ހދ އަތޮޅު ކައުންސިލްގެ ރައީސް ހޮވުމަށް ކުޅުދުއްފުށީ ރައްޔިތުން ވޯޓުލާންޖެހޭ: އީސީ

ހދ އަތޮޅު ކައުންސިލްގެ ރައީސް ހޮވުމަށް ކުޅުދުއްފުށީ ސިޓީގެ ރައްޔިތުން ވޯޓުލާންޖެހޭ ކަމަށް އިލެކްޝަންސް ކޮމިޝަން(އީސީ)ގެ ނައިބު ރައީސް އަހުމަދު އަކްރަމް ވިދާޅުވެއްޖެއެވެ.

އަކްރަމް ކުރެއްވި ޓްވީޓެއްގައި ވިދާޅުވީ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނުގެ 11 ވަނަ މާއްދާގައިވާ ގޮތުގެ މަތިން ހދ އަތޮޅުގެ ކައުންސިލް ރައީސް ހޮވުމަށް ކުޅުދުއްފުށީ ރައްޔިތުންވެސް ވޯޓުލާންޖެހޭ ކަމުގައެވެ.

Advertisement

ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނުގެ 11 ވަނަ މާއްދާގައި ބަޔާންކޮށްފައިވަނީ އަތޮޅު ކައުންސިލް އެކުލެވިގެންވާ ގޮތެވެ. އެގޮތުން އެމާއްދާގައި ބުނެފައިވަނީ އަތޮޅު ކައުންސިލް އެކުލެވިގެންވަނީ އެކައުންސިލް ނިސްބަތްވާ ސަރަހައްދުގެ ރައްޔިތުންގެ މެދުގައި ދިމިގްރާތީ އުސޫލުތަކުގެ މަތިން ސިއްރު ވޯޓަކުން ނަގާ އަތޮޅު ކައުންސިލްގެ ރައީސް އާއި އެއިދާރީ ދާއިރާއެއްގައި ހިމެނޭ ކޮންމެ ރަށެއްގެ ރަށު ކައުންސިލްގެ ރައީސް އަދި އެ އިދާރީ ދާއިރާއެއްގައި ސިޓީއެއް ހިމެނޭނަމަ އެ ސިޓީއެއްގެ މޭޔަރުގެ މައްޗަށްކަމަށެވެ.

އަކްރަމް ވިދާޅުވީ މޭޔަރ އަކީ އަތޮޅު ކައުންސިލް މެމްބަރެއްކަމަށާއި އެ އަތޮޅެއްގެ ރައީސް ހޮވާނީ އެއަތޮޅަކަށް ނިސްބަތްވާ ހުރިހާ އެންމެން ކަމަށެވެ.

ކުޅުދުއްފުށި ސިޓީއަކަށް ބަދަލުކުރުމާއި ގުޅިގެން ކުރިޔަށް އޮތް ލޯކަލް ކައުންސިލް އިންތިޚާބުގައި ކުޅުދުއްފުށި ސިޓީގެ އިންތިޚާބީ ދާއިރާތައް އިޢުލާނުކުރުމާއި، އަންހެން މެންބަރުން އިންތިޚާބު ކުރާނެ ދާއިރާތައް ކަނޑައެޅުން އަންނަ ހަފުތާ ބަންދުގައި ކުޅުދުއްފުށި ސިޓީގައި ބޭއްވުމަށް އީސީން ވަނީ ނިންމާފަ އެވެ. ކުޅުދުއްފުށީ ސިޓީގައި ހަ ދާއިރާއެއް ހިމެނެއެވެ.

ކުޅުދުއްފުއްޓަށް ސިޓީގެ ދަރަޖަ ރައިސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ދެއްވާފައިވަނީ މި ހިނގާ ޖެނުއަރީ މަހުގެ 1 ވަނަ ދުވަހުން ފެށިގެންނެވެ. އެރަށަށް ސިޓީއެއްގެ ދަރަޖަ ދިނުމަކީ ރައީސް ޞާލިޙުގެ ރިޔާސީ ވަޢުދުފުޅަކަށްވާއިރު، އާބާދީގައި 10،000 މީހުން ހަމަވެއްޖެނަމަ އެ ރަށަކަށް ސިޓީއެއްގެ ދަރަޖަ ދެވިގެންދާނެކަމަށް ޤާނޫނުގަ ބަޔާންކޮށްފައިވެއެވެ.