އިޓަލީގެ ޔުވެންޓަސްއަށް ކުޅެމުން އަންނަ ޕޯޗުގަލްގެ ތަރި ކްރިސްޓިއާނޯ ރޮނާލްޑޯ ކޯޗެއްގެ ގޮތުގައި ނުފެންނާނެ ކަމަށް އޭނާ ބުނެފިއެވެ.

އުމުރުން 34 އަހަރުގެ ރޮނާލްޑޯ އިޓަލީގެ ނޫހަކަށް ދިން އިންޓަރވިއު އެއްގައި އޭނާ ބުނީ ރިޓަޔާ ކުރުމަށްފަހު ކޯޗެއްގެ ގޮތުގައި ފެނުން އެއީ ދުރުކަމެއް ކަމަށާއި ނަމަވެސް ފުޓުބޯޅައާއި ދުރުގައި ހުރުން އެއީ "ވުމަށް ވުރެ ނުވުން ގާތް" ކަމެއްކަމަށް ރޮނާލްޑޯ ބުންޏެވެ.

ކޯޗެއްގެ ގޮތުގައި އޭނާ ފެނިއްޖެނަމަ އޭނާ ވެގެންދާނީ އޭނާ ކޯޗުކަން ކޮށްދޭ ޓީމު ކުޅުންތެރިން މޯޓިވޭޓް ކޮށްދޭ ކޯޗަކަށްކަމަށާއި އެފަދަ ކޯޗުން މިހާރު ވަރަށް މަދު ކަމަށެވެ. މީގެ އިތުރުން ރޮނާލްޑޯ ބުނީ ފުޓުބޯޅަ ކުޅެފައި ތިބޭ ކުޅުންތެރިން ކޯޗުކަން ކުރުން އެއީ މައްސަލައެއްގެ ގޮތުގައި އޭނާ ނުދެކޭ ކަމަށާއި, މިސާލަކަށް ރެއާލް މެޑްރިޑްގެ ކޯޗު ޒައިނުއްދީން ޒިދާނަކީ މިހާތަނަށް އޭނާއާ އެކު މަސައްކަތްކުރި އެންމެ މޮޅު ކޯޗުންގެ ތެރޭގައި ހިމެނޭ މޮޅު ކޯޗެއް ކަމަށް އޭނާ ބުންޏެވެ.

ރޮނާލްޑޯ އިތުރަށްބުނީ ޔުވެންޓަސްގައި އޭނާ ހުރީ ހިތްހަމަ ޖެހިގެން ކަމަށެވެ. އަދި ޔުވެންޓަސްއަކީ އިޓަލީގައި މިވަގުތު އޮތް އެންމެ ވަރުގަދަ ކްލަބްކަމަށާއި، ޔުވެންޓަސް އެއް ލެވެލްއެއްގައި މިދިޔަ ފަސް އަހަރެއްހާ ދުވަހު ކުޅެމުންކަމަށެވެ.

މީގެ ކުރިން އިނގިރޭސި ވިލާތުގެ މެންޗެސްޓަރ ޔުނައިޓެޑަށާއި ސްޕެއިންގެ ރެއާލް އަށް ކުޅުނު ރޮނާލްޑޯ ވަނީ ޔުނައިޓެޑަށް އޭނާ ކުޅެދިން 292 މެޗުން 118 ލަނޑު ކާމިޔާބުކޮށްފައެވެ. އަދި ރެއާލް އަށް ކުޅެދިން 438 މެޗުން އޭނާ ވަނީ 450 ލަނޑު އެޓީމަށް ކާމިޔާބުކޮށްދީފައެވެ. މީގެއިތުރުން ރޮނާލްޑޯ އަކީ ރެއާލްއަށް އެންމެ ގިނަ ލަނޑު ކާމިޔާބުކޮށްދިން ކުޅުންތެރިޔާއެވެ.

ޔުވެންޓަސް އަށް 2018 ވަނަ އަހަރު ބަދަލުވުމަށްފަހު އޭނާ ކުޅުނު 64 މެޗުން އެޓީމަށް 40 ލަނޑު އޭނާ ވަނީ ކާމިޔާބުކޮށްދީފައެވެ.