ދޮގު މައުލޫމާތު ފަތުރައިގެން އިމްރާން ޚާން ހޫނުފެނުގައި!
4 ޖެނުއަރީ 2020 | ހޮނިހިރު 11:16އިމްރާން ޙާން ޝެއަރކުރެއްވީ މީގެ އަހަރުތަކެއް ކުރިން ހިނގާފައިވާ ހާދިސާއެއްގެ ވީޑިއޯއެއް
ޕާކިސްތާނުގެ ބޮޑުވަޒީރު އިމްރާން ޙާން
ބަންގްލަދޭޝްގައި މީގެ 7 އަހަރުކުރިން ހިނގި ހަމަނުޖެހުމެއްގެ ވީޑިއޯއެއް ޓްވީޓްކުރައްވައި، އެއީ މިހާރު އިންޑިއާގެ އުއްތަރަޕްރަދޭޝްގައި މުސްލިމުންނާއި ދެކޮޅަށް ހިންގަމުންދާ ހަމަނުޖެހުންތަކެއްކަމަށް ދެއްކުމަށް ޕާކިސްތާނުގެ ބޮޑުވަޒީރު އިމްރާން ޚާން މަސައްކަތްކުރެއްވުމާއި ގުޅިގެން، އިމްރާން ޚާނަށް ބޮޑެތި ފާޑުކިޔުންތަކެއް އަމާޒުވެއްޖެއެވެ.
އިމްރާން ޚާން މިވީޑއޯ ޝެއަރ ކުރައްވާފައިވަނީ ޓްވިޓަރގައެވެ. އަދި އެއީ މުސްލިމުންނާއި ދެކޮޅަށް އިންޑިއާގެ އުއްތަރަޕްރަދޭޝް ފުލުހުން ދެމުންދާ އަނިޔާތަކެއްކަމަށް ވިދާޅުވެ ވީޑިއޯ ޓްވީޓްކުރެއްވުމާއިއެކު، އެއީ މީގެ 7 އަހަރު ކުރިން ބަންގްލަދޭޝްގައި ހިނގި ހަމަނުޖެހުމެއް ކޮންޓްރޯލްކުރަން އެގައުމުގެ ފުލުހުން ކުރި މަސައްކަތްކަމަށް ބުނެ، މީގެ ހަތް އަހަރު ކުރިން ޔޫޓިއުބަށް ލާފައިވާ އޭގެ އޮރިޖިނަލް ވީޑިއޯ ގިނަ ބަޔަކު ޝެއަރކުރިއެވެ. އިމްރާން ޚާން ވަނީ ފަހުން އެ ޓްވީޓް ޑިލީޓް ކުރައްވާފައެވެ.
އިމްރާން ޚާން އެވީޑިއޯ ޓްވީޓްކުރެއްވުމާއިއެކު އުއްތަރަޕްރަދޭޝް ފުލުހުން ވަނީ ވީޑިއޯ ދޮގުކޮށް، އެއީ ކޮން ވީޑިއޯއެއްކަން ކިޔައިދީ ޓްވީޓްކޮށްފައެވެ. އަދި އިންޑިއާގެ ޚާރިޖިއްޔާއިންނާއި، އދގައި ހުންނަވާ އިންޑިއާގެ ސަފީރުވެސް ވަނީ "އާދަވެފައި ހުރިކަމެއް ނެތިގެންދާނީ އުނދަގުލުން"ކަމަށް ބުނެ، ޕާކިސްތާނަށް ފާޑުކިޔާފައެވެ.
އިންޑިއާގެ ޚާރިޖިއްޔާއިން އިޝާރާތްކޮށްފައިވަނީ 2017 ވަނަ އަހަރު އދގެ އާއްމު މަޖިލީހުގައި، ކަޝްމީރުގެ މުސްލިމުންނާއި ދެކޮޅަށް އިންޑިއާއިން ހިންގަމުންދާ އަނިޔާވެރި އަމަލުތަކުގެ މަންޒަރެއްކަމަށް ބުނެ، ހަމަލާއެއްގައި މަރުވެފައިވާ އަންހެން ކުއްޖެއްގެ ފޮޓޯއެއް ދައްކާފައެވެ. އެހެންނަމަވެސް ފަހުން ހާމަވި ގޮތުގައި އެފޮޓޯއަކީ 2014 ވަނަ އަހަރު ފަލަސްތީނުގެ ޣައްޒާގައި އިޒްރޭލުން ހިންގި ޢުދުވާންތަކުގައި ޝަހީދުވި ފަލަސްތީން އަންހެން ކުއްޖެއްގެ ފޮޓޯއެވެ. ދޮގު މައުލޫމާތު ފަތުރައިގެން ބައިނަލްއަޤްވާމީ މުޖްތަމައުގެ ހަމްދަރުދީ ހޯދަން ނޫޅުމަށް އޭރުވެސް ޕާކިސްތާނުގެ ސަރުކާރަށް ޕްރެޝަރު ކުރިމަތިވިއެވެ.
