ޖަޒީރާ ޗެމްޕިއަންޝިޕްގެ ފުރަތަމަ ބުރު ނުބާއްވަން ނިންމައިފި
20 ޖެނުއަރީ 2020 | ހޯމަ 15:22މި މުބާރާތް އިއުލާން ކުރީ މިދިޔަ ސެޕްޓެމްބަރު މަހު
މިނިވަން ޗެމްޕިއަންޝިޕްގެ ފައިނަލް މެޗުގެ ތެރެއިން
އަތޮޅުތަކަށް ހާއްސަކޮށްގެން ބާއްވަން ނިންމި ޖަޒީރާ ޗެމްޕިއަންޝިޕްގެ ފުރަތަމަ ބުރު ނުބާއްވަން ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ނިންމައިފިއެވެ.
މިނިވަން ޗެމްޕިއަންޝިޕްގެ ނަމުގައި ކުރިން ބާއްވަމުންއައި މި މުބާރާތް ޖަޒީރާ ޗެމްޕިއަންޝިޕް އަށް ބަދަލުކުރިކަން އިއުލާން ކުރީ މިދިޔަ ސެޕްޓެމްބަރު މަހު ޔޫތް މިނިސްޓްރީގައި ބޭއްވި ބައްދަލުވުމެއްގައި ކުޅިވަރާއި ބެހޭ ވަޒީރު އަހުމަދު މަހުލޫފާއި އެފްއޭއެމްގެ ރައީސް ބައްސާމް އަދީލް ޖަލީލް އެވެ.
މި މުބާރާތް ރޭވިފައި އޮތް ގޮތުންނަމަ މުބާރާތުގެ ފުރަތަމަ ބުރުގައި ކޮންމެ ރަށެއްގެ ކައުންސިލުން ރަށު ފެންވަރުގެ މުބާރާތެއް ބާއްވާނެއެވެ. އަދި މައި މުބާރާތުގައި އަތޮޅު ފެންވަރުގައި ތަމްސީލުކުރާނީ ރަށު މުބާރާތުގެ ޗެމްޕިއަން ޓީމެވެ. އަދި މި މުބާރާތުގެ ޗެމްޕިއަން ވާދަކުރާނީ ޒޯން މުބާރާތުގައެވެ.
އެފްއޭއެމްއިން މި މަހު ނުވަވަނަ ދުވަހު ރަށްތަކަށް ފޮނުވި ސިޓީއެއްގައި ބުނެފައިވަނީ ރަށު ކައުންސިލްތަކުން ކުރިޔަށްގެންދާ މުބާރާތުގައި ބައިވެރިވުމަށް ހުށަހަޅައިފައިވަނީ މަދު ރަށަކުން ކަމަށާއި އެހެންކަމުން އެބުރު ނުބާއްވާ ގޮތައް ނިންމައިފައިވާ ކަމަށެވެ. އަދި އެ ރަށަކުން ބައިވެރިކުރާނެ ޓީމެއް ކަނޑައަޅާ ކައުންސިލްތަކުން ގޮތެއް ނިންމުމަށް ވަނީ އަންގައިފައެވެ.
އެފްއޭއެމް އިން ބުނީ މި މުބާރާތުގައި މިހާރު ކުރަންހުރި ކަންކަން ނިންމައި މި މުބާރާތް އަންނަ ފެބްރުއަރީ މަހު 25 ވަނަ ދުވަހު ފެށޭނެ ވަރު ވާނެ ކަމަށެވެ.
