އައި ކޭމްޕްގައި 75 ސާޖަރީ ހެދި: ހުޅުމާލެ ހޮސްޕިޓަލް
12 ޖެނުއަރީ 2020 | އާދީއްތަ 18:00މުޅި ޖުމްލަ 571 ބަލި މީހުން މި ކޭމްޕްގެ ތެރޭގައި ބަލާފައިވޭ
ހުޅުމާލެ ހޮސްޕިޓަލްގައި ކުރިޔަށް ގެންދިޔަ އައި ކޭމްޕްގެ ތެރެއިން
ހުޅުމާލެ ހޮސްޕިޓަލްގައި ލޮލުގެ ބަލިތަކަށް ޚާއްސަކޮށްގެން ކުރިޔަށްގެންދިޔަ އައި ކޭމްޕްގައި 75 ސާޖަރީ ހަދާފައިވާކަމަށް ހުޅުމާލެ ހޮސްޕިޓަލުން ބުނެފި އެވެ.
މުޅި ޖުމްލަ 571 ބަލި މީހުން މި ކޭމްޕްގެ ތެރޭގައި ބަލާފައިވާކަމަށްވެސް ހުޅުމާލެ ހޮސްޕިޓަލުން ބުނެއެވެ. ޒޮންގްޝަންގް އޮޕްތަލްމިކް ސެންޓާ ފޯ ޗައިނާއިން ހުޅުމާލެ ހޮސްޕިޓަލްގައި ކުރިޔަށް ގެންދިޔަ މި އައި ކޭމްޕު ކުރިޔަށް ގެންގޮސްފައިވަނީ ހަތަރު ދުވަހުގެ މުއްދަތަށެވެ.
މީގެއިތުރުން ޗައިނާ ސަރުކާރުގެ އެހީގައި ހުޅުމާލެ ހޮސްޕިޓަލްގައި ލޮލުގެ ބަލިތަކަށް ޚާއްސަ ސެންޓަރެއް ވަނީ ހުޅުވާފަ އެވެ. މިކުލިނިކުގައި އިސްކޮށް އުޅުއްވަނީ ޑރ ޗެން އެވެ. ޑރ ޗެން އަކީ ލޮލުގެ ބަލިތަކަށް ފަރުވާދިނުމުގައި 30 އަހަރު ހޭދަކުރައްވާފައިވާ އެތައް ހާސް ބަޔަކަށް ފަރުވާދީފައިވާ ޑޮކްޓަރެއްކަމަށް ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ވަނީ ވިދާޅުވެފަ އެވެ.
ލޮލުގެ ބަލިތަކަށް ފަރުވާދޭ ސެންޓަރުން ލޮލުގެ ތަފާތު ބަލިތަކަށް ފަރުވާދޭނެ ކަމަށެވެ. އެގޮތުން ލޯފުސްވުމާއި، ގުލްކޯމާ، އޮކިޔުލަރ ސަރފޭސް ޑިޒީސްފަދަ ލޮލުގެ ބަލިތަކަށް ފަރުވާދޭނެ ކަމަށް ސަފީރު ވިދާޅުވި އެވެ.
ޗައިނާ ސަރުކާރުގެ އެހީގައި 2015 ވަނަ އަހަރު އަދި 2017 ވަނަ އަހަރުވެސް ވަނީ ލޮލުގެ ޚާއްޞަ ކޭމްޕްތަކެއް ރާއްޖޭގައި ކުރިއަށްގެންގޮސްފައެވެ. މި ކޭމްޕްތަކުގައި ޖުމްލަ 1000 އަށް ވުރެގިނަ މީހުން ސްކްރީންކޮށް 186 މީހުންގެ ކެޓަރެކްޓް ސާޖަރީ ވަނީ ހަދާފައެވެ. އަދި 9.2 މިލިއަން ރުފިޔާގެ ލޮލުގެ ފަރުވާއާއި ގުޅޭ އާލާތްތައް ޗައިނާ ސަރުކާރުން ވަނީ ހަދިޔާކުރައްވާފައެވެ.
ދިވެހި ރާއްޖޭގައި ލޮލުގެ ޚާއްސަ ފަރުވާދޭ މަރުކަޒެއް ޤާއިމް ކުރުމަކީ ސިއްޙީ ދާއިރާއިން އެއްބާރުލުން ދިނުމުގެ ގޮތުން ޗައިނާ ސަރުކާރާއި އެކު 2017 ގައި ސޮއި ކުރެވިފައިވާ ފަހުމުނާމާގައި ފާހަގަ ކުރެވިފައިވާ މައިގަނޑު އެއް ދާއިރާއެވެ.
މިއެއްބަސްވުމާއިއެކު ރާއްޖެއިން ފެންވަރު ރަނގަޅު ލޮލޮގެ ފަރުވާ ލިބުމުގެ މަގުފަހި ވެގެންދާނެއެވެ.
