ރާއްޖެ މިހާތަނަށް ވެސް ދުށް އެންމެ ބިރުވެރި އެއް ދުވަހަކީ 2004 ވަނަ އަހަރުގެ ޑިސެންބަރު މަހުގެ 26 ވަނަ ދުވަހެވެ. އެއީ ރާއްޖެއަށް ސުނާމީ އެރި ދުވަހެވެ. އެ ކާރިޘާއަކާއި އެކު 82 މީހުންގެ ފުރާނަ ގެއްލި، 26 މީހަކު ވީނުވީއެއް ނޭނގި ގެއްލުނު ދުވަހެވެ.

އެ ބިރުވެރި ނާމާން ޙާދިސާ ހިނގާދިޔައިރު ލ. ކަޅައިދޫގަ ދިރިއުޅުނު އައިމިނަތު ރަޝީދާ އިހުސާސް ކުރި ނުވަތަ ތަޙައްމަލް ކުރި ކަންތަކުގެ ވާހަަކަ އަޅުގަނޑާ ޙީއްސާ ކުރީ ހިތާމަވެރި ރާގެއްގައެވެ. އޭނާ ބުނީ އެ ޙާދިސާ އިއްޔެ ހިނގި ކަމެއްހެން އަދިވެސް ހަނދާން އެބަހުރި ކަމަށެވެ.

އެ ދުވަހުގެ ވޭންދެނިވި ތަޖުރިބާ ހަނދާން ކުރަމުން އޭނާ ބުނީ އޭރު އެންމެ ކުޑަ ދަރިފުޅު ވިހައިގެން މަސްދުވަސް ވެސް ނުވާނެ ކަމަށެވެ. ގިފިލި ހުންނަނީ ގެޔާއި ތަންކޮޅެއް ދުރުގައިކަމުން ތުއްތު ދަރިފުޅު ގޮވައިގެން ހިނގައިގަތީ އެ ކުއްޖާ ފެންވަރުވަން ކަމަށެވެ. ނަމަވެސް އެދުވަހު އާދަޔާ ޚިލާފަށް ރަށުގެ ވަލުފަރާތާއި ވީފަޅިން މީހުންގެ ހަޅޭކުގެ އަޑު އިވުނު ކަމަށް އޭނާ ބުންޏެވެ. އަދި 'އިލޮށިފަތިން' ޖެހުމުން ގޮވާ ޒާތުގެ އަޑެއް އިވުނު ކަމަށް އޭނާ ބުންޏެވެ. ރަޝީދާ ބުނީ އެވަގުތު ކުޑަކޮށް ނުތަނަވަސްވި ނަމަވެސް ކުއްޖާ ރޯން ފެށުމުން ހަމަޔަކަށް އެޅެންދެން މަޑުކޮށްލައިގެން ހުރީ ކަމަށެވެ.

ރަޝީދާ ބުނީ ވަގުތާއި އެކު އަޑުވެސް ގަދަވަމުން ދިޔަ ކަމަށެވެ. ކަމެއް ވެގެން އުޅޭތޯ ބެލުމަށް ތުއްތު ކުއްޖާ ގޮވައިގެން ނުކުތީ ވެގެން އުޅޭގޮތް ބަލާލުމަށެވެ. ނުކުތުމާއެކު "އަވަހަށް އެންމެން އަތިރި އާ ދިމާލަށް ނުކުމޭ. މުޅި ރަށް އެއޮށްގެން ގިރެނީ" މިހެން ކިޔާ އަވަށްޓެރިން ހަޅޭއްލަވަމުން ދުވަމުން ގެންދިޔަ މަންޒަރެވެ.

ރަޝީދާ ބުނީ ދެން ފެނިގެން ދިޔައީ 5 ފޫޓުގެ ބޮޑު ރާޅެއް ގޭގެ ބިށްދޮށުން އައި މަންޒަރު ކަމަށެވެ. "އެވަގުތު ހިތް ފަޅައިގެން ދިޔަ ކަހަލަ. މޭގަނޑު އަނގަޔަށް އައިކަހަލަ" އެ ވަގުތު ސިފަ ކުރަމުން އޭނާ ބުންޏެވެ. ރޮއެރޮއެ އޮތް ތުއްތު ކުއްޖާ ގޮވައިގެން ދުއްވައިގޮތެއް ވެސް ނޭނގުނު ކަމަށް އޭނާ ބުންޏެވެ. ވިހޭތާ މާގިނަ ދުވަހެއްވެސް ނުވާއިރު ވަރަށް އުނދަގުލުން ދުވުނު ގޮތަކަށް އަތިރިއާއި ދިމާލަށް ދިޔައީ ކޮންމެ ޙާލެއްގަވެސް އެ ތުއްތު ދަރިފުޅު ރައްކާތެރިކުރާށެވެ.

