ދިވެހިރާއްޖޭގެ ސުޕްރީމް ކޯޓުގެ ރަޖިސްޓްރަރގެ މަގާމަށް ބޭފުޅަކު އައްޔަންކުރައްވައިފިއެވެ.

ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ބުނީ މިމަހުގެ 12 ވަނަ ދުވަހު ސުޕްރީމް ކޯޓުގެ ރަޖިސްޓްރަރގެ މަގާމަށް ސ.ހުޅުދޫ، ރަތްވިލާގެ ރަޢުފާ ޙައިދަރު ޢައްޔަން ކުރައްވާފައިވާ ކަމަށެވެ.

ރައުފާ ސުޕްރީމް ކޯޓުގެ ރަޖިސްޓްރާރގެ މަގާމަށް، އައްޔަން ކުރެއްވީ ޖުޑީޝަލް ސަރވިސް ކޮމިޝަނުގެ ޤާނޫނުގެ 21-1 ވަނަ މާއްދާގެ (ރ) ގެ 8 ވަނަ ނަންބަރުން ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނަށް މަތިކޮށްފައިވާ ޒިންމާގެ ދަށުން ކަމަށެވެ.

ޑީޖޭއޭއިން ބުނީ ރައުފާ ގައިދަރު އެންމެ ފުރަތަމަ ދިވެހިރާއްޖޭގެ ސުޕްރީމް ކޯޓާ ގުޅިވަޑައިގެންނެވީ 19 އޮކްޓޯބަރ 2011 ގައި އެސިސްޓެންޓް ލީގަލް އޮފިސަރުގެ މަޤާމަށް ކަމަށެވެ. އެއަށްފަހު 06 ނޮވެމްބަރ 2019 ގައި ލީގަލް މަޤާމުތަކުގެ އޮނިގަނޑަށް ގެނެވުނު އިސްލާހާއި ގުޅިގެން ލީގަލް އޮފިސަރަކަށް ބަދަލުވެގެން ދިޔަ ކަމަށް ޑީޖޭއޭއިން މައުލޫމާތުދެއެވެ.

ޑީޖޭއޭއިން ބުނީ އެޕްރީލް 2013 އިން 7 މެއި 2014 އަށް ރައުފާ ހައިދަރު ވަނީ ވަގުތީގޮތުން ދިވެހިރާއްޖޭގެ ސުޕްރީމް ކޯޓުގެ ރަޖިސްޓްރަރގެ މަގާމުވެސް އަދާ ކުރަށްވާފައިވާ ކަމަށެވެ.