ފޮށިތަކެއް ގުނި ނަމަވެސް ނަތީޖާ ބަދަލުވާ ވަރުގެ ކަމެއް ނެތް: އިލެކްޝަންސް

ހޮނިހިރު ދުވަހު ބޭއްވި ލޯކަލް ކައުންސިލް އިންތިޚާބުގެ ޝަކުވާތަކާ ގުޅިގެން 24 ފޮށްޓެއްގެ ނަތީޖާގައި އިތުރަށް ކަށަވަރު ކުރަން އެ ފޮށިތަކުގެ ސެކިއުރިޓީ އުރަތައް ކަނޑައި އަލުން ގުނި ނަމަވެސް ނަތީޖާ އަށް ބަދަލު އަންނަވަރުގެ ކަމެއް ފާހަގަކުރެވިފައި ނުވާ ކަމަށް އިލެކްޝަންސް ކޮމިޝަނުން ބުނެފިއެވެ.

ނަތީޖާތައް އަލުން ކަށަވަރުކުރުމަށް ސެކިއުރިޓީ އުރަތައް ކަނޑައި އަލުން ފޮށިތައް ގުނަން ފެށީ ބުރާސްފަތި ދުވަހުއެވެ. އެ މަސައްކަތްކޮށްފައި ވަނީ މޮނީޓަރުންނާއި ކެންޑިޑޭޓުންގެ މަންދޫބުންނާއި އޮބްޒާވަރުން އަދި މީޑިއާތަކުގެ ވެސް ހާޒިރުގައެވެ. އެ މަސައްކަތް ހުކުރު ދުވަހު ވެސް ކުރިއަށް ގެންގޮސްފައި ވެއެވެ.

ހޮނިހިރު ދުވަހު ބޭއްވި އިންތިހާބުގެ ގިނަ ދާއިރާތަކެއްގެ ވަގުތީ ނަތީޖާތައް އިލެކްޝަންސްގެ ވެބްސައިޓްގައި ޝާއިރުކޮށްފައިވީ ނަމަވެސް މިހާތަނަށް އިއުލާނުކޮށްފައި ވަނީ މަދު ނަތީޖާތަކެކެވެ. ބައެއް ނިއުސް ވެބްސައިޓްތަކާއި ރާއްޖެ ޓީވީން ވަގުތީ ނަތީޖާތައް އިއުލާނުކޮށްފައިވާ އިރު އިލެކްޝަންސް އިން ހުކުރު ދުވަހުގެ ރޭ ވަނީ ގިނަ ނަތީޖާތަކެއް އިއުލާނުކުރަން ފަށައިފައެވެ.

ވަގުތީ ނަތީޖާ ދައްކާ ގޮތުން މިހާތަނަށް ބޮޑު ކާމިޔާބީއެއް ހޯދާފައި ވަނީ އިދިކޮޅު ފަރާތްތަކުންނެވެ. އެ ގޮތުން އެމްޑީޕީން 300 އަށް ވުރެ ގިނަ ގޮނޑި އަދި ޖުމްހޫރީ ޕާޓީން 20 ގޮނޑި ކާމިޔާބުކޮށްފައިވާ އިރު ސަރުކާރު ހިންގާ ކޯލިޝަންގެ ޕީޕީއެމް އަށް 191 ގޮނޑި، އެމްޑީއޭ އަށް 19 ގޮނޑި އަދި ޑިއާރުޕީ އަށް އެއް ކާމިޔާބުކުރެވިފައި ވަނީ އެންމެ ގޮނޑިއެކެވެ. އަމިއްލަ ކެނޑިޑޭޓުން 101 ގޮނޑި ކާމިޔާބުކޮށްފައިވާ ކަމަށް ވަގުތީ ނަތީޖާތަކުން ދައްކައެވެ.