ސިޔާސީ ޕާޓީތަކުގެ ދަފްތަރު ގަޑުބަޑެއް ނުކުރަން: އީސީ
12 ޖެނުއަރީ 2020 | އާދީއްތަ 14:01ދަފްތަރުގައި ރަޖިސްޓްރީ ކުރަނީވެސް އަދި ދަފްތަރުން ނަމެއް އުނިކުރަނީވެސް އެކަމަށް ކަނޑައަޅާފައިވާ އުސޫލާ އެއްގޮތަށްކަމަށް އީސީން ބުނޭ
އިލެކްޝަންސް ކޮމިޝަން ގެ މެމްބަރުން
އިލެކްޝަންސް ކޮމިޝަނުން ބަލަހައްޓަމުންދާ ސިޔާސީ ޕާޓީތަކުގެ ދަފްތަރު ގަޑުބަޑުކޮށްފައި ނުވާނެ ކަމަށް އެކޮމިޝަނުން ބުނެފި އެވެ.
އެކޮމިޝަނުން ކޮށްފައިވާ ޓްވީޓެއްގައި ބުނަނީ ދަފްތަރުގައި ރަޖިސްޓްރީ ކުރަނީވެސް އަދި ދަފްތަރުން ނަމެއް އުނި ކުރަނީވެސް އެކަމަށް ކަނޑައަޅާފައިވާ އުޞޫލާ އެއްގޮތަށްކަމަށެވެ.
އިލެކްޝަންސް ކޮމިޝަނުން މިފަދައިން ޓްވީޓްކޮށްފައި މިވަނީ ޕީޕީއެމްގެ ކުރީގެ ސެކްރެޓަރީ ޖެނެރަލް އަދި ނިލަންދޫ ދާއިރާގެ ކުރީގެ މެންބަރު ޢަބްދުﷲ ޚަލީލުގެ އިތުރުން މަޖިލީހުގެ ދިއްދޫ ދާއިރާގެ ކުރީގެ މެންބަރު ޢަބްދުއްލަޠީފުގެ ނަމާއި މަޖިލީހުގެ ކުރީގެ މެންބަރުންތަކެއްގެ ނަން އެމްޑީޕީގެ ދަފްތަރުގައި އޮތުމުން އެކަމުގެ ނުރުހުން ފާޅުކުރަމުންދަނިކޮށެވެ. އެގޮތުން ވެރިކަންކުރާ މައި ޕާޓީ އެމްޑީޕީގެ ދަފްތަރުގައި އެމީހުންގެ ނަން އޮތްކަމަށްބުނެ ބައެއް ބޭފުޅުން ގެންދަވަނީ ޓްވީޓް ކުރައްވަމުންނެވެ.
އެންމެ ފަހުން އީސީން ނެރުނު ސިޔާސީ ޕާޓީތަކުގެ ދަފްތަރުގައިވާ ގޮތުން އެމްޑީޕީގައި ތިބީ 54101 މެންބަރުންނެވެ. ޕީޕީއެމްގައި 36073 މެންބަރުން ތިބޭއިރު ދެން އެންމެ ގިނަ މެންބަރުން ތިބި ޖުމްހޫރީ ޕާޓީގައި 11072 މެމްބަރުން އެބަ ތިއްބެވެ.
