުހައްމަދު ނަޝީދު ވަނީ ކ. ގުރައިދޫގައި ވާހަކަ ދައްވަމުން ވަނީ ވިދާޅުވެފައެވެ.
