ރައީސް ނަޝީދު ވިދާޅުވީ، މަޝްރޫއުތައް ލަސްވަނީ ކޯލިޝަނާ ހެދިކަމަށް
23 ޖެނުއަރީ 2020 | ބުރާސްފަތި 04:54އަޅުގަނޑާއި، ރައީސްއާ ދެބޭފުޅުން މިތިބީ ދަތުރަށް އަރާ: ނަޝީދު
ސަރުކާރުގެ ބައެއް ވަޒީރުން
ސަރުކާރުގެ މަޝްރޫއުތަށް ލަސްވާން މެދުވެރިވާ ސަބަބަކީ ކޯލިޝަން ކަމަށް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ބުދަ ދުވަހު ކ. ގުރައިދޫ އެމްޑީޕީ ޖަގަހަ ހުޅުވައިދެއްވައި ވާހަކަފުޅުދައްކަވަމުން އެމްޑީޕީގެ ރައީސް، ރައީސް ނަޝީދު ވިދާޅުވީ، އެމްޑީޕީން ރައްޔިތުންނަށް ބޭނުންވާ ކަންތައްތައް ކޮށްދޭން މަސައްކަތް ކުރާއިރު ސަރުކާރުގެ ތެރެއިން ލަސްތަކެއް ދިމާވާ ކަމަށެވެ. ސަރުކާރުގެ ބައެއް ވުޒާރާތަކާއި، ސަރުކާރު ހިއްސާވާ ބައެއް ކުންފުނިތައް ހިންގަމުން ގެންދަނީ އެމްޑީޕީގެ މެމްބަރުން ނޫންކަން ފާހަގަކުރައްވަމުން އެމަނިކުފާނު ވިދާޅުވީ، ބައެއް ފަހަރުތަކުގައި ރައީސް އިބްރާހިމް މުހައްމަދު ސޯލިހު ކަންތައްތަކާއި މެދު ދެކެވަޑައިގަންނަވާ ގޮތާއި އެމްޑީޕީ ނޫން އެހެން މެމްބަރުން ހިންގާ ވުޒާރާތައް ހިންގާ ބޭފުޅުން ދެކިވަޑައިގަންނަވާ ގޮތްތަކުގައި ފުށުއަރާ ކަމަށެވެ.
ރައީސް ނަޝީދު ވިދާޅުވީ، އެމަނިކުފާނާއި ރައީސް ސޯލިހުއާ ދެ ބޭފުޅުން ތިބީ ''ދަތުރަށް'' އަރާ ކަމަށާއި، އެ ''ދަތުރުުގައި'' މޮޅުވާނެ ކަމަށެވެ. އެމަނިކުފާނު ވިދާޅުވީ، ދެ ބޭފުޅުންނާއި ވާދަކުރެވޭނެ އެއްވެސް ސިޔާސީ ޕާޓިއެއް އަދި ސިޔާސީ ވެރިއެއްވެސް ދިވެހިރާއްޖޭގައި ނުހުންނާނެ ކަމަށެވެ.
މަޝްރޫއުތަކަށް ކޯލިޝަން ތެރެއިން ހުރަސްއަޅާކަމުގެ ތުހުމަތުތަކެއް ރައީސް ނަޝީދު ކުރައްވާފައިވާއިރު، އެމްޑީޕީން ތިލަދުންމައްޗަށް ކުރެއްވި ދަތުރުފުޅެއްގައި ރައީސް ނަޝީދު ވިދާޅުވެފައިވަނީ، އެމްޑީޕީގެ މެމްބަރުންނަށް ހައްގުވާ މިންވަރު ނުލިބިގެން އުޅެނީވެސް ކޯލިޝަންގެ ސަބަބުން ކަމަށެވެ. ރައީސް ނަޝީދު އެހެން ވިދާޅުވެފައިވާތީ ކޯލިޝަންގައި ހިމެނިވަޑައިގަންނަވާ ޖުމްހޫރީ ޕާޓީގެ ލީޑަރު ގާސިމް އިބްރާހިމް ވަނީ ނަޝީދަށް ފާޑުވިދާޅުވެފައެވެ. އެގޮތުން ކޯލިޝަން ހަދަން އެމްޑީޕީން ކުރި އާދޭސް ރައީސް ނަޝީދު ހަނދުމަފުޅު ނެތީތޯ ޤާސިމް ވަނީ ސުވާލުކުރައްވާފަ އެވެ.
ރައްޔިތުންގެ މަޖިލީސް އިންތިހާބަށް އެމްޑީޕީން ހުރިހާ ގޮނޑިއަކަށް ވާދަކުރައްވަން ނިންމި ހިސާބުން ގާސިމާއި، ރައީސް ނަޝީދާ ދެމުދު ދަނީ ބަހުގެ ހޫނު ހަމަލާތައް ބަދަލުކުރެވެމުންނެވެ. ގާސިމް، އެމްޑީޕީގެ ސިޔާސަތުތަކަށް ފާޑުވިދާޅުވަމުން ގެންދަވާއިރު، ރައީސް ނަޝީދުވެސް ގެންދަވަނީ ރައްދު ދެއްވަމުންނެވެ.
