މަގާމުން ވަކިކުރުމުގެ ދައުވާއަކީ ޑިމޮކްރަސީއަށް އޮތް ނުރައްކަލެއް: ޓްރަމްޕްގެ ވަކީލުން

އެމެރިކާގެ ރައީސް ޑޮނަލްޑް ޓްރަމްޕް މަޤާމުން ވަކިކުރުމަށް ސެނެޓަށް ހުށަހަޅާފައިވާ މައްސަލައަކީ ޑިމޮކްރަސީއަށް އޮތް ބޮޑު ނުރައްކަލެއް ކަމަށް ޓްރަމްޕުގެ ވަކީލުން ބުނެފިއެވެ.

އެގޮތުން ޓްރަމްޕުގެ ވަކީލުންގެ ޓީމުން ބުނީ ޓްރަމްޕާއި ދެކޮޅަށް ނެރޭ އިމްޕީޗްމަންޓް ދަޢުވާ އަކީ ޑިމޮކްރަސީއާއި ދެކޮޅަށް ދޭ ނުރައްކާތެރި ޙަމަލާއެއް ކަމަށާއި، އިމްޕީޗްމަންޓާ ގުޅޭ ލިޔެކިޔުންތަކުގައި ޓްރަމްޕް އެއްވެސް ޖިނާޢީ ކުށެއް ކުރެއްވިކަން ފާހަގަނުވާ ކަމަށެވެ. އަދި މިއީ މިއަހަރު ބާއްވަން ހަމަޖެހިފައިވާ ރިޔާސީ އިންތިޚާބަށް ނުފޫޒު ފޯރުވަން ކުރާ ލަދުވެތި ޢަމަލެއް ކަމަށް ވަކީލުންގެ ޓީމުން ބުންޏެވެ.

ޓްރަމްޕްގެ ވަކީލުންގެ ޓީމުން މިހެން ބުނިއިރު ޓްރަމްޕް މަޢާމުން އަޒުލުކުރުމަށްޓަކައި އިދިކޮޅު ޑިމޮކްރެޓިކް ޕާޓީގެ މެޖޯރިޓީ އޮންނަ އެމެރިކާގެ ޤާނޫނު ހަދާ މަޖިލީހުގެ ހައުސް އޮފް ރެޕްރެޒެންޓޭޓިވްސްގައި ވަނީ މައްސަލައިގެ ތަހުޤީޤު ހިންގާފައެވެ. އަދި އެ މަޖިލީހުން ނިންމި ތަހުޤީޤުގައި ނިންމާފައިވަނީ ޓްރަމްޕް މަޤާމުން ޢަޒުލުކުރަން ފެންނަ ކަމަށެވެ. އަދި މި މައްސަލަ ނިންމާ އެ މަޖިލީހުން ވަނީ ސެނެޓަށް މައްސަލައިގެ ލިޔުންތައް ފޮނުވާފައެވެ.

މައްސަލައިގެ އަޑު އެހުންތައް މި ހަފުތާގައި ސެނެޓުން ފަށާއިރު މައްސަލައިގެ ޚުލާސާ ބަޔާނުގައި ތިރީގެއިން ބުނެފައިވަނީ ޓްރަމްޕް މަޤާމުން ވަކިކުރަން ޖެހެނީ އެމެރިކާގެ ޑިމޮކްރަސީގެ ޢަސާސްތަކާއި އެމެރިކާގެ ސަލާމަތާއި ރައްކާތެރިކަމަށް ހުރި ސީރިއަސް އަދި ބޮޑެތި ގެއްލުންތަކުން ރައްކާތެރިވުމަށް ކަމަށެވެ.