ޕާސްޕޯޓު ހިފަހައްޓާފައި ތިބި ބިދޭސީން ފުރުވާލީ މިދިޔަ އަހަރު: ހަނަފީ
އެ މައްސަލަ ބެލުމަށް ޕީޖީ އޮފީހުން އެންއައިސީއަށް ވަނީ ހުށައަޅާފައި
އިމިގްރޭޝަން ކޮންޓްރޯލަރ މުހައްމަދު އަހުމަދު ހުސައިން (ހަނަފީ)
މަސްތުވާތަކެތި އެތެރެކުރުމުގެ މައްސަލަތަކެއްގައި ހިމެނޭ ދެ ބިދޭސީން ފުރުވާލީ 2018 ވަނަ އަަހަރުކަމަށް އިމިގްރޭޝަން ކޮންޓްރޯލަރ މުހައްމަދު އަހުމަދު ހުސައިން (ހަނަފީ) ވިދާޅުވެއްޖެއެވެ.
މަސްތުވާތަކެތި އެތެރެކުރުމުގެ ދެ މައްސަލައެއްގައި ހިމެނޭ ދެ ބިދޭސީއެއްގެ ޕާސްޕޯޓް ހިފެހެއްޓުމަށް ކޯޓުން އަމުރުކޮށްފައި ވަނިކޮށް އެ ދެ މީހުން ފުރުވާލި މައްސަލަ ބެލުމަށް ޕީޖީ އޮފީހުން ނޭޝަނަލް އިންޓެގްރިޓީ ކޮމިޝަނަށް އާދިއްތަ ދުވަހު ވަނީ ހުށައަޅާފައެވެ.
އެކަމާއި ގުޅޭގޮތުން ހަނަފީ ކުރެއްވި ޓްވީޓެއްގައި ވިދާޅުވީ، އެއީ 2018 ވަނަ އަހަރުގެ ނޮވެމްބަރު މަހު ހިނގާފައިވާ ކަމެއް ކަމަށާއި، އެފަދަ ކަންކަން ހައްލު ކުރުމަށް ކަމާބެހޭ ފަރާތްތަކާއި ގުޅިގެން މަސައްކަތް ކުރައްވާނެ ކަމުގެ ފުރިހަމަ ޔަޤީންކަން ދެއްވާ ކަމަށެވެ.
ރާއްޖެއަށް މަސްތުވާތަކެތި އެތެރެކުރުމާއި ގުޅުންހުރި މި މައްސަލަތަކުގެ އިތުރު ތަފްސީލެއް ކަމާބެހޭ އެއްވެސް އިދާރާއަކުން އަދި ދީފައިނުވާތީ، އެ ދެ މީހުންނަކީ ސީދާ ކޮން މައްސަލަތަކެއްގައި ހިމެނޭ މީހުންނެއް ކަމެއް އެނގިފައެއް ނުވެއެވެ.
ނަމަވެސް މިއީ ދައުލަތުގެ މުއައްސަސާއެއްގެ މައްޗަށް ތަހުޤީޤެއް ހިންގައިދެއްވުން އެދި ޕީޖީ އޮފީހުން އެންއައިސީއަށް ހުށައެޅި ފުރަތަމަ ފަހަރު ކަމަށް ޕީޖީ އޮފީހުން ބުނެފައިވެއެވެ.
ރާއްޖޭގައި ގަވާއިދާ ހިލާފަށް ލައްކައަކަށް ވުރެ ގިނަ ބިދޭސީން އުޅޭކަމަށް ކަމާބެހޭ ބައެއް ފަރާތްރަކުން ބުނާއިރު، ބިދޭސީންނާ ގުޅޭ ގިނަ މައްސަލަތައް ދަނީ ފެންމަތިވަމުންނެވެ.
