ކުޅިވަރު މާކެޓްކުރުމަށް ސްޕޯޓްސް ކޯޕަރޭޝަނާއި އެފްއޭއެމްއާއި ދެމެދު އެއްބަސްވުމެއްގައި ސޮއިކޮށްފި
9 ޖެނުއަރީ 2020 | ބުރާސްފަތި 13:21މި އެއްބަސްވުމުގެ ދަށުން ބޭއްވޭ ފުރަތަމަ ވޯކްސޮޕް ކުރިޔަށްދާނީ މިމަހު 27 އަދި 28 ވަނަ ދުވަހު
ބައްސާމް (ކ) މާއްޓޭ (ވ)
ކުޅިވަރު މާރކެޓްކުރުމަށް ސްޕޯޓްސް ކޯޕަރޭޝަނާއި ފުޓުބޯލް އެސޯސިއޭޝަން އޮފް މޯލްޑިވްސް އެފްއޭއެމްއާއި ދެމެދު އެއްބަސްވުމެއްގައި ސޮއިކޮށްފިއެވެ.
އެފްއޭއެމް ހައުސްގައި ކުރިޔަށްދިޔަ ރަސްމިއްޔާތުގައި ސޮއި ކުރުމަށްފަހު އެފްއޭއެމްގެ ރައީސް ބައްސާމް އަދީލް ޖަލީލް ވިދާޅުވީ މި އެއްބަސްވުމުގެ ދަށުން ކްލަބްތަކަށް މާރކެޓިންގ ސެމިނަރތަކެއް ބޭއްވިގެންދާނެ ކަމަށެވެ. އަދި މިހާރު ފުޓުބޯޅައިގެ ފޯރިދަށްވަމުންދާ ކަމަށާއި، މި އެއްބަސްވުމުގެ ދަށުން ކްލަބްތަކަށް ގެއްލިފައިވާ ފުޓުބޯޅައިގެ ފޯރި ނެގެހެއްޓުމަށް ފުރުސަތުތަކެއް ލިބިގެންދާނެ ކަމަށެވެ. މީގެ އިތުރުން ބައްސާމް ވިދާޅުވީ މި އެއްބަސްވުމުގެ ދަށުން މި މަހު ފުރަތަމަ ސެމިނަރ ފެށިގެންދާނެ ކަމަށާއި، މި މާރކެޓިންގ ސެމިނަރ ތަކުން ކްލަބްތަކަށް އޭގެ ފައިދާ ކުރާނެ ކަމަށެވެ.
ސްޕޯޓްސް ކޯޕަރޭޝަނުގެ ފަރާތުން މައުރޫފް އަހުމަދު (މާއްޓޭ) ވިދާޅުވީ ސްޕޯޓްސް ކޯޕަރޭޝަނަކީ ކުޅިވަރު އިދާރާތަކާއި ގާތުން މަސައްކަތްކުރާނެ ބައެއް ކަމަށާއި، މި އެއްބަސްވުމުގެ ދަށުން ބޭރުގެ އެކްސްޕާޓުންނާއިއެކު ސެމިނަރތައް ބޭއްވިގެންދާނެ ކަމަށެވެ. މީގެ އިތުރުން މިއަހަރު ސްޕޯޓްސް ކޯޕަރޭޝަންގެ ފަރާތުން "ފޭން އެންގޭޖްމަންޓް" ޕްރޮގްރާމްސް ބާއްވާނެ ކަމަށާއި، އަދި ވިޔަފާރި އުސޫލުން ކުޅިވަރު ހިންގުމަށް ކްލަބްތަކަށް ވޯކްޝޮޕް ބާއްވާނެ ކަމަށެވެ.
މި އެއްބަސްވުމުގެ ދަށުން ބޭއްވޭ ފުރަތަމަ ވޯކްޝޮޕް ކުރިޔަށްދާނީ މިމަހު 27 އަދި 28 ވަނަ ދުވަހުއެވެ. މި ވޯކްޝޮޕް ކުރިޔަށްދާނީ ބޭރުގެ ފުންނާބުއުސް އެކްސްޕާޓަކާއިއެކުގައެވެ.
