\"ކޮންމެ މަންޒަރެއްގައިވެސް ތިއީ އަހަރެންގެ ތަރި\"

އެމެރިކާގެ ކުރީގެ ރައީސް ބަރަކް އޮބާމާ އެމަނިކުފާނުގެ އަނބިކަނބަލުން މިޝޭލް އޮބާމާއަށް އުފަންދުވަހުގެ ތަހުނިޔާ ވިދާޅުވިގޮތް ގިނަ ބަޔަކަށް ކަމުގޮސްފިއެވެ.

ޖެނުއަރީ 17 ވީ ހުކުރު ދުވަހު މިޝޭލްއަށް 56 އަހަރު ފުރިފައިވާއިރު، އޮބާމާ ވަނީ އެމަނިކުފާނުގެ އޮފިޝަލް އިންސްޓަގްރާމް އެކައުންޓުގައި އެމަނިކުފާނާއި މިޝޭލްގެ ހިތްގައިމު ފޮޓޯތަކެއް ހިއްސާ ކުރައްވާފައެވެ. އެގޮތުން ކަޅާއި ހުދުން ހަދާފައިވާ ފޮޓޯ ކޮލާޖެއް ހިއްސާކުރައްވައި އޮބާމާ ވަނީ އިނގިރޭސިބަހުން "ކޮންމެ މަންޒަރެއްގައިވެސް ތިއީ އަހަރެންގެ ތަރި" ކަމަށް ވިދާޅުވެ އެކަމަނާއަށް ތައުރީފު ކުރައްވާފައެވެ.

އަބަދުވެސް އަނބިކަނބަލުންނަށް ތައުރީފު ކުރައްވާ އޮބާމާއަކީ ގިނަ ބައެއްގެ ލޯބި ލިބިފައިވާ ރައީސެކެވެ. އެގޮތުން މިއަހަރު އެދެމަފިރިންގެ ކައިވެންޏަށް 28 އަހަރު ވާން އުޅޭއިރު، އޮބާމާ ވިދާޅުވީ އަނބިކަނބަލެއްގެ އިތުރުން މިޝެލްއަކީ ރަނގަޅު ރައްޓެއްސެއް ކަމަށާއި، އޭނާގެ ދަރިންނަށާއި މުޅި ގައުމަށް ނަމޫނާ ބޭކަނބަލެއް ކަމަށެވެ.

އެމެރިކާގެ ތާރީޚުގައި ފެނިގެންދިޔަ ފުރަތަމަ އެފްރިކަން- އެމެރިކަން ފަސްޓް ލޭޑީ މިޝެލްއާ ބެހޭ ގޮތުން އޭނާގެ ފިރިކަލުން އަދި އެމެރިކާގެ ކުރީގެ ރައީސް ބަރަކް އޮބާމާ އިތުރަށް ވިދާޅުވީ، މިޝެލްއަކީ ހިތްވަރުގަދަ އަންހެނެއް ކަމަށާއި މުޅި އެމެރިކާ މިޝެލްއަށްޓަކައި ފަޚުރުވެރި ވާކަމަށެވެ. މިޝެލްވެފައި ވަނީ އެމެރިކާގެ ފަސްޓްލޭޑީންގެ ތެރެއިން ގިނަ ބައެއްގެ ލޯބި ލިބިވަޑައިގެންފައިވާ ފަސްޓްލޭޑީއަކަށެވެ.

އޮބާމާ އާއި މިޝެލް ކައިވެނި ބައްލަވައިގެންފައި ވަނީ އޮކްޓޯބަރ 3، 1992 ގައެވެ.