އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް)ގެ ސިއްހީ ޚިދުމަތް ފޯރު ކޮށްދިނުމުގައި މިހާތަނަށް ގިނަ ކާމިޔާބީތަކެއް ހާސިލްކުރެވިފައިވާ ކަމަށް އެހޮސްޕިޓަލުން ބުނެފިއެވެ.

ދިވެހި ރާއްޖޭގެ ސަރުކާރުން ރައްޔިތުންނަށް ސިއްޙީ ޚިދުމަތް ފޯރު ކޮށްދިނުމުގައި 72 އަހަރު ހޮނިހިރު ދުވަހު ފުރުމާ ގުޅިގެން އައިޖީއެމްއެޗުން ނެރުނު ބަޔާނުގައި ބުނީ ސިއްހީ ނިޒާމުގެ ވަރަށް ގިނަ ލަނޑުދަނޑިތަކެއް ހާސިލް ކުރެވިފައިވާ ކަމަށާއި، މެދުނުކެނޑި ރާއްޖޭގެ ބޮޑު އާބާދީ އަކަށް ފަސޭހަ ކަމާއި އެކީޚިދުމަތްފޯރު ކޮށްދިނުމުގެ ގޮތުން އައިޖީއެމްއެޗްގެ ބައެއްގެ ގޮތުގައި ސަރުކާރުން އަޅާފައިވާ 25 ބުރީގެ އިމާރާތް ދަރުމަވަންތަ ކޮމްޕްލެކްސްގައި ގިނަ އޯ.ޕީ.ޑީ ހިދުމަތްތަކެއް މިހާރު ފޯރުކޮށްދެމުންދާ ކަމަށެވެ.

އޭގެ ތެރޭގައި ރޭޑިއޮލޮޖީ، ނާރުގެ ބަލިތަކަށް ހާއްސަ، ކަށީގެ ބަލިތަކަށް ހާއްސަ، ކުޑަކުދިންގެ ބަލިތަކަށް ހާއްސަ، އެތެރެ ހަށީގެ ބަލިތަކަށް ހާއްސަ، ޖެނަރަލް ސާރޖަރީ، ފިޒިއޮތެރަޕީ، ހަމުގެ ބަލި ތަކަށް ހާއްސަ، އޮކިއުޕޭޝަނަލްތެރަޕީ، ސްޕީޗް ތެރަޕީ، ކަރުންމަތީ ބަލިތަކަށް ހާއްސަ، އަދި ލޮލުގެ ބަލިތަކަށް ހާއްސަ އޯ.ޕީ.ޑީ ހިމެނެއެވެ. ދަރުމަވަންތަ ކޮމްޕްލެކްސް އިން އޯ.ޕީ.ޑީ ގެ ޚިދުމަތްތައް ފޯރު ކޮށްދެމުންދާއިރު، އައި.ޖީ.އެމް.އެޗްގައި ބައިތިއްބައިގެން ބަލިމީހުންނަށް ފަރުވާދެމުން ދިއުމާއި ފުއްޕާމޭގެ ބަލިތަކަށް ޚާއްސަ ފަރުވާކުރަމުންދެއެވެ. އަދި އައިޖީއެމްއެޗްގައި ގިނަ އަދަދެއްގެ ނަރުހުންނާއި ޑޮކްޓަރުންގެ ތަމްރީން ޕްރޮގްރާމްތައް ހިންގަމުންދާ ކަމަށް ވެސް އައިޖީއެމްއެޗުން މައުލޫމާތުދެއެވެ.

މީގެ އިތުރުން އައިޖީއެމްއެޗުން ބުނީ ކުރިން ރާއްޖޭގައި ލިބެންނެތްފަދަ ސްޕެޝަލިޓީ ޚިދުމަތްތައް އައިޖީއެމްއެޗް ގައި މިހާރު ރައްޔިތުންނަށް ވަރަށްފުޅާކޮށް ފޯރުކޮށްދެމުންދާ ކަމަށެވެ. އަދި ބައިނަލްއަގްވާމީ މިންގަނޑުތަކަށް ފެތޭގޮތަށް އައިޖީއެމްއެޗް އެކްރެޑިޓް ކުރުމުގެމަސައްކަތްތަކެއް ވެސް މިހާރު ފަށާފައިވާ ކަމަށެވެ.

ރާއްޖޭގެ ސިއްޙީ ނިޒާމު ވަރުގަދަކުރުމަށް މިސަރުކާރުން ވަރަށް ބޮޑު އަހަންމިއްޔަތުކަމެއްދޭއިރު، އައިޖީއެމްއެޗް މެނޭޖްމަންޓުން ވެސް އާންމު ރައްޔިތުންނަށް ޚިދުމަތް ކަށަވަރު ކުރުމުގެ ގޮތުން ސިއްޙީ ހިދުމަތުގެ ފެންވަރު ރަނގަޅު އަންނަނީ ގިނަ މަސައްކަތްތަކެއް ކުރަމުންނެވެ.