އޮކިއުޕޭޝަނަލް ހެލްތު އެންޑް ސޭފްޓީ ޤާނޫނެއް މިހާރުން މިހާރަށް ވެސް ބޭނުން: އެމްޕީއެލް
21 ޖެނުއަރީ 2020 | އަންގާރަ 08:16އޮކިއުޕޭޝަނަލް ހެލްތް އެންޑް ސޭފްޓީ ގާނޫނެއް އޮތުމުން ކުންފުނީގެ އުސޫލުތަކާއި ގަވާއިދުތައް ހަރުދަނާ ވެގެންދާނެ
މާލޭގެ ވިޔަފާރި ބަނދަރުގައި މަޖޫރީން ކޮންޓެއިނަރެއް ހުސްކުރުމުގެ މަސައްކަތް ކުރަމުންދަނީ
އޮކިއުޕޭޝަނަލް ހެލްތު އެންޑް ސޭފްޓީ ޤާނޫނެއް މިހާރުން މިހާރަށް ވެސް ބޭނުންވާ ކަމަށާއި، ކުންފުނިތަކުގައި ހަދާފައިވާ އުޞޫލުތަކަށް ޢަމަލުކުރުމުގައި އެކަމުގެ ސަބަބުން އިތުރު ބާރުތަކެއް ލިބިގެންދާނެ ކަމަށް މޯލްޑިވްސް ޕޯރޓްސް ލިމިޓެޑް(އެމްޕީއެލް) ގެ ޗީފް ރިސްކް އޮފިސަރ އިބްރާހިމް ޒާހިރު ވިދާޅުވެއްޖެއެވެ.
ރާއްޖެ ޓީވީގެ ފަލަސުރުޚީ ޕްރޮގުރާމުގައި ވާހަކަދައްކަވަމުން ޒާހިރު ވިދާޅުވީ އޮކިއުޕޭޝަނަލް ސޭފްޓީ ޤާނޫނެއް އޮތުމުން ކުންފުނީގެ ހެލްތު އެންޑް ސޭފްޓީ ޕޮލިސީތަކާއި، ޤަވާއިދުތަކާއި، ރިސްކް އެސެސްމަންޓް ފްރޭމް ވޯކާއި، އަދި މެނޭޖުކުރުމަށް ފަސޭހަވެގެންދާނެ ކަމަށެވެ.
ނަމަވެސް އެފަދަ ޤާނޫނެއް ނެތުމުން މިހާރު ހަދާފައިވާ އުޞޫލުތަކާއި ޤަވާއިދުތަކަށް ޢަމަލުކުރުމުގައި އުނދަގޫ ކުރިމަތިވާކަން އޭނާ ފާހަގަ ކުރެއްވިއެވެ.
ޒާހިރު ވިދާޅުވީ އޮކިއުޕޭޝަނަލް ހެލްތު އެންޑް ސޭފްޓީ ޤާނޫނެއް ރާއްޖޭގައި އޮތުމަކީ ކުންފުންޏަށް ވެސް އޭގެއިން ވަރަށް ބޮޑެތި ފައިދާތައް ކުރާނެ ކަމެއް ކަމަށެވެ. އަދި އެމްޕީއެލްގެ ޕޮލިސީތައް ވެސް އަދި ޤަވާއިދުތައް ވެސް އަންނާނީ ޤައުމީ ފެންވަރެއްގައި ހެދޭ ޤާނޫނަކަށް އެލައިން ކުރެވިގެން ކަން އޭނާ ފާހަގަ ކުރެއްވިއެވެ.
ޒާހިރު ވިދާޅުވީ ޤާނޫނެއް ހެދުމަށް މިހާރުވެސް ގުޅުން ހުރި ފަރާތްތަކާއި ވާހަކަ ދައްކާ ޚިޔާލުތައް ވެސް ފޯރަމްތަކުގައި ހުށަހަޅާފައިވާނެ ކަމަށެވެ. އަދި ބޮޑަށް ލަފާ ކުރެވެނީ ވަރަށް އަވަހަށް ރާއްޖޭގައި އޮކިއުޕޭޝަނަލް ހެލްތު އެންޑް ސޭފްޓީ ޤާނޫނެއް އަންނާނެ ކަމަށާއި، އެ ޤާނޫނު ޑްރާފްޓް ކުރުމުގެ މަސައްކަތް ކުރެވެމުންދާކަމަށް ޤަބޫލުކުރައްވާ ކަމަށެވެ.
