އދ. އިން މިޔަންމާ އަސްކަރިއްޔާ އާއި މެދު ހަދަނީ ދޮގު: އަސްކަރިއްޔާ

މިޔަންމާގެ އަސްކަރިއްޔާއިން މިދިޔަ އަހަރު އެގައުމުގެ މުސްލިމުންނާ ދެކޮޅަށް އަނިޔާވެރި ރަހުމްކުޑަ އަމަލުތައް ހިންގާފައިވާ ކަމަށް އދ. އިން ކުރާ ތުހުމަތުތައް މިޔަންމާގެ އަސްކަރިއްޔާ އިން ދޮގުކޮށްފިއެވެ.

މިޔަންމާގެ އަސްކަރިއްޔާ އިން، މިޔަންމާގެ ފުލުހުންގެ ބޯޑަރު ޕޯސްޓްތަކަށް ހަމަލާ ދިން މީހުން ހޯދުމަށް ހިންގި އޮޕަރޭޝަނުގައި އެކަނިވެސް 65،000 ރޮހިންޔާ މުސްލިމުން ބަންގްލަދޭޝް ހިޖުރަކޮށްފައި ވެއެވެ.

މިޔަންމާ ދޫކޮށް އެކި ގައުމުތަކަށް ގޮސްފައިވާ ގިނަ މީހުން ވަނީ މިޔަންމާގެ އަސްކަރިއްޔާއިން އެމީހުންނަށް ޖިންސީ ގޯނާ ކުރުމާއި، މީހުން މެރުމާއި އަދިވެސް މިފަދަ ލާއިންސާނީ އަމަލުތަށް، އެމީހުންނާ ދޭތެރޭ ހިންގައިފައިވާ ކަމަށް ތުހުމަތުކޮށްފައި ވެއެވެ. އެހެންނަމަވެސް މިޔަންމާގެ އަސްކަރިއްޔާއިން ބުނެފައި ވަނީ، އަސްކަރިއްޔާ އިން ހިންގި ތަހުގީގުގައި, މިޔަންމާ އަސްކަރިއްޔާ އިން ލާއިންސާނި އަމަލުތަކެއް ހިންގި ކަން ސާބިތުވެފައި ނުވާ ކަމަށާއި، އެހެން ބުނާ ބަޔަކު އެ ހަދަނީ "ދޮގު ކަމަށެވެ."

މިޔަންމާގެ އަސްކަރިއްޔާ އަށް ކުރެވޭ ތުހުމަތުތަކާއި ގުޅިގެން އެކަން އެ އަސްކަރިއްޔާ އިން ތަހުގީގުކޮށް ނެރުނު ރިޕޯޓެއްގައި ބުނީ، އދ ގެ އިންސާނީ ހައްގުތަކާއި ބެހޭ އިދާރާ ކަމަށްވާ އޯއެޗްސީއެޗްއާރް އިން ނެރުނު ރިޕޯޓެއްގައި މިޔަންމާގެ އަސްކަރިއްޔާއަށް 18 ތުހުމަތެއް ކޮށްފައިވާ ކަމަށެވެ. އޭގެ ތެރެއިން 12 ތުހުމަތަކީ "ހަގީގަތާއި ހިލާފު" ތުހުމަތުތަކެއް ކަމަށެވެ. އަދި ބާކީ ހަ ތުހުމަތަކީ "އަމިއްލައަށް ހަދާފައިވާ ދޮގު ވާހަކަތަކެއް" ކަމަށެވެ.

މިޔަންމާގެ މެޖޯރިޓީ ކަމަށްވާ ބުޑިސްޓުންނާއި މުސްލިމުންނާ ދޭތެރޭ ހަމަނުޖެހުންތައް ހުއްޓުމެއް ނެތި ދަނީ ހިނގަމުންނެވެ. މިޔަންމާގެ މުސްލިމުންނަށް އެގައުމުން ރަށްވެހިކަން ލިބުން ވެސް ވަނީ މަހްރޫމްކުރެވިފައެެވެ.