ދެކުނު ޗައިނާ ކަނޑުގައި ޗައިނާއިން އުފައްދާފައިވާ ރަށްތަކުގެ ކައިރިއަށް އެމެރިކާ މަނަވަރެއް ދަތުރުކޮށްފި

ދެކުނު ޗައިނާ ކަނޑުގައި ޗައިނާއިން އުފައްދާފައިވާ ރަށްތަކުގެ ކައިރިއަށް އެމެރިކާގެ މަނަވަރެއް ދަތުރުކޮށްފިއެވެ.

މިއީ ރައީސް ޑޮނަލްޑް ޓްރަމްޕް ވެރިކަމަށް ވަޑައިގަތްފަހުން ،އެތަނުގެ މިލްކުވެރިކަމާމެދު ދައުވާ ކުރާ ޗައިނާއަށް ފުރަތަމަ ކުރިމަތިވި ގޮންޖެހުމެވެ.

ނަން ހާމަ ނުކުރާ މަސްދަރަކާ ހަވާލާދީ އެމެރިކާގެ މީޑިއާތަކުން ރިޕޯޓްކޮށްފައިވާ ގޮތުގައި ޔޫއެސްއެސް ޑޫވީ ވަނީ މިސްޗީފް ރީފް ކައިރިން 12 ނޯޓިކަލް މޭލުން ދަތުރުކޮށްފައެވެ.

ދެކުނު ޗައިނާ ކަނޑުގެ ފަރުތައްވެސް ހިމެނޭ ގޮތުން ހުރިހާ ސަރަހައްދެއްގެ މިލްކުވެރިކަމާމެދު ޗައިނާއިން ދައުވާކުރާއިރު އެހެން ގައުމުތަކުންވެސް އެ ސަރަހައްދުތަކުގެ މިލުކުވެރިކަމާމެދު ދައުވާކުރެއެވެ.

އެމެރިކާއިން ބުނެފައިވަނީ ބައިނަލްއަގްވާމީ ކަނޑުގެ ސަރަހައްދުގައި ކޮންމެ ހިސާބެއްގައިވެސް އެގައުމަށް އަސްކަރީ އޮޕަރޭޝަންތައް ހިންގޭނެ ކަމަށެވެ.

އެގައުމުން ބުނީ ސަރަހައްދީ އިމުގެ މައްސަލައިގައި އުފެދިފައިވާ ޚިލާފުގައި އެ ގައުމުން ވަކިކޮޅެއް ނުނަގާ ކަމަށާއި ނަމަވެސް "ފްރީޑަމް އޮފް ނެވިގޭޝަން" ގެ ނަމުގައި ކުރިންވެސް އަސްކަރީ މަނަވަރާއި މަތިންދާ ބޯޓް އެ ސަރަހައްދަށް ފޮނުވާ ކަމަށެވެ. ދެކުނު ޗައިނާ ކަނޑަކީ ގުދުރަތީގޮތުން މުއްސަނދި ސަރަހައްދެއްގެ އިތުރުން ހަރަކު އެތައް ބިލިއަން ޑޮލަރެއްގެ މުދާ އެ ސަރަހައްދު ހުރަސްކޮށް އެއް ގައުމުން އަނެއް ގައުމަށް ގެންދެއެވެ.