ކެމްޕޭންތަކަށް ދައުލަތުގެ ވަސީލަތްތައް ނަހަމަގޮތުގައި ބޭނުންކުރުން ހުއްޓާލާ: އިދިކޮޅު
ސަރުކާރަކީ ނުފުއްދޭ ވަޢުދުތައް ވަމުންދާ ސަރުކާރެއް: ޕީޕީއެމް/ޕީއެންސް
އިދިކޮޅުން ބޭއްވި ޖަލްސާއެއްގެ ތެރެއިން
މި އަހަރުގެ އެޕްރީލް މަހުގެ ހަތަރު ވަނަ ދުވަހު ބާއްވާ ލޯކަލް ކައުންސިލް އިންތިހާބުގެ ކެމްޕޭނަށް އެމްޑީޕީން ދައުލަތުގެ ވަސީލަތްތައް ނަހަމަގޮތުގައި ބޭނުންކުރާކަމަށް އިދިކޮޅު ޕީޕީއެމް/ޕީއެންސީން ތުހުމަތުކޮށްފިއެވެ.
ކެމްޕޭނާ ދިމާކޮށް ސަރުކާރުގެ ފައިސާއާއި ވަސީލަތްތައް ނަހަމަގޮތުގައި ބޭނުންކުރާ ކަމުގެ ތުހުމަތުކޮށް އިދިކޮޅުން ވަނީ އެކަން ހުއްޓާލުމަށް ގޮވާލާފައެވެ. އިދިކޮޅުގެ ބަޔާނުގައި ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދުއަށްވެސް ވަނީ ވަރަށް ބޮޑަށް ފާޑުވިދާޅުވިފައެވެ.
ސަރުކާރުން ކެމްޕެއިންތަކަށް ދައުލަތުގެ މުދާ ނަހަމަ ގޮތުގައި ބޭނުންކުރާ ކަމަށް އިދިކޮޅުން ތުހުމަތުކޮށްފައިވާއިރު، ނިމިދިޔަ މަޖިލިސް އިންތިހާބުގައިވެސް ދައުލަތުގެ މުދާ ނަހަމަ ގޮތުގައި ބޭނުންކޮށްފައިވާ ކަމަށް ތަކުރާރުކޮށް އިދިކޮޅުން ވަނީ ތުހުމަތުކޮށްފައެވެ.
އެގޮތުން މަޖިލިސް އިންތިހާބުގެ ކެމްޕެއިން ދަތުރުފުޅެއްގައި، ރައީސްގެ ރަސްމީ ލޯންޗުކޮޅު ބޭނުންކުރެއްވުމާއި ގުޅިގެންވެސް ބޮޑެތު ފާޑުކިޔުންތަކެއް އަމާޒުވެގެން ދިޔައެވެ. އޭރު އެމްއެންޑީއެފްއިން ބުނީ، އެއީ ސަލާމަތީ ސަބަބުތަކަށްޓަކާ ކުރެއްވި ކަމެއް ކަމަށެވެ.
ރައީސް ނަޝީދުގެ ކެމްޕޭނު ދަތުރުފުޅުތަކުގައި މަޖިލީހުގެ ވަސީލަތްތައް ބޭނުންކުރައްވާ މައްސަލައެއް އަމިއްލަ ފަރާތަކުން ވަނީ އެންޓި ކޮރަޕްޝަން ކޮމިޝަން (އޭސީސީ) އަށް ހުށައަޅާފައެވެ. އެކަމަކު މަޖިލީހުގެ އިދާރާއިން ވަނީ އެކަން ދޮގުކޮށްފައެވެ.
އިދިކޮޅު ކޯލިޝަނުން ވަނީ މީގެ ކުރިން ރައީސް އިބްރާހިމް މުހައްމަދު ސޯލިހާއި، ރައީސް މުހައްމަދު ނަޝީދާއި، ޑިފެންސް މިނިސްޓަރު މާރިޔާ އަހުމަދު ދީދީ، ކެމްޕޭނު ދަތުރު ތަކުގައި ދައުލަތުގެ ވަސީލަތްތައް ބޭނުން ކުރެއްވި ކަމުގެ މައްސަލަ އެއްވެސް އޭސީސީ އަށް ހުށައަޅާފައެވެ.