ރަޝީދާ ބުނީ އޭނާގެ ޙާލަތު ހުރިގޮތުން މާ ދުރަކަށް ނުދެވުނު ކަމަށެވެ. ރަށަށް ބިންދާލަން ތައްޔާރުވެފައިވާ ރާޅުން ދެމައިން ސަލާމަތްވުމަށް ވަދެވުނީ ގާތް ރަށްޓެއްސެއްގެ ގެއަކަށް ކަމަށް އޭނާ ބުންޏެވެ. އޭނާ ބުނީ ރާޅު އަރައިގަތީ ގަދަޔަަށް "ކައްކާލާފައި" ކަމަށެވެ. އަދި ރާޅު ބިންދާލިއިރު އޮތީ ތުއްތު ދަރިފުޅު އުރައިގެން ހިފެހެއްޓުނު ގޮތަކަށް އެގޭގެ ގޯތީގައި ހުރި ރުކެއްގައި ހިފައިގެން ކަމަށެވެ.

ހިތްދަތި ރާގަކުން ރަޝީދާ ބުނީ އެވަގުތު މީހުން އޮޔާދާ މަންޒަރު ފެނުނު ކަމަށެވެ. އަދި ބައެއް މީހުން އޭނާ އެކޭ އެއްފަދައިން ގަހެއްގައި ނުވަތަ ރުކެއްގައި ހިފަހައްޓައިގެން އޮތް ކަމަށެވެ. އަނެއް ބަޔަކު އުސް ފާރަކަށް އަރައިގެން ގަދަ ރާޅާ އެކު ފާރު ވައްޓާނުލާތޯ ދުޢާކޮށްލަ ކޮށްލާ ތިބި މަންޒަރުވެސް ފެނުނު ކަމަށް އޭނާ ބުންޏެވެ. ރަޝީދާ ބުނީ ފެންގަނޑު އެވަގުތު ހުރީ އިސްކޮޅުވެސް ނުޖެހޭ ހިސާބުގައި ކަމަށެވެ. އެވަގުތު ކުޑަކުދިންނާއި ބޮޑެތި މީހުންވެސް ރޮއެ އަޑު ނަގަމުންދިޔަ ކަމަށް އޭނާ ބުންޏެވެ.

ރަޝީދާ ބުނީ ރަށަށް ސުނާމީ އެރިތާ 5 މިނެޓު ވެސް ނުވެ ރާޅު އެ ރަށުން ފައިބައިގެން ދިޔަ ކަމަށެވެ. ނަމަވެސް އެ އައި ބާރުމިނުގެ ސަބަބުން ރަށް އެއްކޮށް ދޮވެލާފައި ދިޔަ ކަހަލަ ކަމަށް އޭނާ ބުންޏެވެ. ރަށުން ފައިބައިގެން ދިޔަ ރާޅާއެކު ކުދިންގެ މާމަވެސް ނިޔާވީ ކަމަށް އޭނާ ބުންޏެވެ. އަދި މާމަގެ ހަށިގަނޑު ފެނުނީ 3 ދުވަސް ފަހުން ކަމަށެވެ. މީގެއިތުރުން މިޙާދިސާގައި މަންމަގެ ތިމާގެ މީހަކު ވީނުވީ އެއް ނޭނގި ގެއްލުނު ކަމަށް އޭނާ ބުންޏެވެ.

އޭނާ ބުނީ ރަށުން ރާޅު ފައިބައިގެން ދިޔުމާއެކު އެންމެން އެއްވީ ރަށުގެ ބަނދަރު ޞަރަޙައްދުގަ ކަމަށެވެ. އަދި މަސްދޯނިތަކުގައި ރަށުގެ ހުރިހާ ރައްޔިތުންނާއެކު ދިޔައީ ލ. ގަމަށެވެ. ރަޝީދާ ބުނީ ގަމަށް ގޮސް ތިބީ ވަގުތީ ހިޔާތަކުގައި ކަމަށެވެ.

ރަޝީދާ ބުނީ އެދުވަހު ގަތް ބިރު ބުނެދޭންވެސް ނޭނގޭ ކަމަށެވެ. ފުރާނަ އަތް މައްޗަށް ލައިގެން ނުކުތީ ދަރިފުޅު ރައްކާތެރި ކުރެވޭތޯ ކަމަށެވެ.