އިންޑިއާގެ މުޒާހަރާ: 25 ލައްކަ ރުޕީސް ދައްކަން 60 މީހަކަށް އަންގައިފި
25 ޑިސެމްބަރު 2019 | ބުދަ 18:16ނޯޓިސް ދެވުނީ މުޒާހަރާގައި ހަމަނުޖެހުން ހިންގި ކަމަށް ފުލުހުންނަށް ފާހަގަކުރެވިފައިވާ ފަރާތްތަކަށް
މުޒާހަރާކުރާ މީހަކަށް ފުލުހުން ހަމަލާދެނީ
ގެއްލުމުގެ ބަދަލުގެ ގޮތުގައި 25 ލައްކަ އިންޑިއަން ރުޕީޒް ދައްކަން، 60 މީހެއްގެ މައްޗަށް އުއްތަރް ޕްރަދޭޝް ސަރުކާރުން އަންގައިފިއެވެ.
ދާދި ފަހުން އިންޑިއާގައި ފާސްކުރެވުނު ރަށްވެހިކަމުގެ ގާނޫނާ ގުޅިގެން އެގައުމުގައި ކުރިޔަށްދާ މުޒާހަރާތަކާއި ގުޅިގެން، ގިނަ ބަޔަކު އަންނަނީ މަގުތަކަށް ނިކުމެ ސަރުކާރާ ދެކޮޅަށް އަޑުއުފުލަމުންނެވެ. އަދި މި މުޒާހަރާތަކުގައި ބޮޑެތި ކުރިމަތިލުންތަކެއް ހިނގައި، އެތައް ބަޔެއްގެ ފުރާނަވެސް ވަނީ ގެއްލިފައެވެ.
ލިބުނު ގެއްލުމުގެ ބަދަލުގެ ގޮތުގައި ކަމަށް ބުނެ ފައިސާ ދައްކަން ނޯޓިސް ފޮނުވާފައިވަނީ، އުއްތަރް ޕްރަދޭޝްގައި ކުރި މުޒާހަރާތަކުގައި ސަރުކާރާއި އަމިއްލަ މީހުންގެ މުދަލަށް ގެއްލުންދިން ފަރާތްތަކުގެ ގޮތުގައި ސަލާމަތީ ބާރުތަކަށް ދެނެގަނެވިފައިވާ ފަރާތްތަކަށް ކަމަށް ރާމްޕޫތް ޑިސްޓްރިކްޓްގެ މެޖިސްޓްރޭޓް އިންޑިއާގެ މީޑިއާތަކަށް މައުލޫމާތު ދީފައިވެއެވެ.
މިހާތަނަށް އުއްތަރް ޕްރަދޭޝްއިން އެކަނިވެސް ވަނީ 33 މީހަކު ހައްޔަރުކޮށްފައެވެ. އަދި މިމުޒާހަރާތަކުގައި ހަމަނުޖެހުން ހިންގި 150 ފަރާތެއްވެސް ދެނެގަނެވިފައިވާ ފުލުހުން މައުލޫމާތު ދީފައިވެއެވެ. އިންޑިއާ ފުލުހުން މިހެން ބުނި ކަމުގައިވީނަމަވެސް، ފުލުހުން އާންމުންގެ މުދަލަށް ގެންލުންދޭ ވީޑިއޯތަކެއް ސޯޝަލް މީޑިއާގައި ލީކްކޮށްލައިފައިވެއެވެ.
އުއްތަރް ޕްރަދޭޝްގެ އިތުރުން، އިންޑިއާގެ ގިނަ ސަރަހައްދުތަކެއްގައި އަންނަނީ މުޒާހަރާތައް ކުރަމުންނެވެ. މުޒާހަރާގެ ބައިވެރިން މައިގަނޑު ގޮތެއްގައި އަޑުއުފަލަމުން އަންނަނީ ސީއޭއޭގައި ރަށްވެހިކަން ލިބޭ މީހުންގެ ލިސްޓުން މުސްލިމުންގެ ނަން އުނިކުރެވިފައި އޮތުމުންނެވެ. މުޒާހަރާގެ ބައިވެރިންވަނީ މި ގާނޫނު އުވާ ނުލަނީސް، މުޒާހަރާކުރުން ހުއްޓާނުލާނެ ކަމަށް ބުނެފައެވެ.
